TALATU’U O AMOA

237 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer

 

Fai mai suesuega a Papalagi- o Amoa e aofia ai ni nuu mai sauté i matu e pei o: Sa’asa’ai, Saipipi, Lano, Asaga ma Pu’apu’a. Fai mai sa faailoa atu ia i latou e faapea o tua ane o Pu’apu’a, sa i ai se nuu e igoa o Leno.

O Lano o loo i ai le malae o “Matofa; ” e fai si mamao o isi nuu mai isi nuu ma e umi se taimi e savali ai se tasi i totonu o lenei vaega-eleele. O Pu’apu’a  lava ia o se nuu tele ma ua vaevaeina i ni vaega se tolu:-o Safou, Lusia ma Fogaseuga i (sauté); o le telē o Pu’apu’a pe kuata itula e te savali ai i luga o le matafaga.

O Lusia ma Fogaseuga e tele foi ni minute e te savali ai i lo la va; ma e vaeluaina e se taufusi lea foi o loo i ai se vai lelei. A fua la i le tele o faafanua o loo faamaumau ai Amoa, e aliali mai e peiseai o Pu’apu’a e tuto’atasi lava ia. O le itu i matu o Pu’apu’a o loo i ai se vaomatua e tolu ma le ‘afa itula le lautele, lea e va ai ma Lealatele.

O Pu’apu’a o loo ta’oto i luga o se matafaga; o lona aloalo ‘amu’amu e tumu i le togo- ia e matua lapopo’a lava e pei o ni laau tetele; ma e tutū i le ogatotonu o le aloalo.O le pogai lea a e vaai i ai, e pei lava o loo sua le tai i taimi uma. O loo faafeagai Pu’apu’a ma le avaava e igoa o le ‘Ava o I’aeva’. O le ‘Ia eva’ e faasino i le ‘anae oso mai Fiti’, e tusa ai ma talatu’u a Fiti ma Manu’a. O loo i lea foi nofoaga le ‘Vai o ‘Ae’ lea na fasioti e Tigilau.

O Fogaseuga i Pu’apu’a- e na o le lima minute mai Asaga lea o loo vaevaeina i ni vaega se lua- e se vai e tafe i taimi uma e tusa ma le 10 mita le lautele, e igoa o ‘Matavai.’ O le sefulu minute i saute o Asaga o loo i ai Lano lea o loo si’omia e le tele o aloalo.

E lua foi vaega ua vaevaeina i ai Lano, e sefulu minute le va-ae ou te le iloa o latou igoa tonu. O sauté o Lano o loo i ai se matafaga -e papa i nisi taimi ma matomato, o le luasefulu minute mulimuli ane ai e te taunuu ai i se tolotolo papa ma se vaieli matagofie. O loo faafeagai ma lea tolotolo  se faga oneone pa’epa’e o Saipipi (ma se aloalo tele faa-taufusi) lea e mafai ona uia i le lima minute. A uma ona e asia lea tolotolo papa, ona e taunuu le i Sa’asa’ai, o lona falesa manaia ma se malae tele o loo i totonu o se faga itiiti, e pei o Saipipi, Saasa’ai lea e soso’o ma Salimu i Faga. 

E le o mafai ona maua le afuaga moni o le igoa Amoa, ae fai mai Misi Tana i le faagasologa o osofaiga mai Tonga, o iinei  sa i ai le ‘Olo o le Alii Tonga o Moa; ae faapea foi le isi tala o le tamaita’i o Moa mai Fiti na faaipoipo i lenei nofoaga ma le alii o Nonu.

O loo taua foi e Misi Tana fai mai o aso ia i Amoa, sa aumoe tamaitai i alii. Ae tusa ai ma le mau a Misi Situpe, fai mai o le Nu’u lenei -e atua i le Faititili- talu ai na avatu e se tasi ana meatotino i le Faititili e fai ma ona puipuiga. Fai mai Misi Situpe- o le tina o Saolevao e igoa o Fuluulaalefanua, o le tamaitai mai Amoa.

O Amoa la ma Tufu Gataivai ma Salailua e aofia i le Aiga o Tuiaana; e pei foi o Lealatele ma Asau i Savaii. Fai mai la Upu Taoto o Amoa: “Tulouna ia Oe Salemuliaga;” “Tulouna Oe Luapule o Lepuleale’u’u ma Sealiimalietoa,” “Alala mai Oulua Matua Fetalai o Segi ma Malae’ulu,” “Afifio mai Usoalii Faafeagai,” “Tulouna Lau Afioga Tofa,” “Tulouna lua Afioga o Vaafusu’aga ma Toleafoa;” “Tulouna lou Ma’upu o Lau Afioga Su’a;” “Tulouna le Aiga Sa Tuala;” “Tulouna a le Ta’a-uso o Vui, Matafeo, Vaiouga ma lo Outou Matua o Lemalu;” “Tulouna lo Outou Ma’upu o Lau Afioga Falenaoti,” “Tulouna lau Afioga Peseta.” “Afioga mai lau Afioga Punalefutu.”

TAFUA:  O se nuu itiiti lea i le itu i saute o Salelologa, e lata i le sami i le pito i saute o le Mauga o Tofua. E tusa ai ma faamaumauga a Misi Palate, o tafua o se igoa leaga lea e faasino i tagata amio pa’a’ā. O ona upu ta’oto e faapea:- “Tulouna Oe Toiloto;” “Afio mai lau Afioga Tofa; “ “Susu mai lau Susuga Sa’u; Susu mai lau Susuga Nonu; Susu mai lau Susuga Lei’ataua; Tulouna lau Susuga Taito ma lau Susuga Togafau; “Tulouna a Le’ulu ma Lemaota.

© Samoa Observer 2016

Developed by Samoa Observer in Apia