O LE TOGA A ALAI’ASA O FALEFA

21 August 2016, 12:00AM

Mai le Tusi o le “Suaga a le Vaatele”

I aso anamua-e i ai le mea na tupu-o Tupuola ua sopo-tofaga i le faletua o So’oa’emalelagi. Ona fai lea o lona faasalaga-‘ua oso ma le lau’- e pei o tulaga faale-atunuu i mea o faasalaga.

Ua le gata ina ‘oso ma le lau’-a ua faato e sa ona toe nofo i Leulumoega-a ua faatafea faitalia o ia ma se mea e aga’i i ai. Ona alu lea o Tupuola ma lona faanoanoa tele poo ai ana lavea’ina lona puapuaga. 

Ona tonu lea ia Tupuola e sili ona sulu i Aiga-atonu e ono maua ai se fesoasoani i lona puapuaga. 

Ona sulu ai lea i Lotofaga i le Aiga Salevalasi, ae fai mai le afioga a Salevalasi le Aiga Pa’ia-“Tupuola, e faigata lau mataupu na e o’o mai ai. E faigata foi ona gagau le la’au o mata-ae sili ona talitali laofie se’ia o’o i se isi taimi-ona fesoasoani atu lea o Salevalasi i lou puapuaga. Peita’i ane-ua le fiafia Tupuola ma ua toe saili fo’i. Ua saili ia Safenunuivao i Falefa-ae teena foi-ona o le faapea-‘e le’i i ai ni aso’ talu ona alu ese Tupuola mai Leulumoega. 

Ona sulu loa lea i le Aiga Sa-Alai’asā- lea na lavea’ina ai lona puapuaga. Ona saili ai lea e Alai’asa ni tagata malolosi e fai ma ona ‘auva’a ma o lana ‘au-tau foi lena. O tagata Saleapaga e ta’ua o le “Gautaala”. O le pine o lenei mau-e i ai le matai o le Gautaala e igoa ia “Talitalilaofie” e faamanatu ai le tuleiga a Salevalasi- se’i faatali se’ia o’o i se aso. 

Ua faae’e le vaa, ua sau le va’a mai Atua o le a alu i Aana ma le manatu o Alai’asa, na o ia ma lona ‘au-vaa o le “Gautaala,” ae vaai atu i tua -o nofo mai ai Iuli. 

Na o Iuli lava le tulafale sa mulimuli i le malaga a Alai’asa. O le ala lea o le ta’ua o Iuli-“o le Tulafale o le Aiga o Sa Alai’asa-aua e na o ia lava sa mulimuli i le malaga a Alai’asa. Ua alu le malaga ua tau atu i le pitonuu mai o Leulumoega-ona faapea lea o Iuli-“Se Alai’asa”-e a ‘ea pe a tatou afe ia i Falesama- e faigata o loo tumu Leulumoega i Nu’uausala?” Tali Alai’asa-“O Falesama o i ai ni a, a’o Nu’uausala foi o i ai ni a?” “Tatou o, sunu’i, a ua tau-tau ai pea. 

Afai e talia, o le a leai se taua-ae afai e le talia le pagota lenei, o le a tau le taua o Tupuola.” 

Sa faapea lava ona fai. E vaai mai Leulumoega o loo tumutumu i Nu’uausala, ua sunu’i lava le taumua o le vaa i Nuuausala. Sa velo loa le Tao o Alai’asa ma ua tu i le pogai-niu. O le pogai tonu lea o le igoa o le “Toga a Sa Alai’asa”o le “Pa’uniu ma le Faatu-Tao”- e faamanatu ai le Tao lea na velo i le pogai-niu. 

Ona uma lea o lena mea-ae faaulufale loa e Leulumoega ma sa’i ia Alai’asa ma lona saua. 

Ae ui o lea-fai mai Leulumoega-“Alai’asa, o le a tali lau malaga ae tanu pea le tiga o Leulumoega-o i o le a fasi ai Alai’asa. Peita’i ane-ina ua fai le Taufolo, sa faapea atu Alai’asa-“Togi atoa mai le Puta.” 

Na ona togi mai lava tago atu loa Alai’asa folo atoa. E vaai atu tagata, e ese lea tagata-e itu-lua. Ona faapea loa lea o Leulumoega-“Ua ola le pagota”-Alai’asa. Ua lua au mea tetele ua fai-‘o le veloga o le Tao-toe folo atoa le puta’, o le a avea Oe-“O lē na fitā-i-tuga”-ma lau Toga o le “Pa’uniu ma le Faatu-tao”- e faamanatu ai le Tao na e velo tu i le pogai o le niu, ma le puta o le taufolo na e folo atoa. 

O lea e matau atu foi-e leai lava se isi aiga, e le o afio mai Salevalasi, e le o afio mai Safenunuivao, ae na o lau Afioga Alai’asa. E le tioa-e tasi lava lou va’a, e tasi foi le Aiga, ma ua tatau ona faa-igoa oe-o le “Vaasi’itasi.”

 


21 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>