To’amalie pea ma tumau le matagofie o Samoa

Tusia Vatapuia Maiava ma Fa’aliliu e Maiava ,

135 Hits

S.T.A.: Dwayne Bentley.

S.T.A.: Dwayne Bentley.

O lo’o tumau pea le fa’atuatuaga o Dwayne Bentley, le ali’i o lo’o feagai ma le fa’alauiloaina atu o Samoa, o se nofoaga lelei mo tagata-asiasi maimoa mai le lalolagi.

E ui fo’i i le tele o se fa’aletonu na alia’e mai i le  polokalame o le 60 Minute – lea na malelelele atu ai le fa’amalosia o se tama’ita’i asiasi mai Ausetalia e se pagota Samoa ma vali-uliuli ai le suafa pele o Samoa, ae o lo’o tumau pea le talitonuga o le Ali’i-Pule mo Vaega o Maketi a le Pulega o Tagata Tafafao, ma manino lana fe’au e momoli atu i le lalolagi.  

O le fe’au a Dwayne, “O Samoa ‘Aulelei”, o lo’o tumau pea ona avea o se nofoaga matagofie e asiasi mai iai. 

 “E le natia le mea moni, e ave pea le lagolago ma le agaga fa’amaise a le Pulega o Tagata Tafafao i si ulugali’i Ausetalia lea na afaina i le tausaga talu ai.,” o le fa’aaliga lea a Dwayne Bentley i se feiloa’iga ma sui o le Samoa Observer.

 “Talosia ia vave maua so la to’amalie ma ‘ave’esea loa le toe manatu i lea tulaga faigata sa o’o iai e ui e matua faigata lava ona o la fa’agalo.” 

Na ta’ua e Dwayne, e fa’anoanoa lava ona o le mea na aliali mai i le faletalimalo o Lupesina Tree Resort ma e matua malamalama lelei i lagona e tutupu mai ai, o le ‘ino’ino ma le le-fiafia ona o ia faiga fa’anu’upo.

“E leai lava se isi tali e toe faia i le mea na tupu. Ua matou iloa, ua fa’amaonia le solitulafono a le na tu’ua’ia ma o le a lau lona i’uga i le Aso 22 o Iulai.”

Peita’i o le osofa’iga lea, o se fa’amanatu lelei, o le le-talia lava lea o se fa’aletonu fa’apea pe a manatu i le malu-puipuia ma le saogalemu o so’o se tagata soifua.

“Tele suiga ogaoga ua faia ma o le a fa’aauau pea ona fa’atinoina e itutino ‘ese’ese o le malo, lea sa fa’amanino au’ili’ili atu e le Vaega o Fa’amatalaga Fa’alaua’itele a le Malo i le aoauli ananafi.

“O nei fuafua uma, e le gata o le fa’amautuina lea o le saogalemu o o tatou tagata ae fa’apea fo’i malo asiasi mai i Samoa.” 

Na fa’ailoa e Dwayne, o ‘Ausetalia, o le maketi lona lua lea le tele mo tagata tafafao mai i Samoa. A’e talosia, o le a tele na’ua se a’afiaga o le a iai ona o tala-mata’utia ua salalau atu nei i le lalolagi aoao.

“O Ausetalia se tasi o maketi ‘autu mo tatou nei,” o lana fa’aaliga lea.    

 “Sa’o lelei, o lo’o tulaga lua ia Niu Sila; o se maketi ua fa’asolo atu ina taua i le lima tausaga talu ai ma e talitonu o le a manuia ai le atunu’u.

“Ae fa’anoanoa ai lava ona o se fa’aluafesasi fa’apea i a tatou taumafaiga e fa’aolaola le maketi lea i Ausetalia. Ae o le a taofia ai lava tatou mai le taumafai pea e fa’atosina mai tagata ‘Ausetalia e asiasi mai i si o tatou atunu’u. 

“O le mata’upu fo’i lea, ua manino mai ai le fe’au sa matou taumafai ai lava i le tele o tausaga ua mavae, ma o le atina’eina o tagata maimoa mai i Samoa, o le matafaioi a Samoa uma.”

O le tulaga lea ua amata ai i le taimi nei, se fuafuaga e si’itia ma fa’amautuina le malu-puipuia o tagata asiasi mai fafo, fa’apea fo’i tagataSamoa uma. 

 “E o’o fo’i i le Afioga a Sala Fata Pinati, lea e le’i leva nei ona tofia e avea ma Minisita mo Tagata Maimoa, ua ma’ea ona fa’ailoa mai, o le a galulue so’o-so’o-tau’au nei le Matagaluega o Leoleo ma le Pulega o Tagata Maimoa mo le fa’alauiloaina o se polokalame e ta’ua, ‘O Samoa Saogalemu”.

Ae mo le tala’ave ua alu-atu i tala o le lalolagi, na ta’ua e Dwayne: “Ua malama i ulugalu ma ua so’oso’o fo’i le atu-laulau,” o lana fa’aaliga lea.

“Ua faigata lava ona toe-pu’epu’e mai o le ipu-susu ua masa’a; ma ua feso’ota’i atu fo’i i nisi o pa’aga o le alamanuia nei o turisi, lea o lo’o tau-fuafua iai, se tulaga talafeagai e tau-tu’u-mamaina ai lenei mamafa ua tau’ave e si o tatou atunu’u pele.

 “E mautinoa lava o le a matua fita atili ai ma faigata la matou galuega o fai nei, peita’i o le a le-fa’avaivai ai, o le a tamafai pea e galulue ina ia toe fa’amalie ma fa’amautu finagalo afaina o nisi o pa’aga i Samoa nei ae maise fo’i pa’aga i fafo.

“O le a fa’aauau pea ona matou fa’alauiloa atu lo tatou atunu’u, le Samoa ‘Aulelei ma Matagofie e ui ua iai se ila i lenei fo’i vaitau o le soifuaga ma e ui lava i ia faigata, ae tumau pea Samoa ona avea o se atunu’u to’afimalie ma saogalemu mo tagata asiasi mai fafo.”

© Samoa Observer 2016

Developed by Samoa Observer in Apia