Fia moomia se suavai mautu
E maua mea uma i le olaga mo le ola a ii aso uma ae a leai se suavai ua le aoga atoa le faamoemoe, aua ua faaupuina le suavai o le “ola’
O le talosaga vaivai a le tina ia Lisi Toma. 59-tausaga le matua mai Malie ma Vailele o lo’o fia vave maua lava se vai mautu mo si o latou aiga.
“O le faigata ia o ni feau o le aiga pe a leai se suavai e le gata i meaai e faaoga ai le suavai ao le tausiga o le ola i aso uma e pei o le vai inu ae le gata i lea o so’o se itu e moomia ai le vai” o lana tala mai lea
“Ua leva ona tupu mai lea faafitauli ma e le tasi foi se aiga o tupu ai lea meao le tulaga lava o lo’o faia e saili lava e le aiga ia le mea e maua mai ai le suavai.
“E faigata tele i lo matou aiga aua out e nofo e vaai fanau a a’u fanau ae e faigaluega uma la’u fanau o lo’o latou taumafai foi ina ia vave maua se suavai mo le aiga nei
“O le suavai a lo’u tuagane o lo’o matou nonofo faafesagai lea o lo’o maua mai ai le matou suavai ma o lo’o faaaogaina i mea fai a lo matou aiga
Na tauia e le tina e mafia ona maua mea uma ae a leai loa se suavai e faigata lava ona faia se feau se tasi i totonu o le aiga
“I le taimi nei o lo’o taumafai lava ina ia maua mai ni meatotino e pei o le ofe aua le faagaioina o le matou suavai
“A tuu foi i le tau o mea e fai ai le galuega e le’o ni mea taugofie e fia selau e alu ai e le’o se mea taugofie foi ae o lo’o taumafai lava i le mea e gata mai ai le taumafai latou ia
“E moni lava e alu ai le tele o tupe ae o le mea aoga toe taua aua a leai se suavai e leai se ola i totonu o se aiga
Taua e Lisi i lenei olaga ma lona suiga ua iai ua le toe taugofie aim ea ae ua taugata lava
‘Tele tagata ua faitioina le tau o le soifuaga e moni ma faamaoni o aiga uma lava o lo’o naunau ina ia lelei ma mautu o latou aiga ae e le mafia pe afai o le faiga lea o le taugata o le soifuaga” o lana tala mai lea i le Fofoga o Samoa
“Ua laki lava nai faatoaga ia o lo’o tua iai le tele o aiga ma fanau mo le tausiga i aso uma
“E moni lava o lo’o lima vaivai ae o lo’o taumafai lava i le mea e gata ai le taumafai ona o le tausiga o le fanau ma aiga
O le agaga faafetai o le tina ia Lisi o le iai o le latou faatoaga mo le galueaina i aso uma mo se meaai a fanau a lana fanau
“O le tulaga faigofie lena” o lana tala lea
“E moni ua le toe tutusa aso nei ae o le agaga faafetai ona o lo’o maua pea mea m o le tausiga o fanau
Na taua e le tina ia Lisi latou te le’i talosagaina se fesoasoani aua e fiu foi se taimi o faatali
“O le galue lava o le tagata ia mo lona ia aiga ae a ola faamoemoe ma faalagolago e leai se mea e maua mai ai
‘Ae o le manaoga lava ina ia vave ola mai le suavai aua si o matou aiga ma si a’u fanau .