Toe lalaga e Tofilau, fafaga mo Faia’oga

302 Hits

TOE FAFAGA FAIA’OGA: Le Afioga a Tofilau Lino (saofa’i) ma nisi o faia’oga mai le motu tele i le aso mulimuli o le Fono Fa’aleTausaga a le Matagaluega.

TOE FAFAGA FAIA’OGA: Le Afioga a Tofilau Lino (saofa’i) ma nisi o faia’oga mai le motu tele i le aso mulimuli o le Fono Fa’aleTausaga a le Matagaluega.

Ripotia e Deidre Fanene

Fa’aliliu e Maiava

 

Ua toe lalaga e se matai mai le Afio’aga o ‘Iva i Savai’i le tulaga sa faia i aso ua mavae, o le Au-fafaga lea mo faia’oga.

Na laga e Tofilau Lino, o se sui o le Komiti A’oga a ‘Iva lea tulaga a’o fa’agasolo le Fonotaga a Faia’oga sa faia i le amataga o le vaiaso nei, i le Maota o TATTE i Sogi.

“Fa’afofoga lelei fo’i i le igoa o le Matagaluega. O le Matagaluega o A’oga, Ta’aloga ma Aganuu’u,” o lana fa’asilasilaga lea i sui-‘auai o le fono. 

Na liliu ane i sui o le Matagaluega ma fa’apea: “O fea tou te o-mai ai? O le a le aganu’u o tou fa’aaoga? Ae ‘aisea ua faia ai a tou fa’asalalauga fa’alaua’itele, e taofia ai le fafagaina o faia’oga?”

Na ta’ua e Tofilau, ua le-lava fa’alogo so’o i ofisa sinia o le Matagaluega o faia fa’asalalauga nei, e le tatau i afio’aga ma alalafaga ona va’aia ma tausia lelei faia’oga. 

“I le aganu’u fa’aSamoa, o lo tatou tiute lea o le tausia lelei o tagata,” o lana fa’aaliga lea.

“Aisea ua tatou tausi lelei ai faife’au i totonu o nu’u ae fa’atauagavale ma le-ano i faia’oga?”

Na fa’aopopo atu Tofilau, e tatau i nu’u uma ona tausia ma va’aia lelei faia’oga e pei fo’i ona faia i faife’au uma aua, o tagata-‘ese, o tagata o lo’o fai-atu i afio’aga ma alalafaga.

“A tou afifio atu i le nu’u o ‘Iva, o lo’o fa’apena lava ona matou fai, o lo’o matou tausia lelei faia’oga ma fafaga,” o lana fa’aaliga lea.

“Manatua fetalaiga a Iesu i Ona so’o e fa’apea, ‘Aua ne’i tou ave o so’o se mea aua o lo’o iai i latou o le a tausia ‘outou. O le tulaga fo’i lena e tatau ona faia i faia’oga.” 

Na tatalo fo’i le Ali’i-matua i le Matagaluega o A’oga, ina ia toe silasila ane i a latou faiga-fa’avae e uiga i fafaga mo faia’oga.

“O tagata nei e tete’e i faiga-fa’avae nei, o tagata-tata’a o lo’o nonofo i ‘ele’ele umia-sa’oloto i Apia,” o lana fa’aaliga lea. “I totonu o afio’aga ma alalafaga, e fiafia lava e fa’atino le sao lea e ‘au-fafaga mo faia’oga. E le tatau lava ona tatou taofia aua o le tasi lea o a tatou tu ma aganu’u masani, e iloa ai o tatou o tagata Samoa.

 “O ai lava e gafatia le galue mai le 9 i le taeao se’ia tau i le 4 i le afiafi, ae na o se fasi falaoa? E le mafai.” 

Na faitioina fo’i e Tofilau faiga-fa’avae a le Matagaluega o A’oga ua fa’as ai ona toe fafaga faia’oga o lo’o fa’aaogaina mo le va’aia o su’ega tetele a le atunu’u aoao. 

“O le matou va’ai iai, matou o lo’o i totonu o nu’u ta’itasi, o se mea matua leaga tele le o-mai o tagata nei ma toe fo’i atu, ae aunoa se mea e ‘ave e o ma latou,” o lana fa’aaliga lea.

“O le tatou tu lea ma le aganu’u, o le tausi lelei o a tatou malo ma ia mautinoa, ua fai iai se fa’aaloalo e fo’i ma latou. 

“Ae le o se fa’aSamoa lea mea o le toe fo’i o malo e fa’atau a latou lava mea’ai, e le sa’o lena mea. Aisea ua outou faia ai lena mea? 

 “Po’o le a lava le malosi o lo tou taumafai e taofia le mea lea, e le mafai ona toe tu’ua, talu ai o le mea na sau ai le atunu’u i le amataga ma ua masani ai. “Na tatou ola mai lava ma le alolofa. ‘Ou te talosaga atu ai i le Matagaluega, toe silasila ane i le mea lea, ma tatou toe fo’i e fa’atino  mea sa faia e tua’a ua mavae. O tatou na, la tatou aganu’u e iloa ai tatou o Samoa.” Na matua vi’ia ma patipatia e sui ‘auai uma le fa’aaliga lea a Tofilau.

© Samoa Observer 2016

Developed by Samoa Observer in Apia