Faasa tagata lautele mai le Su’esu’ega

Tusia Lanuola Tusani Tupufia ma Faaliliu e Seagaitumua Tupuola ,

142 Hits

Nafoitoa Talaimanu Keti ma le alii Tuilaepa Sa'ilele Malielegaoi

Nafoitoa Talaimanu Keti ma le alii Tuilaepa Sa'ilele Malielegaoi

O le Komisi Su’esu’e a le Palemene i le faatinoina o tiute fai o Alii o le Faamasinoga o le Faamasinoga o Fanua ma Suafa (L.T.C.) ua tapu ai tagata lautele. 

Na faamaonia lenei itu e le Sui Taitaifono o le Komisi ma le Sui Fofoga Fetalai foi lea o le Palemene, o Nafoitoa Talaimanu Keti.

O lea Suesuega o le a amata i le Aso Gafua a sau ma o le a faia i le nofoaga o le Palemene i le taimi nei-i Tuana’imato.E tusa ai ma Nafoitoa, e tele mafuaga ua tapunia ai lea fono i tagata lautele. 

 “E le mafai e tagata lautele ona faafogafoga i nei mea uma se’ia o’o ina mae’a le lipoti,” o lana faaaliga lea. “Matou te popole i tagata molimau ma lo latou mafai ona saunoa sa’oloto i le Komisi. O lea o le a matou faatali ai se’ia aulia le taimi e tuuina atu ai lea lipoti i le Palemene ma o le taimi lena o le a faailoa atu ai faa-laua’itele.” Na teena foi e le Sui Taitaifono se talosaga mo nusipepa ina ia auai i le faagasologa o lea suesuega. Ina ua fesiligia pe to’afia ni tagata ua uma ona faaalia lo latou fiafia e tuuina atu ni molimau e o’o mai i le taimi nei, fai mai Nafoitua sa toatele. Na te le’i tuuina mai se aofa’i. “O mataupu uma lava o le a maua mai le atunuu lautele ma le itu a Faamasinoga e aofia ai Alii Faamasino,” o le faaaliga lea a Nafoitoa.

 “Ae faatali se’ia aulia lenei taimi ona mafai lea ona matou faailoa atu mea uma pe a tuuina atu le lipoti i le Palemene.” Sa fesiligia foi le Sui Taitaifono pe o i le Palemene se paoa e tofi ai se Komisi Su’esu’e e iloiloina le galuega a le Faamsinoga o Fanua ma Suafa. Fai mai a ia ioe. E le mafai ona ‘ou faailoa atu ia te outou(poof ea o totonu o le Faavae) ae o le tali o le ioe. O le a outou iloa le taimi e mae’a tapena ai la matou lipoti. 

O le talosaga mo se Suesuega na fai i totonu o se Saunoaga Faa-Minisita na tuuina mai e le Palemia o Tuilaepa Sa’ilele Malielegaoi i le masina talu ai i totonu o le Palemene. .E tusa ai ma le Palemia, o le avanoa e avea ai ma Faamasino o le Faamasioga o Fanua ma Suafa ua faaaoga e peiseai “o se aso malolo” e nisi o Faamsino.

Fai mai a ia o le Komisi Su’esu’e a le Palemene o le a maua ai le tonu pe o faatino e Alii Faamasino le mea e tatau ona latou faia. E tatau ona fai ni siaki mo alii ma tamaitai faamasino o le Faamasinoga o 

Fanua ma Suafa,” o le faaaliga lea a Tuilaepa. “Afai e le mafai e le Faamasinoga ona fo’ia ana mataupu tau le lotoifale, e i ai le tiute o le Palemene e fai ai se poloaiga faatasi ai ma le lua o vaetolu o le lagolago mai Faipule o le Maota….” Fai mai Tuilaepa e mafai e le Palemene ona tuuina atu se talosaga i le Ao o le Malo ina ia aveese soo se Faamasino-o ia lea e le o faatinoina o latou tiute ma le faamaoni. O mataupu e tatau ona latou tilotilo i ai, muamua, o le tulafono ma taualumaga a le Faamasinoga o Fanua ma Suafa,” o lana faaaliga lea

“O lona Lua o tofiga ma le iloiloina lelei o le faatinoina o galuega a alii faamasino o le Faamasinoga o Fanua ma Suafa.O lea suesuega o le a tilotilo tonu lava i ala e fautuaina ai le atiina a’e o le Faamasinoga o Fanua ma Suafa-i le faafeagai ai ma mataupu i luma o le Faamasinoga ma ia faaitiitia ai le faamaumauina o le taimi o itu tete’e  ma le avea a le Faamasinoga ia foi o loo faamaumau ai tupe a le malo. 

Sa faaalia foi e Tuilaepa e faapea o lea suesuega e tatau ona faamanino ai e faapea o tofiga o faamasino o le Faamasinoga o Fanua ma Suafa-ia faa-konekarate ina ia mafai ai ona toe fesiligia i latou pe afai o loo agavaa pea i latou e faaauau o latou tiute.

“Ou te le tau faailoa atu lenei itu ae i nofoaga uma lava tau galuega-e tatau ona i ai ana lava faiga e siaki ai ina ia mautinoa o loo latou faatinoina o latou tiute. “E faapena foi matagaluega a le malo ma pisinisi a le malo lea e toe faasalalau ai konekarate pe a mavae tausaga ta’itolu uma lava-ina ia iloa ai pe o i ai se isi tagata e sili atu ona lelei i lo le pule (o le matagaluega)”

© Samoa Observer 2016

Developed by Samoa Observer in Apia