Fa’aaliga a le ‘Aufai-Fa’ato’aga i Savai’i

21 December 2015, 12:00AM

Ripotia e Deidre Fanene

Fa’aliliu e Maiava

 O le Aso Faraile talu ai, na fa’ataunu’uina ai i le Fa’aaliga Fa’aleTausaga a le Matagaluega o Fa’ato’aga ma Faigafaiva, i le Maketi i Salelologa i Salafai.

O lea fa’amoemoe, sa tapenaina lava e le Matagaluega, ia avea o se ‘auala e fa’aosofia ai le naunau o le ‘aufaifa’ato’aga e fa’alauiloaina fua o fa’a’ele’elega e le gata o fa’ato’aga i tua-maota ma laoa ae fa’apea fo’i atina’e fa’a-faigafaiva i le gataifale. 

I le saunoaga ‘autu o lea fa’amoemoe, na ta’ua ai e le Palemia, Tuila’epa Sa’ilele  Malielegaoi, e le na o le fa’alauiloa o fua o fa’ato’aga- ae una’ia ai fo’i le mamalu o le aufaifa’ato’aga i Salafai, ina ia to’a’aga pea e galuea’ina fa’ato’aga mo le manuia o aiga. 

“O le sini-‘autu o le fa’aaliga i lenei tausaga, ‘o fa’ato’aga ma faigafaiva, o le lumana’i o aiga, nu’u ma le atunu’u,”

 “E le gata la i le fa’alauiloaina o galuega a le ‘Aufaifa’ato’aga, a’o le una’ina fo’i o latou, o lo latou lumana’i manuia lea...e ala i le totoina o fa’ato’aga ma so’o se la’au e aoga, e maua ai tupe.

E anoanoa’i fua o fa’ato’aga sa fa’aalia i lea aso, e o’o lava i la’au aoga o lo’o totoina i fanua o aiga – o fuala’au taumafa-mata, fuala’au fai-sua ma isi.

Na fa’amae’a le fa’aaliga lea i le Aso To’ona’i i tufatufaga-fa’ailoga. 

Sa lagolagoina lea fa’amoemoe atoa e le kamupani Oloa Si’i-Atoa a Ah Liki, sa fesoasoani atu ai mo fa’ailoga tupe e ($3,000.00) ma isi fa’ailoga fa’ameaalofa e $4,000.00 mo le mamalu o le ‘Aufaifa’ato’aga sa ‘auai.

21 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>