O LA’U TALA FO’I

148 Hits

1. Matauina i Tala Fou fai mai ua faaleaogaina e le Faamasinoga se tagi e faasaga i le Komiti a le ‘Au-Toeaina o le Ekalesia Faapotopotoga Kerisiano i Samoa-ma o lea ulutala e faasino i se tagi na faaulu e Rev Kerita Reupena.

O lea la mataupu ma lona fofogaina i luma o le Faamasinoga- sa faafoeina e le Afioga i le Faamasino Sili-o Patu Tiava’asu’e Falefatu Sapolu-ma ua faaleaogaina ai lea tagi e faasaga i le Komiti a le ‘Au Toeaina o le Ekalesia Faapotopotoga Kerisiano i Samoa-na faaulu e Rev. Kerita Reupena- e tusa ai ma le aveeseina o ona tofi ma le faafoeina o le Ekalesia i Ipswich- i Kuiniselani i Ausetalia…..!

Ia-o lena ua aumai le faaiuga-ma ua faaleaogaina ai lea tagi! O le fesili la-“sa i ai muamua ni mea faapenei i totonu o le Ekalesia? Afai o le tali e leai-aisea la ua tulai mai ai lea faafitauli? Faamata e le o le  saua ma le  faalumaluma o le taunuuga o lea faaiuga?

O fea le aoaoga a Iesu-“a po mai le tasi itu-liliu i ai le isi itu? O le tulaga ua aliali mai- e peiseai ua fai le mea e loto i ai le tagata ae tuu le finagalo o Iesu? O ai la o loo viia ona o lenei faaiuga? O le Komiti a le “Au-Toeaina” poo Iesu e ou le Ekalesia? Fea afioga a Iesu fai mai-“a outou fealofani ona iloa lea e le lalolagi-o o’u Soo outou? O le a sou taofi?

2. Matauina i Tala Fou le manatu o le faauluuluga o le Lotu Mosalemi i Samoa o Dr. Muhammad Yahya poo Laulu Dan Stanley-ma lona talitonuga-o le a teena e le Malo le mana’o o le Faalapotopotoga a Ekalesia Kerisiano Soofaatasi-ina ia matua tapu le lotu Isalama i totonu o Samoa.

Ia atonu o le atugaluga o Ekalesia Soofaatasi ona o le faatupu faalavelave o tagata Mosalemi i fafo! Ae ui o lea-afai o popole ekalesia soofaatasi i le ofi mai o lea lotu Mosalemi i totonu o le atunuu- ia atonu e i ai le pogai ua mafua ai! Ae poo le a lava-a tatou tilotilo lelei i le Tulafono Faavae o le Malo o Samoa-o upu nei o loo tusi ai: I LE SUAFA PAIA O LE ATUA, LE E ONA LE MALOSI UMA LAVA, LE E ALOFA E FAAVAVAU- 

Ona o le pule aoao i le Lalolagi e ai lea i le Atua na o Ia –e afio i mea uma lava ma o le pulega e faaaogaina e tagata o Samoa i totonu o tuaoi na faasinoina mai i Ana Tulafono-o se tofi pa’ia tuufaasolo, ONA ua faaalia e Taitai o Samoa le tatau ona avea Samoa ma Malo Tuto’atasi e faavaeina i luga o talitonuga faa-Kerisiano ma tu ma aganuu a Samoa…!

O le fesili la-o le a le pogai e saga aumai ai nei ituaiga o talitonuga lē kerisiano i totonu o le atunuu- a ua uma ona faata’oto e matua le talitonuga faa-Kerisiano e faavae ai lona Malo?  O le a sou taofi?

3. Matauina foi i Tala Fou se tala e uiga i se fanua e lima eka i Malololelei- o le Ekalesia Faapotopotoga Kerisiano i Samoa. Fai mai o lea mataupu sa lē fiafia ai nisi o le Ekalesia sa auai i le Fono i Malua.

O taualumaga la o le Fono Tele i Malua i le Aso Lulu talu ai nei –na talosagaina ai e nisi o sui o le ekalesia -le toe faaolaina atu o lea tupe e $650,000- na tuuina atu mo le faatauina o lea fanua.

E tusa ai ma le faaaliga a le Ta’ita’ifono o le Au Toeaina o Reverend Elder Kerisiano Soti-sa fuafuaina lea fanua mo le Atiina A’e Tau Fale e Malolo i ai-ae ina ua latou asia lea fanua-na latou maua ai e le talafeagai lea esetete mo lea fuafuaga-ma ua toe talosagaina ai le Ekalesia Katoliko mo se isi fasifanua.

Ae ina ua latou toe asia lea fanua-ua toe sui foi lea fuafuaga. Fai mai Rev. Elder Soti-ua le o toe i ai se fanua. Masalo ua uma ona tuuina atu i ni tagata faipisinisi. Sa le mafai ona maua mai se faaaliga aloa’ia ananafi.

O le tala la na faaalia i Malua e faapea o lea $650,000-ua uma ona totogi atu mo lea fanua e lima eka. E pei la ona faaalia-o lea tulaga sa le fiafia ai le toatele o nisi sui sa auai i le fono i Malua! Poo le a lava-o lea fefaatauaiga-sa fai i le va o ni Ekalesia iloga i totonu o le atunuu-ma e talitonu le faamoemoe-e maua lava se tonu o lea mataupu i se taimi vave! O le a sou taofi?

4. Matauina foi i Tala Fou fai mai o “Tupe maumau i le Fale Mataaga- ua afaina ai le Ekalesia-ma o lea ulutala e faasino i le Ekalesia Faapotopotoga Kerisiano Samoa.O ia la tupe maumau a le Ekalesia-fai mai e $100,000 i le tausaga.

O ia la tupe maua-na faaalia uma lava i le Fono Tele i Malua. O lea la Fale Mataaga e $5.7 miliona le tau-na tatala aloa’ia i le 5 tausaga talu ai-ma na fuafua e teu ai le anoano o oloa o galuega taulima-ae o ia tupe leiloa talu mai ona tataa- o loo tumau pea ona aga’i i luga….!

O le fesili la-aisea e mafua ai ona tutupu nei mea i totonu o le Ekalesia? Afai o nei mea e faatino e le Ekalesia-e totogi i tupe o le afu o aulotu uma i le salafa o le Ekalesia-aisea ua le lelei ai ona faaaoga ma le tatau?

Faamata o silafia e i latou o taulamua i nei faiga-o le afu sisina o tagata tapua’i o le Ekalesia- lea o loo soona fai faatautala ma faamaumau? E le o tupe ‘ea nei o taulaga osi a tagata tapua’i? O fea o i ai Leoleo Mamoe o le Lafu Mamoe? O le a sou taofi? 

© Samoa Observer 2016

Developed by Samoa Observer in Apia