O le a maimoaina e le Atu Fagaloa le fusu’aga a Parker i le TV3

Tusia Fa’aliliu e Maiava ,

113 Hits

O le a mafai e le mamalu o le atunu’u o lo’o afifio ma papaa’ao i le Atu-Fagaloa, ona maimoaina le fusu’aga o lo’o fa’ananau iai i le po nanei i le TV3, i le va o le alo o Samoa, Lupesoli’ai Joseph Parker ma le ali’i-Tonga o Solomon Haumono.

O lea fa’aaliga fiafia, sa fa’asalalauina e le TV3 ananafi, ina ua mae’a se faiga fa’aPa’aga ma le  kamupani a le Digicel, lea e lagolagoina le fa’asalalauina tu’usa’o o lea fusu’aga i le TV3. 

O se vaega o lea faigaFa’aPa’aga, o le a talimalo ai le Digicel e ala i le fa’aa’ogaina o ana meafaigaluega o i le Faga i Fagaloa, ni fa’asalalauga a le TV3.

O lea faigaFa’aPa’aga sa faia fa’apitoa ina ia fa’asalalauina ai le fusu’aga a Lupesoli’ai.

O le ulua’i taimi lenei o le a mafai ai ona maimoaina ia fa’asalalauga i le Atu Fagaloa, talu ai se feutaga’iga a le TV3, le Ofisa o le Pule Fa’atonu fa’apea ali’i ma faipule o le afio’aga i Fagaloa. I ana taumafaiga, na sa’ili fesoasoani ai le TV3 i le kamupani a le Digicel mo le fa’aaogaina o a latou meatotino o lo’o iai i Fagaloa.  

 “O se fiafiaga tele lea mo le TV3, ona o le a mafai ai nei ona maimoa le mamalu fo’i o lo’o  papaa’ao i le Faga i Fagaloa,” o le fa’aaliga lea a le Ofisa Sili o le TV3, o Verona Parker.

“Matou te fa’afetaia ai lava faiga-Fa’aPa’aga ma le Digicel, ua mafai ai fo’i lenei la’asaga taua tele. O le to’atele lava o le atunu’u e maimoaina ma tapuai le alo o Samoa i ana fusu’aga, o se taunu’uga lelei tele lea mo tatou uma, ae maise lava i le taimi nei, o le taumafaiga a Joseph.”

E fa’apea fo’i le agaga fiafia o le Ofisa Sili o le Digicel, o Rory Condon, ona o le mafai ona fesoasoani atu mo le fa’amoemoe lelei.

“O se fiafiaga tele ia matou le faigaPa’aga ma le TV3, o le a mafai ai ona maimoaina e lea vaega o le atunu’u le ta’aloga a Parker i le TV. Sa alo lava le matou vaega e faia mea uma ina ia fesoasoani ai mo le ‘auina atu o lea ‘au’aunaga, aua le fusu’aga a Joseph Parker,” o lana fa’aaliga lea.

E  momoli atu fa’amanuiaga ma mo’omo’oga lelei a le Pulega a le Digicel fa’apea le TV3 atoa, mo le alofaiva o Joseph Parker ma lana vaega i le afiafi a-nanei. Ia manuia le fa’amoemoe mo le aga’i atu i le fusi o le lalolagi!

© Samoa Observer 2016

Developed by Samoa Observer in Apia