Manatu o le Fa’atonu - O Mea uma e fe’ilafi-e le o ni auro ia

164 Hits

Tusia - Savea Sano Malifa

Faaliliu e Seagaitumua Tupuola

 

E sa’o Tuilaepa. Fai mai a ia i taimi ua mavae i le 1981, ina ua umia e le Vaega Faa-Upufai e Puipuia Aia Tatau a Tagata le pule e faafoe ai le malo-na tofia o ia e le Palemia ua maliu, o Tofilau Eti Alesana, e avea ma Minisita o Tupe.

O lana galuega o le faatulaga lea o se fuafuaga e aveese ai Samoa mai le lua sa i ai o ia i lena taimi. Ia, o le a la le lua lea sa talanoa i ai o ia? 

E tusa ai ma Tuilaepa Sailele Malielegaoi, lea ua leva ona avea ma sui usufono o le palemene mo le 36 tausaga talu ai- o le 15 o ia tausaga sa avea ai o ia ma palemia –o lea la lua o lana faiga lea sa faamatala ai e faapea o le malo i lea taimi –sa matua leai lava ni tupe.  I se isi faaupuga, sa matua leai lava se pene ‘apa. 

O le mea- i nei aso, i le faagasologa o se talanoaga ma le Samoa Observer i le aso 10 o Ianuari 2016, sa lapata’ia e Tuilaepa: “Matou te le toe fia o i tua i le pogai na mafua ai le solo tete’e i le 1981 ina ua gau le malo. 

“E le gata ina leai se tupe a le malo-ae sa leai foi ni tupe teu faa-agaga i fafo. O le pogai lena sa gaogao ai fata o faleoloa.  “E ono masina sa le maua ai ni sikaleti i soo se faleoloa. Pau o mea sa matou ‘aia o ponaivi o moa. Ia, o le tulaga la lena e tatau ona tatou matua faaeteete lava i ai.” Ia- se’i o tatou faatali la mo sina sekone lava iinei. O le a le Solo Tete’e lea na ia ta’ua i le taimi nei?

O talanoa mai ‘ea o ia e uiga i le solo tete’e a tagata faigaluega o le malo lea sa matua inisinia lava ma le loto i ai e le Faalapotopotoga a Tagata Faigaluega a le Malo ae lagolago e le Vaega Faa-Upufai e Puipuia Aia Tatau a Tagata- lea faatoa faavae, o lona faamoemoe e tasi ia faa-pipili le sootaga o galuega a le malo i le atunuu atoa, ma i le faatinoina o lea tulaga –na aveeseina ai le faiga-malo na filifilia faale-tulafono a le Palemia o Tupuola Efi mai lona tofi.  

O talanoa mai ‘ea o ia pe na faapefea ona tosotoso ma le loto i ai lea solo tete’e mo le sefulu ma le tolu vaiaso –ina ia mafai ai i le faagasologa o lea taimi ona tapuni ofia o le malo, e aofia ai ma falema’i, a’oga, fale meli, malae vaalele, uafu, ma isi mea uma, i tagata lautele –ina ia matua lagona ai e le atunuu le tiga o le taunuga o lea solo tete’e.

A tatou mafaufau la i ai, e sa’o Tuilaepa e uiga i “fale o faleoloa ma le leai o ni oloa e i ai”  i lea taimi faatasi ai ma le leai o ni sikaleti e maua i soo se nofoaga, faatasi ai ma le taumafai e nisi- o ‘ponaivi o moa’ i soo se nofoaga, ae foliga mai e le o mafai foi e ia ona faatino –pe ua na faagalo ma le loto i ai –ona faamatala mai pe aisea na tupu ai lea falavelave. 

O le mea lea-e lelei ona tatou faamanatu ia te ia. O le pogai na gaogao ai ia fata oloa ona e faapea o loo faagasolo le solo tete’e, o ofisa uma o le malo na tapunipuni, ma o le masini e igoa o le malo sa le mafai ona gaoioi.  

Sa le mafai ona faagaoioi ma ina ua taunuu mai vaa ma oloa-sa i luga o le vasa ma faatalitali, ma ina ua latou fiu e faatali-sa toe toso i luga o latou taula ma toe folau ese. 

Sa faapena foi le tulaga na o’o i ai malae vaalele ma fale meli. Ona o le tapunia o ia ofisa-sa faapea foi ona tapunia fesootaiga faava-o-malo, ma sa matua tapunia atoa Samoa mai le lalolagi. Ma-ona soso’o mai ai ma le tulaga e sili ona mata’utia.

Na tino mai lea tulaga i le faaitiitia o oloa tau penisini ma o lea na tau faasoasoa ai penisi a fale penisini-ma o le to’atama’i o le atunuu na amata ai ona faitio.

Ia-sa i ai la Tuilaepa i lena taimi?  O le mea moni-sa i ai. Ana leai-semanu na te le tuuina mai se lapata’iga: 

 “Matou te le toe fia fo’i i tua i le mea na pogai ai le solo tete’e i le 1981 ina ua gau le malo.  “Ia, o le itu lena e tatau ona tatou matua faaeteete i ai.” Ae poo le a lava, o le tagata na ia taofia lenei atunuu mai le titō o lona ulu i seoli-pe o se lua i le laueleele e nonō mai ai le upu manino a Tuilaepa-o le Failautusi lea o Tupe i lena taimi.

O Alaistair Hutchison.   O le mea na ia faia e pei lava o se vavega. Na ia tilotilo faasolo i lana lisi o alolofa mai fafo ia na ofo mai le latou fesoasoani mo nisi o galuega tetele a le malo i Samoa nei, ona amata loa ona ia talosagaina i latou mo se fesoasoani. 

Sa na faamatalaina e faapea o Samoa ua leai ni ana penisini, ona ia talosagaina lea e faapea ia liliu ane a latou tupe faa-meaalofa i ni o e maua ai le penisini ina ia mafai ai ona faa-tutumu tane penisini i totonu o le atunuu. Ma na talia lelei e ia tagata alolofa 

I lea taimi o le ofisa o Mr Hutchison sa i luga apitagalu e mafai ai ona tilotilo atu i le ava. I le tasi aoauli sa ‘ou i ai i totonu o lona ofisa mo se ma talanoaga –o le taimi lea na ma vaai atu ai i le faamalama, ma iloa atu se vaa sua’u tele ua latalata mai. 

O le taimi lena na ia ta’u mai ai ia te a’u le faiga o lana taumafaiga e ala i se taumafaiga fai faatasi e lavea’i le atunuu mai le goto atu i totonu o lea lua.Pe o le taumafaiga a Mr. Hutchison ia liliu ane ia tupe faa-meaalofa i kamupani penisini-o se fuafuaga lea a Tuilaepa?  E le’i faailoa maia e Mr. Hutchison.

Na te lei faailoa maia pe o se galuega a Tuilaepa le faatulaga o se fuafuaga e aveese ai Samoa mai totonu o lea lua sa i ai o ia i lea taimi.. Ae poo le a lava-o le solo tete’e a tagata faigaluega o le malo i le 1981 e le’i una’ia e se mana’o ina ia faagasolo i luma le atunuu talu ai ua gau le malo i lea taimi.

Ae, ua na o se taumafaiga faa-polokiki na fuafua e aveese ai le faiga-malo sa i ai i lea taimi mai o latou tofi ae faatino e le H.R.P.P. le gaoioiga autu e faatino ai lea faamoemoe. I le taimi nei la: Ua mauoloa lo tatou malo i aso nei? 

Ma afai la ua faapena, aisea la o aso uma lava e vaaia ai tamaiti ma ofu masaesae i luga o ala tetele o Apia o faatau atu lapisi ae le o i le aoga? 

O le mea moni, ona o lea ua mauoloa lo tatou malo, aisea ua le tuuina atu se fesoasoani i le tele o nuu ia ua sosolo ai le mativa ma le fia’ai e pei o se faama’i, ae o le mativa e tatau ona avea ma tiute faamuamua-o malo mauoloa uma?

Ae faapefea le mea mata’utia e igoa o faiga pi’opi’o ma le tiute tauave o le malo –ina ia tumau i le faimea tonu ma le mautali atu i le atunuu? O le mea moni e faapea o faiga pi’opi’o ua avea ma faama’i i le salafa o le malo i aso nei, ua fai ma tau faamata’i pe a mafaufau i ai ae o se itu lea e ao ona fo’ia, faatasi ai ma le faamoemoe ia matua aveese ma poo le a lava le auala e fai ai.

Ma o le matafaioi lena a Tuilaepa. 

O se mea lea e tatau ona ia faatinoina-o le vave o le lelei foi lena, a leai-o matati’a uma na ia ‘ausia ma mea lelei na fai e lana faigamalo mo le atunuu i le tele o tausaga- e ono leai sona aoga ma o lona tofi o le a maumau ma pala. 

Ia manatua foi o mea uma e fe’ilafi e le o ni auro ia….” 

*“O mea uma e fe’ilafi e le o ni auro ia; Ua masani ona e faalogo o faailoa atu lena tulaga:  E anoano mea e faatau atu e le tagata i lona olaga. But my outside to behold:

O Tia maoa’e e faamautu i ai anufe. Ana e poto ma loto tele, e te le etuetu i se faamasinoga ua leva, O lau tali sa le faamumauina i tusi ta’ai. Ia e manuia : ua malūlū lou suti.  Ua Malūlū, ua matua malulu lava, ma i’u le taimi o galuega: O le mea lea, tofa, vevela vevela ma afio maia le malūlū ua liu ‘aisa!”

 

-William Shakespeare -

The Merchant of Venice-O le Faioloa o Venise.

© Samoa Observer 2016

Developed by Samoa Observer in Apia