LAUGA - “Talitonu ma talia Iesu Keriso i lou loto”

By Rev. Petaia Setu 21 May 2017, 12:00AM

Po ua iai se mea ua faigata i le Atua? Ioe, e mafaia e le Atua mea uma lava pe a finagalo lava ia iai. Afai la o lea, o ai la e mafai ona tu ma tetee atu i le Atua? E fuā i galuega lelei o le faalotaga?

O vaipanoa uma ia o le ola tapuai faa-Iutaia ua faama’i pipisi i le lalolagi kerisiano, ua uma ona a’oa’o mai ai lo tatou Alii Faaola (Luka 21:17). A ua tatou iloa, e le taumāsina le tagata ma le Atua.

Ua loka e faifeau o le lotu Iutaia le au aposetolo i le falepuipui! O le mutaaga lea o le malosi o le tagata. Ae fai mai Luka, “ua to mai puipui o le fale e le agelu a le Alii i le po, ua na taitai ia te i latou i fafo, ma faapea atu, ina ō ia outou, inā tutū i le malumalu ma tautala atu i le nuu i upu uma lava o le nei olataga”. Sialsila lelei Samoa i le pito lea.

O ‘i o loo alia’e matamata tetele ai le faafiapoto ma le faavalevalea nauā o le tele o le ituaiga lea (ositaulaga ma le au faresaio), ua le na o Iutaia, a o Samoa foi. Ua latou faasa ona fai o nisi lotu e tapua’i saoloto ai tagata i le Atua. E le faatagaina e le Atua ia ituaiga manatu. E ā latou e loka ma faamata’u le au aposetolo, ae ā le Atua e tatala ma faasaoloto.

O le Mana ma le Faatonuga, e le taofia e se poto. O ‘e vaivai atu ai ma oe i le valea lea? Tatou te manana’o loa tatou te ‘I am’ i mea uma lava, ona oti foi lea o mea uma lava. Ua pogisa ai le vaai i le mea moni ma le alofa faaola ua valaauina ai i tatou e le Alii.

 O le Aso Sa ua tuana’i atu, o le faamanatu i le afio mai o le Agaga Paia. O le Fesoasoani Sili ua finagalo ai le Atua mo tatou. O le Mana e mafai ai mea uma o le galuega faaola o le tala lelei a Iesu Keriso. E tautala atu ai ma faasoa le upu moni i tagata uma. E mafuta ai i tatalo ma viiviiga i le Alii. E asiasi atu ai i ē o puapuagatia ma fia maua lau faamalosi ‘au.

E faamafanafana ai i tagata ma faamalōlō i ma’i. E alofa atu ai i ē matitiva ma fafaga i ē ua matelāina. E faasaoloto ai i e ua saisaitia i tiga ma faafitauli ese’ese o le olaga.

O galuega lelei ia e mafai ona fai, ona o le Mana o le Agaga Paia. Ua le o se mana e faamălie ai le mănava, ma e pule faasolo ai i mea uma lava, leai. E le o se mana e soli ai tagata. E le fau fale, ae fau agaga. A silasila i le lesoni nei, o ‘i o loo ua fiva ai toeaiina, ona ua faatupuina ma faaopopoina pea le toatele o le nuu e mulimuli i le Upu Moni. Ona sesē ai lea o le tōfa, ma i’u ai i le ma (F-24). 

 O le faatonuga, o le feau o le taimi nei faifai pea. O le faatonuga, ō i le malumalu! Tautala atu i le nuu i upu uma lava o le nei olataga. E ā, e ese ni upu o fai i le malumalu? O fai ai ni polokiki? Poo fai ma fale ‘ote o le au faitaulaga ma tau faamata’u ai i tagata? O fai ai suegā tupe ma suegā tala? Se ā la e fiva ai pe afai o le faatonuga lea mai le Agaga o le Atua i nisi tagata ua latou lagonaina le feau o le alofa tunoa o le Atua? O ai na te taofia le finagalo o le Atua? O le faatonuga tuu sa’o mo oe ma tatou uma. Tautala i ou aiga, i lau fanau, i tagata uma. Tautala i le mea moni ma le sa’o.

Tautala i le manino ma le malamalama. Tautala i le saolotoga ma le alofa. Tautala i upu uma ua aumai e le Agaga. Upu o le olataga. Ioe, upu e mălie ai le galala. E māmā ai le mamafa.

Upu e sa’o ai le mānava ma mālōlōina ai le agaga. Auā o nei aso, ua le nāmalelaina. E alu fiafia i le falesa, ae foi mai ua le tau tagātā! Fai mai le faatonuga, o upu o le olataga. E le o ni la’ei o le tagata, a o le faaolaina  o le agaga. O ai na te faamaopoopoa lou aiga? E fua mai i fea le lelei faatino o galuega ma le auaunaga a tagata? E fofō faapefea le le femalamalamaa’i i le feau ma le galuega a le Atua? A o lē fea itū aso e te tautala ai i le sa’o?

 Samoa e, o ala o le tagata e le gata ina faigataae umi nauā. Auā o ala e taamimilo solo ma aafia ai le tele o tagata ina se’ia faamălie le ola e tasi. Ae faauta i le faatonuga a le Alii, tautala atu i le nuu i upu o le ola. Pau a lea. Ia sa’o le gutu sa’o le upu. O iinā o loo taoto ai maopopoga. E tausili ai tagata i le loto mălie. E te malamalama ai i le faamoemoe o le Atua mo oe ma tagata uma.

E te lagonaina ai o oe o le auauna ua valaauina mo le ola saoloto ma le ola manuia o nisi tagata. Fai mai Iesu, Inā ō ia…..E afua atu i le asō. O nei lava. Ae le na o se malumalu foi e tu ai ma folafola le alofa o le Atua. Uso, e malumalu lava mea uma. Poo le uafu, o le malumalu. Poo le maketi, ua malumalu. O fea lava e te tautala atu ai ma a’oa’o atu le faaolataga a le Alii, o le malumalu lenā. O fea e maua ai tagata, o lenā. Auā o le malumalu sili lava, o oe, ma a’u, ma tagata uma.

Le ekalesia e, e tasi lava la’u feau – o le faaolaina o tagata. Ia e iloa,  o oe o le ‘avefeau’, ae le o lē ana le feau. O oe e te tatalo ma lagolago i nisi uso o loo ua galulue e atinae nisi vaega o le toe fuataiinao le ola faaleagaga o tagata. Ae le o le tausolomua o oe i le faaleaga ma lamalama le ola atia’e mo le manuia faaleagaga o le fanau a le talalelei.

O se galuega na faasino mai e le Agaga o le Atua e fai, e le mafai ona tuua, e fai lava. E leai se tagata na te mafaia ona taofi. E le mafai e se malosi faafitafita, poo se pulega faa alii ma faipule, poo se pule faa-le-malo ona taofi. Ia o fea nei la le malu o leoleoga a fitafita ma loka uamea ma filifili sa loka ai le au aposetolo? Ua i’u i le māmāsagia ma ua taumanatu pe tua i ni a lea valea! (F-24).

Ua faapea le fautuaga a se tasi faiaoga o le au faresaio e viia e le nuu, “Tuu pea ia ia te i latou, auā afai e mai tagata lena sauniga ma lena galuega, ‘e faaumatia ia; ae afai na tupu mai le Atua, tou te le mafai ona faaumatia, nei iloa ua outou fai taua i le Atua” (F-38,39).

O le faatonuga e mai le Atua, o lona faatinoga o tā’ua. Ia manatua, o le ekalesia ua faatumuina e le Agaga, o le ekalesia lena e galue faa le agaga ma fautua i la le agaga. Toe vaai iai. Vaai lelei iai. O iai i tatou i le laina lena pe leai?

Le atunuu e, Samoa, o le Mana ma le Faatonuga mai le Atua mo oe ma tatou uma taitoatasi. O le Mana e tia’i ai le fefe ma le palaai. O le Faatonuga e laveaiina ma faaolaina ai se agaga. O le Mana e manino ma lamalama ai mea uma; o le Faatonuga e saoloto ma manuia ai tagata uma. O le Mana e gatasi ai mapuepue, ea ai vanu, sa’o ai pi’oga; o le Faatonuga e mā’ona ai le mativa, e mălie ai le le tagolima, e mapu ai le tigaina.

Le au faatuatua e, e afua mai manuia ma nei lelei uma lava mai luga o le satauro o Keriso. Ua tulolo le malosi o le lalolagi, a ua auauna mea uma i Lē na manumalo a’ia’i i le lalolagi. Fai mai Luka, “ Ua faalogo ai le au aposetolo, ona latou ulufale lea i le malumalu i le tafa o ata, ma a’oa’o ai (F-21)”. E le mafaia i so tatou poto poo se malosi faa-le-tagata. A o le Mana ma le Faatonuga mai le Agaga.

Amene

Rev. Petaia Setu

773-7063 / 778-3782

By Rev. Petaia Setu 21 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>