O LA’U TALA FO’I

301 Hits

1. Matauina i Tala Fou le faaaliga a se tasi o tamalii sa avea muamua ma Minisita o le Kapeneta- e faapea afai e toe fo’i mai le HRPP e faafoe le atunuu-e leai lava se mea e tasi e suia. Ua uma le 30 tausaga ae leai lava se mea o suia vagana ai le anoano o folafolaga-o le faaaliga lea a Dr. Tagaloa Pita.

Ia –afai la ua silafia e le atunuu lea tulaga-o le fesili-“O le a la le mea e tatau ona fai? Faamata e mafai ona liua ai manatu ma finagalo o i latou o loo maua le anoano o manuia mai le HRPP? Afai la e leai lava se mea o suia talu mai le 30 tausaga talu ai-o le a la le pogai e saga mana’o ai lava le HRPP na te faafoeina le malo o le atunuu?

O le tali- ua suamalie manuia o loo maua-aemaise ai o le paoa e taofiofi ai ma faalilo ana faiga pi’opi’o. Ia silasila i faiga pi’opi’o ia na fai e le Minisita muamua o Tupe i le SLC ma le faitau miliona ma miliona o tupe a le atunuu na maumau ai-ae matua musu lava le faigamalo e ave i le Faamasinoga!

Afai la e musu e ave lea mataupu i le Faamasinoga-o se mea amiotonu la le falepuipui o tagata o le atunuu i le gaoi o le $50, ae a faitau miliona ma miliona tupe a le atunuu ua liu-suavai i faiga pi’opi’o a le Malo-ona le falepuipui lea! O le fesili la- o ni tupe a le Palemia ma le Kapeneta poo le HRPP poo tupe a le atunuu?

O le mea tonu lava lea fai mai le gagana a Samoa o le “lē toe’e ma le le popoi! O ni tupe a o latou matua poo latou aiga, itumalo poo latou nuu-poo ni tupe a le atunuu?  Afai la o ni tupe a le atunuu-o lona uiga-o “tupe e mamala ae o le la e tausi ai o latou aiga ma latou fanau! O lea ua faatafunaina le Flea Maketi ae o ai na te iloa pe le o le Palemene lea o le a soso’o- talu ai nei faiga pi’opi’o!

Afai la o faavae Samoa i le Atua ae o loo fai ma vaisu o le Malo le fai o faiga pi’opi’o-o manatua la le saeluaina o le Malo mai ia Saulo ae tu’u ia Tavita-lea fai mai lana ta’utinoga-“O Ieova o lo’u Leoleo Mamoe o Ia-e leai se mea ‘ou te mativa ai. Na te ave a’u i le mea o i ai le vaomu’a ou te taoto ai-na te ta’ita’i ia te  a’u i tafatafa o vaitafe lemu-na te faafo’isia mai lo’u agata………”Na te ta’ita’i ia te a’u i ala o le amiotonu ona o lona suafa!” O le ituaiga lena o Ta’ita’i e faavae lona Malo i le Atua! E te mana’o lava la e fai le HRPP ma Vaega e faafoeina lo tatou atunuu? O le a la sou taofi? 

2. Matauina foi i Tala Fou le Sui Faatu Tu-to’atasi o Levaopolo Talatonu ma sana faaaliga e faapea o le a faalauiloa aloa’ia i se taimi vave sui faatutū tuto’atasi mo le Faiga-Palota Lautele o loo loma nei.

O Levaopolo e pei ona silafia e le atunuu na ia faatuina lea faamoemoe. O ia la sui faatutū tuto’atasi-fai mai Levaopolo o loo filo ai se vaega tele o tagata polokiki e lava le poto masani.

O sui faatutu tutoatasi ia na ta’ua e Levaopolo o i latou ia ua latou silafia lelei le faiga e manumalo ai i se tuuga-solofanua-o lona uiga –ua latou iloa lelei lava le mea e fai pe a filifilia i latou. Ua vave mai le taimi e faalauiloa ai lea lisi o sui faatutu tuto’atasi faatasi ai ma fuafuaga e una’ia ai se fesoasoani mo tagata.

Fai mai Levao-a outou tuu atu tupe i tagata-e le o tagata susunu- ae faatau ai  mea-ma a latou totogi le tau o ia mea-latou te totogi VAGST-ona nofo lea o le tupe i totonu o le tamaoaiga. O le isi faamoeoe o sui faatutu tutoatasi-o le manuia lautele lea o le atunuu. Fai ma e tatau ona tuuina atu i le atunuu avanoa tutusa tau galuega ma o latou faamanuiaga.

Fai mai Levao o se faiga faapena –e manuia ai le 180,000 o tagata o le atunuu-ona tuuina atu lea e le Malo faamanuiaga i ia tagata e soifua ai ma totogi ai a latou aitalafu. Fai mai la Levao –e tele isi lava fuafuaga o le a faalauiloa faatasi i le taimi e faalauiloa ai suafa uma o sui faatutu tu-to’atasi! O le a la sou taofi? 

3. Matauina ma le fiafia le faata’ita’iga a nai tina o loo fia avea ma faipule! Ae a tatou tilotilo lelei i lea tulaga-e peiseai o loo i ai se tulaga o loo taotaomia ai lea taumafaiga! Ia o lea ua fai faata’ita’iga a nai Tina-ae le o iloa pe tua ma ni a le palota! O le fesili la-o se mea lenei e masani ai Samoa ona tau saili faapenei se avanoa o Tamaitai? I se tasi faaupuga-e peiseai o lea e tau faanoi se avanoa mo nai tama’itai?

O fea e aumai ai lea faiga? Aisea ua faigata ai ona malolo alii o avea ma sui tauva o le Palota-ae tu’u le avanoa i Tamaitai? O lona uiga-e valelea tamaitai o Samoa? E le faapea foi e le’i taitaia muamua e Tamaitai Samoa! Ua tatou iloa lelei Nafanua, Salamasina ma isi! E i ai ni faaletonu na feagai ma le atunuu?

O le tali –e leai vagana ai le to’afilemu o mea uma! Aisea la e le tuu avanoa ai i nai tamaitai? Afai o tamaitai o Tama Sa a Aiga ma o a tatou Feagaiga-e tau faanoinoi la se avanoa o tamaitai Samoa? O le lu’itau la mo sui tauva uma lava o le faiga-palota o loma nei-tu’u le avanoa i o tatou tuafafine.

O le upu moni- e sili ona agavaa tamaitai e ta’ita’ia le Malo. E na o tama’itai foi e maopoopo ai le atunuu-leaga e iloa alolofa ma alolofa moni i tagata uma o le atunuu. Afai e soifua mai le tamaitai Samoa ona tipi lea o lona pute i luga o le Upeti-o le faailoga lena o le faamoemoe o le aiga-o lona tofi o le manuia o lona aiga. O se mea talafeagai la e tusa ai ma le aganuu a Samoa ona tau faanoi se avanoa o tamaitai Samoa?

O le Tulafono Faa-Temokalasi Tau Aia Tatau-lea ua laki ai le itupa o alii-ona ua tatou tumua’i tutusa ai ma tama’ita’i-ae o le aganuu lava ia ma le faa-Samoa-o le tamaitai o lau Feagaiga e mu i ai mata o lona tuagane-e au foi le faa-malaia a le tuafafine! O se mea tatau la i le faa-Samoa le tau saili avanoa o tamaitai mo le faiga-palota? O le a sou taofi?

© Samoa Observer 2016

Developed by Samoa Observer in Apia