O LE POGAI O LE PUPǕ UA FAAIGOAINA O LE “ALOFA’AGA” I TAGA-SAVAII.

Tusia ‘Suaga a le Vaatele’ ,

286 Hits

Fai mai le Mau a Taga- e tele aso sa fuafua ai e le Tuitoga Asoaitu se osofaiga e faasaga ia Samoa. Peita’i-ua le faamoemoeina e le Alii se tagata Toga na te faafoeina lea fuafuaga. O lea na tonu ai ia te ia o le a aumai ona atalii e to’alua o Haliu ma Haluilui e folau taamilo i le motu o Savaii ma faatinoina fuafuaga uma e faataunuu ai lea faamoemoe.

Sa sauni loa vaa o tama ma folau aga’i mai i Samoa. Sa folau taamilo ia Savaii-peitai-sa le filifilia Taga e avea ma to’aiga o le osofaiga. Sa tonu foi i lo la taofi-e osofa’i muamua Taga-ona latou pulea ai lea o le ava-e avea ma tu’utaulaga o le Fua a Toga.

Ua toe faae’e le va’a o le a taliu. Ua o’o ane lo la vaa i le Tolotolo o Asuisui-peitai ua tupu ai le faalavelave. Ua fai si lata o le vaa i le tuāpapa ma sa faafuase’i ona pu’e le galu ma lafoia ai lo la vaa i luga o le papa. Ua la fe’ausi ma fe’ausi-peitai-ua malosi le galu ma le au.

Sa la taumafai pea ma ua la tau i le papa. Ua nutilili’i lo la vaa ma ua le toe mafai ona faasaoina.Ua taumafai nei tama e faaa’e i luga o le papa-peitai a pu’e mai galu o le pupῡ-ona taia ai lea o i la’ua ma toe pa’ῡ’ῡ i lalo. E umi se taimi o taumafai pea i la’ua ia a’ea le pupῡ -ma na i’u lava ina faamanuiaina. Sa taunuu i luga o le papa laugatasi tama.

Talu ai ona ua leva aso o finau i la’ua ma peau o le vasa, e le’i toe ano i le mea e ta’oto ai. Na ona taunuu lava i luga –ta’oto loa le tagata ia. Fai mai le tala o le mea lava na ta’oto ai le tama ia i luga o le papa-o loo i ai nei ni Pu se lua. O Pu ia o loo feula a’e ai nei le sami i luga- ma ua ta’ua i aso nei- o le Pupῡ. Ua fai sina leva o aso e le’i toe fo’i atu lava tama i Toga, ona sau ai lea o le Tuitoga Asoaitu e saili lana fanau.

Sa folau faa-taamilo i le motu o Savaii ae peitai-ina ua aga’i ane i gatai o Taga-sa na vaaia ai foliga o ni vaa malepe-ua lafoia i luga o le papa ma taatitia ai. Sa afe loa le Tuitoga i Taga e fia mau se tala i si ana fanau. O iina foi na faatoa faalogo ai Taga i sea faalavelave na tupu i o latou gataifale. Ae ui o lea-sa malaga loa le Tuitoga ma le nuu o Taga e vaai le mea e faapea na tu’ia ai vaa o tama. O le mea mata’utia sa matauina, e moni lava na sao tama i luga o le papa, ae peitai, o le mea na taooto ai tama-sa faapea foi ona maliliu ai.

O le mea tonu foi na taoto ai le tama ia, ua vaaia ai ni pu-faatali’oli’o e tau i le sami. Ona tutulu ai lea o le Tuitoga ma faapea ana upu-“E moni lava o si a’u fanau lenei ua malaia i le saua o lou sami Samoa, ae maumau e pe a na ‘ou vave mai teisi, semanu ou te faafo’i atu i la’ua i Togatapu mo se falelauasiga faa-Tupu. Ae ui o lea-ua ‘ou malie la te tao’oto pea iinei- e pine ai le la tautua ia Toga. “O le a ‘ou toe fo’i i lo’u nuu-aua ua ‘ou iloa le mea tonu e momoli mai i ai o’u alofa.

Ona faliu lea o le Tuitoga ma faapea atu i le nuu o Taga-“Ou te momoli mai o’u alofa i la’u fanau- ma le matagi mai Toga. Tou te faalogo foi  i le leo o la’u fanau i taimi uma lava e agi ai le La’i mai Toga. A faapea, ona outou iloa lea-ua momoli mai o’u alofa i la’u fanau. Ou te le toe manatu foi i se mea e leaga ai Samoa-aua si a’u fanau ua avea ma pine. Ua uma ia upu ona taumavae lea o le Tuitoga ma tagata o le nuu o Taga ma ua tuuvaa atu mo Toga. O upu taumavae e pei ona saunoa ai le Tuitoga-o loo o’o mai pea i aso nei lona moni ma le faamaoni. 

O le mau a Taga-se’iloga lava e agi le matagi mai Toga-ona faatoa faalogoina lea o le gogolo leo tele o le Pupῡ. Poo le a foi le mamao i uta o le nuu tele-e lagona lelei lava le gogolo leo tele o le Pupῡ. Fai mai le ‘au-matutua-a agi mai le matagi mai Toga-ma gogolo leo tele ai le Pupῡ-ona faapea lea-“Talofa  e i si Tuitoga- ai foi ua momoli mai ona alofaaga i si ana fanau.”

E molimau foi le toatele-e ui lava ina malolosi afā tetele talu ai o Ofa ma Valelia, e le’i mafai ai ona gogolo leo tele le Pupū. Peitai-o soo se taimi lava e agi mai ai le matagi mai Toga-ona faatoa gogolo foi lea ma leotele le Pupū. O le pogai lea o le faaigoa o le Pupū-o “Alofaaga.” O le aga’i i le Pupu i le itu i matu-o loo i ai se nofoaga ua faaigoaina o “Leatalua” Fai mai le mau a Taga o “Leatalua” o le faitoto’a lea i le ala puupuu e tau atu ai i le “Fafā o Saualii” i Tufutafoe.

O le talatuu a Samoa- o fea lava e tuua ai le malo pe usuia ai le fono-o le a aumaia o latou agaga e le Vaaloa-ona avatu ai lea i le Fafā o Saualii i Tufutafoe-ae  a i ai agaga e fia ‘a’au atu pe ui atu i uta-ona afe lea tuu i Taga- e ui atu ai i Leatalua i Tufutafoe. O iinei la e pogai ai le igoa o “Leatalua”poo le ala ‘alo i le Fafā o Saualii. O le vaaiga i Leatalua- o se ana e le telē na’ua. O totonu e to’a ai le suavai ‘ula’ula-masalo e pogai mai le tele o le lau-laau malili na to’ulu i ai i le taimi o afā e lua ua tuana’i atu.

E le’i mautinoa pe masani ona i ai se suavai i totonu o le ana pe leai- ae o le mau a le nuu e masani ona ave maimoaga i totonu o le ana. Peitai-e tusa ai ma le faamatalaga na tuuina mai, sa i ai se pa-ma’a i totonu. Fai mai a ulufale i totonu se tasi-e le umi ae tau atu i le vai-o lona loloto e gata i tapuvae, ona faasolo ai lea i se loloto e pau i tuli, ona o’o ai lea i se loloto-se’ia o’o lava ina e maulu-ona faatoa e o’o lea i le isi itu. A mae’a lena ona e savali lea i le pa’u matū.

E masani ona savavali tagata ma toe fo’i ona o le mamao i totonu poo ua tau le lava le ‘ea e manava ai. Sa faamatala mai ia te a’u se tala e uiga i se tasi taule’ale’a o le nuu o Taga na alu i totonu o lea ana i aso ua mavae- ma e le’i toe fo’i ane lava. E o’o mai i le taimi nei- e leai se tasi o le nuu na te iloa le mea tonu ua o’o i lea taule’ale’a-se’ia vagana ai le mea moni- e le’i toe fo’i ane. O isi mataaga e lua o loo i ai foi i lenei vaega-eleele o le “Lotofalelua’ ma le ‘Foe a Lata’.

Peitai-ua faaleagaina se vaega tele o ia mataaga e afā tetele o Ofa ma Valelia e pei ona aafia ai le atunuu atoa. O le nuu tuai o Taga e igoa o Fagaloa-e faafeagai tonu i le itu i tai ma le eleele e igoa o Lata. O foliga vaaia o Fagaloa-e ta’u mai ai- o se aai nofo ‘olo i aso anamua.

O Tia Seu ma tulaga fale o loo i ai- e fausia uma i le maa. O lenei ua faoa atoa e le vaomatua le nuu o Fagaloa. O le tele o atufalega ua solo i lalo ona ua mafulifuli i le tele o laau tetele sa ola ai. O le itu mata’ina o lenei nuu anamua- o le tele o ona fale ma ‘olo-sa fau i luga tonu lava o mato ma vanu. E faasaga tonu lenei nuu i le sami ma o ona auala savali uma –o pa-ma’a! (E toe faaauau atu)

© Samoa Observer 2016

Developed by Samoa Observer in Apia