Sa vala’aulia le Fa’atonu o le Samoa Observer nei e le Vaega mo Su’esu’ega i Atunu’u o le Pasefika, a le Iunivesete mo Su’esu’ega o Atunu’u i Fafo i Guangdong i Saina, e avea o se tasi o to’oto’o e saunoa i le Fonotaga na fa’a’autū i “Suiga o Motu o le Pasefika: O Avanoa Lelei ma Lu’itau.” Sa fa’a’autu le saunoaga, i “Le sao o vaega fa’asalalau i le va feagai ai o Motu o le Pasefika ma le Lalolagi.” O lana saunoaga lenei: 

‘Ou te mua’i momoli atu la’u fa’afetai tele i le Vaega mo Su’esu’ega i Motu o le Pasefika, a le Iunivesete mo Su’esu’ega o Atunu’u i Fafo i Guangdong i Saina nei, mo le vala’au fa’aaloalo,  ‘ou te tautala ai i le mata’upu. Ua fa’afiafiaina lo’u nei tagata ona o le ‘autu o lenei fonotaga, o “Suiga o Motu o le Pasefika: Avanoa Lelei ma Luitau.”

O ta’afiliga o feagai nei ma tagata-nu’u o motu o le Pasefika, ina ia o-fa’atasi ma  le lalolagi o suiga, ua malamalama ai ma manino la matou va’ai i le tele o mea. Matou te feagai ma lu’itau tau-tamaoaiga, o fa’afitauli o le soifuaga lautele, o lu’itau fa’aleAgaga ae maise o fa’afitauli o le si’osi’omaga i aso ta’itasi. A’o nei lu’itau ma fa’afitauli uma, e maua ai ma le tele o avanoa – le tasi o ia avanoa, e sa’ili fesoasoani ai ma galulue fa’atasi ma isi atunu’u o le lalolagi – ae maise lava, a matou uo ma pa’aga-fa’aleAtina’e fa’apea pa’aga lagolago i itu tauSeleni.

E ta’utino le solo a le tamaloa, ona ua lagona le fa’agae’etia ona ua mafai ona ‘auai i lenei fa’amoemoe i le aso, ma e momoli fa’atasi atu ai, alofa’aga ma fa’amanuiaga fiafia mai motu uma ma tagata-nu’u o le Atu-Samoa. Talofa, Talofa lava. Ua vala’auina a’u mo nai ‘upu-lualua e uiga i le “Sao o vaega fa’asalalau i le va feagai ai o Motu o le Pasefika ma le Lalolagi.” 

O le a lima-ta’ita’ina sa’u tautalaga i nisi o fuaitau fa’aSamoa. Muamua, “Ia seu le manu ae taga’i i le galu.” Lona lua, “’Aua le nanau i le i’a, ae manumanu i le upega.”  

O nei alaga’upu uma, e fa’atatau i faigafaiva i le gataifale, lea e tua iai le soifua o o matou tagata i aso ta’itasi. O le ulua’i alaga’upu, o lo’o fa’amanatu ai i le tautai, ia mataalia ma nofouta i auma pe a aga’i i ogasami e sa’ili ai le ituaiga o gogo e fa’aaoga mo maunu, a  le lona lua, o lo’o lapata’ia ai le faifaiva, ia ‘aua le so’ona naunau ia maua le i’a, ae galo ai le mea aupito taua, o le fa’asaoina lea o le upega mo le isi aso.

Mo le fa’amoemoe o le aso, o se fa’amanatu taua lea e ao ona silasila toto’a iai o tatou ta’ita’i, i o’o’oga o le galulue fa’atasi o le lalolagi atoa mo tupulaga o le lumana’i. E le tau-isoina le tulaga o iai nei atunu’u laiti o le Pasefika, i le leai lea o ni puna’oa fa’aNatura a’o ni tamaoaiga tauSeleni. O le tulaga e matua ogaoga ma taua i o matou tagata, o le to’atele lea o o matou aiga, o talitonuga fa’aEkalesia ma le matou a matou aganu’u, lea e tu-maualuga ai ma tulaga-‘ese o matou atu-motu. 

E leai se afaina o le mana’o i se i’a, lea e lu’itauina ai le faifaiva i ‘auala e maua ai peita’i, o le fesili tele e ono tula’i mai, o le malamalama lea i le faiva o fai ma le naunau fo’i e fa’asaosao le upega mo le isi aso. 

Moni, o le sao o malo o le Pasefika ma isi fa’alapotopotoga uma, e una’ia le galulue so’o-so’o tau’au o atunu’u laiti uma ma le lalolagi aoao. O lo’o fa’atupeina uma taumafaiga e lafoga a tagata lautele fa’apea tupe mai fa’alapotopotoga, e fa’agaioia ai ma pulea o matou atunu’u, ma fa’atino fa’ai’uga uma aua se manuia au-i-luma o tagata uma. 

O le sao la o matou nei le vaega fa’asalalau, o le tuli’aupuina lea o latou nei, ia faia ma fa’atino fa’ai’uga lelei ma malamalama ma fa’amautuina o lo’o latou faia le mea moni e tatau ma talafeagai, e aunoa ma se manatu fa’apito, fa’atautala ma le faia o ni faiga-pi’opi’o.

E tele ma anoanoa’i sao o vaega fa’asalalau. E iai lo latou sao i le a’oa’oina, fa’ailoa, fa’amatalatala au’ili’ili ai mea e tatau ona silafia, ae sili ai le sao o se “Vaega Lona Fa,” e avea ai o se matau-mea e mata’ituina le Palemene, le malo ae maise le vaega o Fa’amasinoga tonu. O matou e tu’u-fesilisili ma sa’ili’ili i ni tali ma tau-tata’i mai vaega tetele nei o faiga fa’aTemokalasi i le moa o le ala, ma fesiligia i mea uma latou te fai.    

A pa’ū ane i tulaga tau-atina’e, e le natia, o atunu’u uma o le Pasefika – e aofia ai ma Samoa – e ao ona galulue fa’atasi ma pa’aga fa’ava-o-malo ma atunu’u fesoasoani, ina ia o-gatasitasi ma suiga o le soifuaga saoasaoa ua iai le lalolagi.

O le mea moni lea, o matou nei e mai atunu’u e vaivai le tamaoaiga, e a’afia gofie lava i fesuia’iga tetele mai fafo ae maise fo’i o fesuia’iga o le tau. O le mafuaga tonu lea, o le matou mo’omia o le lagolago ma le galulue fa’atasi ma pa’aga uma i le lalolagi – e pai o Saina ma isi atunu’u malolosi – e fesoasoani mai mo le fa’amautuina o le iai pea o o matou tagata. 

Ina ia mautu ma sologa lelei lea so’otaga, e taua tele ai le sao o vaega fa’asalalau e avea o se so’otaga lelei e una’ia le malamalama’aga ma faigauo a pa’aga uma. O le mea moni, e iai vaega e ona vaemanua ai ma ‘ave-seseina ai tu ma aganu’u masani, o tapua’iga fa’aleLotu ma isi mafaufauga e fa’amata’uina ai le so’otaga lea. A o le tala fiafia la, o vaega nei e faigofie lava ona fo’ia, e ala i le fesoasoani a le ‘au-fa’asalalau.  

E fa’apei ona fa’atino lea tulaga? O vaega fa’asalalau e fofola atua le malamalama i so’o se itu ma ‘auala e mafai ona fesoasoani ai le tasi i le isi. O tala ma fa’amatalaga e malamalama ai maua le iloa ma ua tatou iloa uma, le malosi o lena tulaga. A malamalama lelei vaega uma, o manino uma ma sologa lelei le soifua ma lelei so’otaga o tagata uma, ma i’u ina manuia uma ai vaega ‘ese’ese o se atunu’u. 

Ae le tatau ona muta galuega a vaega fa’asalalau, ia na o ripoti o mea o tutupu i le lalolagi e a’afia ai le Pasefika, ae tatau ona tamau pea ma mataala, e fa’atonutonu ma ripotia a’afia o tagata-nu’u i o tatou atunu’u, ona o poloketi ma galuega nei – a’afiaga lelei ma mea le-lelei fo’i. 

O tatou o lo’o tausia ma malu-puipuia o tatou ogasami, o vaomatua, o ‘ele’ele ma o tatou aiga. O tatou lava o vae ma lima o le lautele o le atunu’u, e ripoti tonu ma ripotia sa’o mea uma ma fesiligia – e aunoa ma se fa’amata’uina, i a’afiaga o ia atina’e uma. 

O le isi fo’i sao o vaega fa’asalalau, o le tuli’aupuina lea o ta’ita’i, i a latou folafolaga i vaega fesoasoani mai ma pa’aga-fa’aleAtina’e, ina ia nofo-malamalama, ma tali-tonu mai ae maise le fa’aaogaina tatau o fesoasoani. 

A toe fa’amatalaina, e taua tele le sao o vaega fa’asalalau, i le una’ia o faiga ma pulega lelei ae maise le taofiofia o faiga-pi’opi’o e lamatia ai ia so’otaga ma galuega lelei.

A talanoa loa i le fa’atinoina o le amiotonu, o vaega fa’asalalau e tuli’aupuina o tatou ta’ita’i ona o mea sa latou folafola e fa’atino. Afai ua folafola le fa’atinoga o pulega lelei, e ao lava ona fa’aauau ona fesiligia i fa’ai’uga fai se’ia fa’ataunu’uina a latou saunoaga sa faia muamua. 

O faiga malamalama e le o ‘aumaiga o fuainumera e fa’amalie ai lagona i le taimi nei, ae nana ai le mea moni. Matou te talitonu, o faiga malamalama, o le lototetele lea o ta’ita’i e ta’utino ma fai le mea-moni, tusa lava pe tiga ma tilofia ai so latou leaga. 

O tala e fa’asalalauina, o saunoaga ma iloiloga o se mata’upu, e manino ai le mea moni o iai galuega ma faiga-fa’aPa’aga nei, ae le na o le fa’alauiloaina i le atunu’u lautele o se fa’aletonu ma ni sese, a ia manino ai fo’i,  o lo’o tulimata’ia i latou uma. 

O vaega fa’asalalau fo’i, e fesiligia pe fa’apei ona fa’aaogaina lea tupe ma lea fesoasoani. Aua afai e le fesiligia, po’o fea ua aga’i iai lea seleni, ae pe ‘aisea fo’i ua le fa’aaogaina tatu ai? Pe o tuli’aupuina tagata ma ofisa o lo’o fa’atautala ia vaega faitele? 

‘Ou te ta’u atu i lo tou mamalu, o le lu’itau tele o aso nei, o le sa’ilia lea o ta’ita’i e fa’amaoni i a latou saunoaga uma. E talitonu lava le mafaufau, o le ta’ita’i lelei, o le tagata lea e savali i ana ‘upu; se tasi e naunau e fa’atino le tele o fuafuaga mata’utia ma mea e manana’o ai. O se tasi e fa’ananau e fa’atonutonu lelei ma mulimulita’i e fa’amapu’e le tulafono ma faiga-fa’avae ua mae’a fa’ata’oto, ina ia manuia ai tagata sa fuafua lelei iai ia fa’amanuiaga. 

E le masalomia, o lo’o tatou soifua i se soifuaa e anoanoa’i le mau fa’afitauli ma lu’itau, e ala mai fesuia’iga o le tau, o fita ma faigata o le soifuaga, o le leai o ni avanoa lelei, o le popole ma le atuatuvale, o le mativa ma le le-tagolima, o sauaga i totonu o aiga ma isi fa’amata’u uma ua silafia. Mo le Pasefika lava ia, i le tau fo’ia o ia lu’itau, matou te fa’alagolago tele i tupe ma le lagolago a pa’aga-fa’ava-o-malo. 

Manatua, o le galuega fo’i lea a le vaega fa’asalalau, o le fa’ailoa atu ma a’oa’o i tagata uma. O le matou matafaioi lea, e le gata i le fa’ailoa atu i le ‘au-faitau ma le loaloa o le atunu’u, fuafuaga ma galuega o lo’o fa’atino a’o a’afiaga fo’i o latou uma ona o ia mea.  

Mo le ‘ausia o lea tulaga, o le tasi o sao taua o le iai o vaega fa’asalalau, o le fa’afaigofieina lea ona malamalama tagata. A manatu lava i le gaosa o vaega ‘ese’ese o le lalolagi nei, e matua mata’utia lava le gagana o lo’o latou fa’aaogaina – ‘ou te talitonu, e matua ta’afifili lava latou ia e le malamalama i mea o lo’o talanoa aga’ iai i le tele o taimi. 

Pe a manatu fa’alemafaufau lava iai, e taumafai lava nai vaega fa’asalalau e fa’afaigofie le gagana ma tau fa’amalamalama lelei vaega o tala mo nai tagata lautele i le talafatai o Apia.  

E le o se galuega e faigofie, ae o le mea e tatau ona fai. Faigofie a ona malamalama lena tulaga, aua a le-malamalama le tusitala i le tala, e fa’apea ona manino le tagata faitau?

Ioe le pa’ia e, o lenei aso, o le galuega lena a vaega fa’asalalau, o le fa’amalamalama o le ‘au-faitau ma o le tasi o ‘auala faigofie e fa’atino ai lena mea, o le fa’aaoga o le gagana masani, o ‘upu ma tala ua masani ai tagata-nu’u. O se fa’ata’ita’iga, o fesuia’iga o le tau.

 E le mo’omia e tagata-Samoa se ripoti na faia i Suiselani e fa’amatala au ai suiga o le tau ia latou. I Samoa lava ia, o lo’o soifua ma ola ai, e va’ai lava i suiga o le tau i aso ta’itasi. Aisea e le talanoa ai i o tatou lava tagata? Fesili i le ‘au-matutua i afio’aga ma alalafaga ona fa’amatala lea o a latou tala e pei ona ‘aumai ai.  

E matua tele le tomai ma le silafia o o matou tagata e mafai ona tapa e felanulanua’i ai i mau ma iloa ‘ese’ese o mea sa tutupu, o tupe maua ma latou na ‘aumai ia, po’o fea lava. 

O tala moni e uiga i tagata, e fa’aosofia ai le galulue fa’atasi o motu o le Pasefika ma atunu’u o le lalolagi. O le mea mautinoa lea, a malamalama tagata, o le a amata fo’i ona fiafia ma fa’ananau i atina’e ua fa’atinoina.  

O le tele lava o taimi, e le malamalama tagata i mea o lo’o fai e o latou malo. A ona o le le-malamalama,  e tele ai ina le-fiafia ma latou te’ena ai ma le loto-ita ma afua ai le-malilie i so’o se atina’e talu ai lava le leaga o feso’ota’iga mai le vaega i luga mo le vaega lautele i tua. 

O le tele o malo, ua aga i le fa’atinoina o le mau atina’e mananaia mo le manuia o tagata, ona o le fesoasoani mai atunu’u e pei o Saina. E le lava so’u taimi i lenei aso e fa’amatala au’ili’ili ai atina’e uma ua ma’ea ona fausia. 

A o le mea ‘ou te fia fa’ailoa atu, ona e tatau i tagata uma ona fa’ailoa i tagata le mea o tupu. Fa’amatala i se gagana faigofie, e a’oa’oina ai latou ina ia malamalama, ia talia gofie ma fa’afetaia atina’e ua fuafua mo lo latou manuia. 

O le ta’ua o tulaga tauA’oa’oga, e ao ai fo’i i vaega fa’asalalau, ona a’oa’oina ai latou uma i ia mea. E le o matou o ni fa’amatua po’o ni porofesa i so’o se mea. Atonu ua malamalama ma iloa nisi mea, ae le o mea uma o le ola nei. 

Pei ona ta’ua muamua, a tatou le-malamalama i le fe’au e avatu i tagata, e leai fo’i se tagata e malamalama ai.

Ae ao lava ona talia, o le tele o mata’upu nei ma fa’afitauli o lo’o talanoaina i le va o le Pasefika ma le lalolagi – lea e tatau ona ripotia mo le silafia e tagata – o mata’upu e fa’apitoa. Ua loa aso ma tausaga o feagai i latou e atamamai fa’apitoa, e fa’atino su’esu’ega i vaega nei.  

E mo’omia e vaega fa’asalalau ona malamalama ma a’oa’oina i mata’upu fa’apitoa nei. Ma o le mafuaga lea e taua ai ma aoga fetufaa’iga ma asiasiga fa’apei fo’i o lenei, e ofoina fua e pa’aga-fa’aPisinisi ma atunu’u fesoasoani,  e si’itia ai le iloa ma fa’alautele ai le malamalama. 

E fa’amae’a atu ai se fa’amatalaga, ‘ou te toe fa’afetai tele atu ai i le Vaega mo Su’esu’ega i Motu o le Pasefika, a le Iunivesete mo Su’esu’ega o Atunu’u i Fafo i Guangdong i Saina nei, ona o le vala’au fa’aaloalo,  ‘ou te faia ai se fa’amatalaga  mo lo tou mamalu. E mautinoa lava, o le galulue so’o-so’o tau’au ma malo o le lalolagi, e ogaoga sona sao mo le soifua o Motu o le Pasefika. 

A ‘ou te ‘avatu ai fo’i se tu’u-alalo i o matou ta’ita’i, ia manatua fuaitau a le atunu’u, ““Ia seu le manu ae taga’i i le galu.”  E iai taimi e ao ai ona tu’u le manu ae fa’atali mo le isi e soso’o mai, nai lo le fa’ananau tele iai, ae afaina ai. E fa’apea fo’i le agaga pei ona momoli mai e le ‘upu “Aua le naunau i le i’a ae ia manumanui le upega. Ia Soifua ma Fa’amanuia tele Le Atua!