E leai ni manuia e maua ma le filemu

Tusia Vatapuia Maiava ma Ilia L Likou ,

171 Hits

Fenika Fenika

Fenika Fenika

O le talitonuga o Fenika Fenika, ‘afai ua si’i i luga le tau o le soifuaga e tatau fo’i ona si’isi’i atu ai ma le minoi i vaega uma e mafai ona tausia ai le aiga.

O Fenika o se tamā, 33 le matua o le soifua o le afio’aga o Tanumalala, ma o ia fo’i o se tausiaiga, fai fa’ato’aga ma e to’aga fo’i e fagota.

“Ia o le leai lava o nisi o le ma aiga e avea le  fuala’au aga’i i le maketi , o le itu lava lena  ua o ma titilo atu ai i se auala ina ia mafai ona faigofie ona maua ai se tupe i le itu lenei o le atunu’u, lea la ua fa’atau ai lava i luma o lo ma fale fuala’au nei.

“O le lauele’ele ma le pito o lo’o o ma i ai i le taimi lenei ia ou te ta’utino lava a’u ia o lo’o sologa lelei mea uma, ae e i ai lava fa’afitauli i mea tau fa’ama’i.

 “Ia e le’o nofoa’i a’u nei ae o lo’o fai ma alu i a’oa’oga o lo’o mafai ona maua mai ai le fesoasoani ma le    malamalama ina ia faigofie ona ou iloa  nisi o tulaga e ao ona fa’atinoina e tete’e atu ai i le mau fa’ama’i.

 “Ia o le tulaga lava lea o lo’o i  ai ou te le vaivai, sa ou faigaluega ae na ou iloa lava e telē le ese’esega o le tupe e maua e le tagata faigaluega ma le galue ai i tua o le aiga i le faiga o le fa’ato’aga ma tulaga uma nei.

“Tusa o le ‘ese’esega ma i matou nei, ia e manino aua o le tagata faigaluega e sau le totogi i le lua vaiaso ia fa’atoā mafai ona maua se tupe e u’u i le to’atele lava o e galulue, se’i vagana le tagata e maualuga sana galuega.

 “Ae o matou ia o aso uma lava.

Na ia fa’ailoa a o’o ina fa’atali le taimi e selesele ai le tele o fuala’au ‘aina ona alu lea ua fagota.

“Ia e manatua o le tele o mea tōtō e fa’atali i le tolu masina, ia o le tele lava a’o talia le tolu masina e mafai ai ona selesele mai le fa’ato’aga kapisi ma nisi o fuala’au e mafai ona ou alu fagota e kava mai ai le tolu masina.

“Ia o le fa’amoemoega lava ia ola lelei le fanau. 

“O le tele lava o tupe e  maua i le aso e tusa o le $30 i le $50 i le aso, ia o a’u fo’i ia e pule lava a’u ia i le taimi ou te usu ai i a’u asi la’u fa’ato’aga.

“Ae ou te tago lelei fuafua le faiga o a’u galue  i aso o le vaiaso, ia pe ta le valu pe o le iva ua ou alu i tua i le fa’ato’aga i nisi o aso, ae o le tele o aso e fai lava sina malologa ma o le tulaga lelei fo’i o le fai lava o lau fa’ato’aga e pule lava a’u ia i a te a’u.

Na ia ta’ua nisi o atugaluga o lo’o feagai ma ia i le tele o taimi.

“O le tau o talo o lo’o tumau lava, a fa’atau sa’u meamata e le tele, ae tele lava i lo’u mafaufau o le ‘ai , ae o a’u e sili le fagota ma galue i fuala’au nai lo le fai o le ma’umaga. 

“E le pei o le i’a e  ese’ese le tau e mafai ona e fa’atauina ai, e tusa e $30 i le $40 pe sili atu fo’i ae o le meamata ia e leai se mea fa’apena e mafai ona faia i ai. 

© Samoa Observer 2016

Developed by Samoa Observer in Apia