O le Mau a Pule - The Mau Movement

21 December 2015, 12:00AM

Tapena ma Tuufaatasi e Fuimaono Na’oia Faasavalu Touli F.Tupua mo le Samoa Observer.

O LE ASO TO’ANA’I POGISA-

Faaauau mai le Aso Gafua talu ai.

O le Mau a Vaimoso sa aga’i ane i matū i le ala i Fugalei lea e oso i totonu o le taufusi i Savalalo-ona faatoa taunuu ai lea i le pito i sisifo o le Ala i luga o le Sami i Sogi-o le amataga lea o le Penisula i Mulinuu.

E latalata ane i le fetaulaiga o ala- sa i ai se fale tele o Siamani-lea sa avea ma nofoaga autu o le Reparation Estates poo le Faleoloa o Siamani-ae o lona itu i sasa’e- sa i ai le uafu o le Ofisa o Tiute ma Fale o le Ofisa o Tiute.

O le Ala i Luga o le Sami ma faagasolo atu ai i le pito o le Taulaga i Apia-sa i ai se matafaga e malu puipuia e se a’au, ma faasolo atu ai lava i se kilomita e tasi i sauté sasa’e-se’ia pa’ia le fetaulaiga o ala ma le Falealili Street-ona toe liliu ai lea i matu sasa’e i le fetaualiga ma le Falealili Street-ona toe liliu ai lea i matu sisifo e agai i le Taulaga- i le gutu o le Vaitafe o Vaisigano- lea o loo i ai se ala laupapa e fesoota’i ai ma Matautu -ma le ala autu i sasa’e.

O le Ala i luga o le Sami mai Sogi i le Ala i Falealili-o le nofoaga autu lea tau fefaatauaiga i Apia. O le itula e 1:15 i le taeao na savali mai ai le vaega a Vaimoso, ma faasolo atu agai i le Uafu o le Tivoli lea e i sisifo o le fetaulaiga o ala o Falealili ma le matafaga, sa latou pasia le Ofisa o le Fale Tiute ae vaaia ai loa e Braisby Mata’utia.

Na ia tuuina atu lea faamatalaga e alaiI se telefoni i le nofoaga o Leoleo-ona toe liliu lea o lona tua i le mea o le a tupu- ma auai ma isi alii ofisa o le a o atu i le Lady Roberts. E  ui lava ina faapea o le a tula’i mai se  vevesi, ae na tonu ia Braisby e faatino ona tiute tau pulega -lea e aofia ai le sailia o ava oona i luga o le vaa.

O le tino malepe mata’ina o se vaatau Siamani o le Adler i luga o le a’au, o se faamanatu lea o le Afā fulifaŏ malosi, ua punitia ai le vaai atu ia i latou o i luga o le vaa o loo matamata mai i le matafaga ma solo a le Mau o loo savavali atu.

O le itula e 6:20 i le taeao na taunuu ai le Mau a Vaimoso i fafo ane o le Faletele o le Maketi; lea e tusa le mamao ma le lua o vae tolu o le ala i luga o le Sami- e aga’i atu i le Uafu o le Tivoli. O le vaega mai Matautu o loo i luga pea o le isi itu o le vaitafe o Vaisigano.

O le Fale Tele o le Maketi e le o se fale e tele na’ua. E faasolo i tua  ane o le nofoaga o Leoleo, lea e faafeagai tonu ma le Ala o Ifiifi- lea e tau mai ai i se fesootaiga e pei o se mata’itusi o le T ma le Ala i luga o le Sami.

O le tulimanu i sisifo, e latalata i le auala, sa i ai le fale laupapa fogafale-lua o le aiga o Hellesoe. O le fogafale i lalo sa i ai se faleoloa a’o le fogafale i luga, faatasi ai ma ona poletito, e nonofo ai le aiga.

O le tulimanu i sasa’e- o le fetaulaiga o ala-lea  sa i ai se ofisa tau le pulega, o se fale fogafale-lua na fausia e Siamani. O le fogafale i lalo o le Fale Faamasino a’o le fogafale i luga sa i ai alii o le pulega, e aofia ma le Pule o le Pulega.

O le nofoaga o Leoleo pe na o le luasefulu mita i tua i le agai i Leifiifi mai le fetaulaiga o ala. E fogafale lua foi-o le vaai mai le fogafale i luga o le ofisa o Leoleo i le ala i Leifiifi- e punitia i le fale o Hellesoe ma le ofisa tau le pulega.

O le itu i sisifo o le fale o Hellesoe-sa i ai  se poletito o le ofisa o Leoleo e mafai ai e se tagata ona vaaia le fale tele o le Maketi ma se vaega o le Ala i luga o le Sami. O tua ane lava o le ofisa tau le pulega ma luma ane o le nofoaga o Leoleo-sa i ai le malae o Apia-o se malae lanu lauava lea e si’omia e fale.

O Waterson ma Fell sa tutū i fafo ane o le fale tele o le maketi ma autilo Mata’utia.

Fai mai Waterson mulimuli ane -sa le mafai ona ia vaaia o ia-ma o lea na amata ai loa ona savavali faatasi Fell ma isi leoleo e to’atolu ma le ulu o le solo- e tau autilo Mata’utia, ma taofi ai le pese a le faaili-pu sa ta.

Sa faalatalata ane leoleo a le Mau i tala ane o le faaili ma le tagata sa ta’ita’ia le solo.

O luma ane o le faleoloa o Andrew i le itu i sasa’e o le Ofisa Tutotonu, fai mai Fell na ia vaaia ai le tagata o loo ona sailia- i le laina pito i tua o le faaili i le itu i tai, ma o lea na faafuase’i ai ona ia oso i totonu o le faaili ma pu’e loa Mata’utia i le kola o lona ofu.

Ona togi atu lea o lona lima i lona ua-ma taumafai e toso ese o ia mai le alatele a’o taufetuli atu  Fell ma Leoleo e fesoasoani.

Ae peitai, a’o taumafai Fell e toso Mata’utia-e to’atele tagata o le solo na sasaina le ua ma le tua o Fell-ma palasi ai i lalo ma matapogia, ae o loo tamo’e mai pea Waterson i tua-ma- na pu’e ma titina e ni leoleo se to’alua o le Mau ma taatiatia ai lava Fell i luga o le eleele.

“Na ‘ou vaai atu o sasa e se tagata o ia a’o taatiatia o ia i luga o le eleele, o le faaaliga mulimuli ane lea a Waterson.”Ou te le iloa poo le a le mea na sasa ai. A’o taofiofi ma titina lona fa’a’ī, na se’i e Waterson lana fana puupuu i fafo ma ta’i lana fana i se tasi o alii o loo taofia o ia.

Ina ua oomi e ia le amoti o lana fana-e le’i pa,- o lea na togi atu ai e Waterson lana fana i mata o se tasi o taofiofia o ia ma sola ese. Na taunuu Waterson i le mea o I ai Fell ma taumafai e toe faatu o ia i  luga.!

E toe faaauau atu I lea Aso Gafua!


21 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>