“Seki a Samoa,” Lui Tevaga

By Vatapuia Maiava ma Sarafina Sanerivi 21 October 2016, 12:00AM

E mau ese’ese lava le atunu’u pe a fesiliga i le tulaga o iai le soifuaga i Samoa i lenei vaitau. 

O nisi ua fa’ailoa mai ua faigata lava le soifuaga ua iai i lenei vaitau. 

Ae peita’i ina ua fesiligia le tamā ia Lui Tevaga o Falelauniu i le aso ananafi, na ia fa’ailoa mai ai, o lo’o sologa lelei lava le olaga ma le soifuaga i Samoa nei. 

O le tamā ia Lui e 32 ona tausaga ma o lo’o nonofo ai nei ma lona to’alua ma le la fanau fa’atai ai ma ona tua’a i Falelauniu. 

E fa’ato’a lua masina talu ona alala ai Lui ma lona aiga i le latou fanua fou i Falelauniu. 

Na ia fa’ailoa mai i le Fofoga o Samoa, o lo’o lelei lava le soifuaga o tagata Samoa i lenei vaitau.

“O lo’o to’afilemu lava le olaga i Samoa nei. 

“A fa’atusatusa ai i le fevatau ai o tagata o lo’o i atunu’u mamao, e sili ai lava le olaga o Samoa.

“E le pei le vevesi o Samoa o le vevesi ai o nisi o atunu’u tetele e pei ona tatou matamata atu ai luga o TV ma initaneti. 

“O le tulaga lena e numera tasi ai Samoa ia te au lava ia i le nofo. Pe a ma a le tele o tupe e maua i atunu’u e mamao, e sili lava ia te au le nofo ma ola ai i Samoa.”

Ae peita’i na ta’ua e Lui, e ui foi lava i le to’afilemu o Samoa, o lo’o iai foi lava nisi o tulaga e mo’omia le fia fa’aleleia. 

“O le tulaga lea i amioga a nisi o le tupulaga. 

“O iinei i lenei nofoaga, o le fa’afitauli lava lea o lo’o ou maitauina. O le to’atele lava o tagata, e onana loa ua feofeoa’i solo i luga o le auala ma fa’atupu vevesi ai. 

“Ae maise lava i le fa’aiuga o le vaiaso. E omai la fa’aumu i luma o fale o aiga ma pisapisao solo i luga o auala. 

“O le popolega ia te a’u, ona e iai la’u fanau teine toe o lea matou te nonofo fa’atasi ma nai ou matua. 

“O nei fo’i tagata, e le’o iai lava se mafaufau a mea o lo’o nisi o le mamalu o le atunu’u o lo’o nonofo ai i lenei nofoaga. A o’o a ina pisa pei a lae pisa i le togavao.”

Na ta’ua foi e Lui, e faigata tele ona fa’atonutonu se tagata e fa’asua’avā.

“Auā a fa’apea foi la ou te alu atu ma taumafai e fa’afilemu, e uma ifo ua tupu ai se vevesi, ona molia loa lea o taita, ae le molia le tagata o lo’o ‘onā.”

Ae peita’i na taua e Lui, o lo’o sologa lelei pea lava le olaga i Falelauniu ma o lo’o faigofie le olaga i Samoa i le vaitau nei. 

“O lo’o seki a Samoa ma le olaga i le taimi nei.”

By Vatapuia Maiava ma Sarafina Sanerivi 21 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>