Tatala aloa’ia Ta’avale Fasi-manu

238 Hits

MAMA-MANAIA MA SOIFUA MALOLOINA LELEI: E mae’a loa ona fa’amama ma tipitipi, momoli sa’o loa i le pusa’aisa.

MAMA-MANAIA MA SOIFUA MALOLOINA LELEI: E mae’a loa ona fa’amama ma tipitipi, momoli sa’o loa i le pusa’aisa.

Ripotia e Lanuola Tusani Tupufia

Fa’aliliu e Maiava 

 

O le Aso Lua o le vaiaso nei, na tatala aloa’ia ai e le Vaega mo Lafumanu a le Matagaluega o Fa’ato’aga ma Faigafaiva i Vailima, ni ta’avale fasi-manu se lua, ua fa’amoemoe e tausisia ai le mama ma le saogalemu atoatoa o a’ano o manu-fasi (povi) i totonu o le atunu’u.

Na fa’aaliga e le Minisita o Fa’ato’aga ma Faigafaiva, Le Mamea Ropati Mualia, o le iai o ta’avale nei, o lo’o o-gatasi lava ma fuafuaga ae maise le mulimulita’ia o le Tulafono mo Le Fa’alaloina ma le Fa’aaogaina o A’ano o Manu-fasi 2015.

Sa ‘auai i Vailima i le Aso Lua, se Ali’i-asiasi mo a’ano o manu-fasi mai ‘Ausetalia fa’apea se tasi e poto-fa’apitoa mo nei fa’atinoga, e fa’atinoa ma fa’ata’ita’i le fa’aaogaina o ia loli e lua.

Sa fa’aaogaina se fana-fa’apitoa e fa’alalo ai le manu-papalagi ma fa’aumatia ai mulimuli ai loa. Na fa’ailoa mai e le Ali’i Minisita, o le ‘auala e fa’alaloina ai ma tape le povi, e matua vave lava ma sili atu ona lelei, nai lo le tulituli solo e ono tutu’a ai ma fefeu le a’ano.

A mate le povi, ona sisi lea i luga e le siligi o le loli, ma fa’ata’oto i luga o pa-u’amea e tipitipi ma fa’atino ua ai galuega, e aunoa ma le papa’i o le a’ano ma le tino o le povi i le palapala.  “A ma’ea loa mea uma, ona ‘ave-sa’o lava lea i totonu o le pusa-‘aisa, tu’u iai le fa’ailoga (stamp) e fa’amautuina ai ua saunia lelei, ma tu’u loa i fata ta’itasi,” o le saunoaga lea a le Ali’i Minisita. 

 “O le fa’ailoga (stamp) e ta’u atu ai, ua mae’a ona fa’amaonia e le Matagaluega, ua mama ma saogalemu e fa’aaoga. O le fa’amoemoe atoa lea, ia ‘aua ne’i afaina le a’ano o le manu, a ‘ia ‘aua fo’i ne’i tele ni lima e lotea.” 

A fa’atusatusa i le tulaga masani sa fa’atinoina ai e o tatou tagata lenei galuega, e muamua lava tuli-tamo’e se manu ina ia fa’alalo, ona toso mai ai lava lea i luga o palapala le povi pe a maua, ae maise fo’i le amoina mai o oga-povi ma pi’itino ai i tino o tagata,” o le fa’amalamalamaga lea a le Minisita. 

“A silasila la i le faiga fou o le a iai, e le toe papa’i le tino o le povi (a’ano) i le palapala, aua e uma loa ona tapena lelei ma vaevae, alu sa’o loa i totonu o le pusa’aisa. O nisi o le atunu’u o le a fa’alalo lava e latou a latou manu ma fasi, peita’i e tele le avanoa e ono fa’asalaina ai ma o le a fesiligia e le to’atele e fa’atauaina le tausisia o soifua maloloina lelei, pe ua asiasia ma fa’amaonia e le Matagaluega.” 

Sa fesiligia le Minisita pe fa’afefea la manu-papalagi e fa’alaloina mo fa’alavelave e pei o fa’aipoipoga ma isi mana’oga fa’aleAganu’u, ae saunoa Le Mamea, o le a fa’apena lava ona aofia i lalo o le tulafono.

“A silasila lelei lava iai, o le fasipovi lava lena e fai ai mea’ai,” o lana fa’aaliga lea. Na fesiligia fo’i pe o le a fa’afefea ona asiasia e le Matagaluega o lea tulaga ae na ta’ua e le Minisita, na o le pau lea o le ‘auala e mafai ai ona fa’atau atu o povi-fasi nei, o le fa’a’auala atu i le vaega lea ina ia mautinoa, o lo’o lelei ma saogalemu mo mea-tauamafa. “A fa’apea la e iai se fa’ama’i-manu (povi) o iai, o le a afaina uma tagata pe a fa’aaoga a’ano o manu nei o lo’o fasi ma tapena i ‘auala ua masani ai le atunu’u.

“E fa’asala le faleoloa latou te fa’atau atu so’o se fasi-povi mai fa’alavelave aua e ao ona ‘auala atu i le Vaega lea mo A’ano o Manu Fasi.” Ua fuafua, o le a fa’atuina se fale fasi-manu tele i Nu’u i le isi tolu masina o lumana’i. 

© Samoa Observer 2016

Developed by Samoa Observer in Apia