Fa’amaonia le taumafai e fa’ao’o le oti

By Lanuola Tusani Tupufia 21 July 2016, 12:00AM

Ua molia nei i le taumafai e fa’ao’o le oti, le ali’i-pagota o lo’o tu’ua’ia i se osofa’iga mata’utia i le tausaga talu ai, lea ua matua afaina ai foliga o se tina mai Fale’ula.

O lo’o molia fo’i lea lava ali’i i le umia o se ‘aupega mata’utia, ma ua fuafua o le a lauina lona i’uga i le masina fou. 

O lea mata’upu sa fa’amaonia mai e le Fa’atonu o le Ofisa Aoao mo Moliaga, o Mauga Precious Chang, e tali ai i fesili sa tu’uina atu iai e le Samoa Observer.

 “O lo’o molia le ali’i lea i moliaga o le taumafai e fa’ao’o le oti ma le umia o se ‘aupega mata’utia,” o le fa’aaliga lea a Mauaga. “Sa ioeina lava ona moliaga uma i le Aso 06 o Iulai 2016 ma o le Aso 08 o Aokuso o le a lauina ai lona i’uga.” 

O le ali’i sa fa’ailoa atu ia Maria Tupuola, o ia o Ray, e lauiloa i lona igoa o Taumata Bragovits. 

I le itulau pito i luma o le Samoa Observer ananafi, na fa’atoa fa’ailoa fa’alaua’itele ai e Maria le osofa’iga o ia, lea ua matua suia ai lona olaga e o’o i le fa’avavau.

Na ta’ua e lea tina e to’alua le fanau, e fa’afetai lava i lona atali’i o Willie sa fa’asaoina ai lona soifua mai le osofa’iga i luma-maota o le Malumalu o le Ekalesia Katoliko i Fale’ula.

Na ta’ua e le tina lea, e  le mafai lava ona ‘ave’esea ma lona mafaufau, mai le aso lea ma le mea na tupu ai, ma ua matua nofo popole ai lava, ua leai sona talitonuga i tagata ae maise le leai o sona sa’olotoga i taimi uma. 

O le na osofa’ia lea tina, o se pagota sa taumulimuli ma tulitulia pea lea tina i luga o le telefoni ma fe’au-tusitusia e tu’uina atu iai.

Na ta’ua e Maria, pe ana lelei lava leoleo, e utagia si ana talosaga sa tu’uina atu iai, semanu e le tupu lenei fa’alavelave ia te ia.

O lo’o ia tu’ua’ia lava le pulega ona o le le-taofiofia lelei o le pagota i le falepuipui, a’o iai lo latou avanoa. 

“Ina ua ‘ou fa’alogo ua tatala i tua le ali’i lea, sa ‘ou talosagaina lava leoleo ona o lo matou saogalemu ma si a’u fanau,” o lana tagi-talatala lea.

“Na fai mai ia te a’u, e leai se mea ‘ou te toe popole ai, ua matou saogalemu, ae sa tatau lava ona fa’alogo mai i sa’u talosaga na tu’uina atu …se’i silasila mai la i le tulaga ua iai nei.”

By Lanuola Tusani Tupufia 21 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>