Fanua faalilolilo o le Ekalesia

By Lanuola Tusani Tupufia 21 May 2016, 12:00AM

 O le faatauina o se fanua e lima eka i Malololelei mai le Ekalesia Katoliko e le Ekalesia Faapotopotoga Kerisiano i Samoa (C.C.C.S.) na matua lauiliuina i Malua i le vaiaso nei. O le mataupu autu na matua le fiafia ai sui o le ekalesia sa auai i le fono tele i Malua.

I le faagasologa o le Fono Tele i le Aso Lulu, na tapā e sui o le ekalesia le toe faaolaina mai o lea tupe e $650,000 na tuuina atu mo le faatauina mai o lea fanua, i le taimi lava na latou maua ai e faapea e ono mafai ona le maua se fanua i Malololelei.

E tusa ai ma le Taitaifono o le Komiti a le ‘Au Toeaina, o Reverend Elder Kerisiano Soti, o lea fanua ua uma ona fuafuaina mo se Atiina A’e Tau Nofoaga e Malolo i ai. Ae ui o lea-ina ua latou asia lea fanua, na latou maua ai e faapea o lea esetete e le talafeagai mo le fuafuaga ma o lea ua latou talosagaina ai le Ekalesia Katoliko mo se isi fasifanua.

 “Ina ua matou toe taliu atu ma talosagaina se fanua, o le latou faaaliga e faapea ua i ai se suiga o ia fuafuaga,”o le faaaliga lea a Rev. Elder Soti. “Ae peitai-o lo matou lagona ua le o toe i ai se fanua o totoe. O lo matou lagona ua uma ona tuuina atu i tagata faipisinisi.”

O se taumafaiga ina ia maua mai se manatu faaalia mai le Ekalesia Katoliko ananafi sa le faamanuiaina. Ina ua fesoota’i atu i le vaega o Fanua o le Katoliko, sa teena e se tagata o le ofisa ma fai mai e le o avanoa le fofoga aloa’ia o le ofisa.

Ina ua toe taliu atu i Malua-sa faailoa atu i le Fono Tele e faapea ua uma ona totogi atu le $650,000 mo lea fanua e lima eka. “E o’o mai la i le asō, e le’i tuuina mai lava e le Ekalesia Katoliko ia i tatou se fanua i Malololelei,” o le faaaliga lea a Rev. Elder Soti.

O lea la itu na matua le fiafia ai sui o le ekalesia. “Na ‘ou matua lagona lo’u le fiafia i lenei itu ona o le manatu e faapea ua uma ona totogi atu lea tupe i le Ekalesia Katoliko,” o le faaaliga a se tasi o sui i le Fono Tele.

“E le gata ina ua mae’a ona fai lenei fefaatauaiga i le agaga fefaatuatuaa’i ma le ekalesia-ae o lo’u lagona ua faavalea i tatou. Ou te ioe e tatau ona toe faafo’i mai lea tupe ma ia fai se tusi e ave i le Ekalesia Katoliko e faailoa atu ai lo tatou le fiafia i lenei mataupu.”

Sa faaalia foi e lea sui o le ekalesia e tatau ona toe totogi mai se tului mo le valu tausaga talu mai ona totogi atu lea tupe ia i latou mo se fasi fanua. Na faaalia le ioe o le isi sui o le ekalesia i lea tulaga. Na ia toe ta’ua e faapea e le toe mana’omia e le ekalesia nisi fanua ae aoga le toe faafo’i mai o le tupe e totogi ai isi atiina a’e tetele ia o loo tumau pea ona lē mae’a.

By Lanuola Tusani Tupufia 21 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>