Ua gaoioi le Iunivesite e taofi fusuaga

By Pai Mulitalo Ale 21 May 2016, 12:00AM

 O se fusuaga i le va o tamaiti a’oga o le Iunivesite Aoao o Samoa i le amataga o le vaiaso na pogai ai se potopotoga faapito i le nofoaga o le Iunivesite i le Aso Lulu.

Na toe faamanatu atu e le Sui Pule o le Iunivesite Aoao o Samoa, o Fiu Polofesa Asofou So’o i lea nofoaga i tamaiti a’oga e uiga i le amio e talafeagai ai ma le mana’oga ina tu’u atu tasi o latou mafaufau ia latou suesuega tau le a’oga.

I sana faaaliga i sui o nusipepa ina ua ma’ea lea fono, fai mai Fui na faailoa atu ia te ia lea faalavelave ma ua tonu ai ia te ia i lea lava taimi ona fai se mea e taofi ai. Fai mai a ia e leai se avanoa mo lea ituaiga o amioga faavalevale e faaauaau ai i le iunivesite, pe afai e tatau i tamaiti a’oga ona tuuina atu o latou mafaufau ia latou suesuega.

Na teena foi e le Sui Pule lipoti e faapea o lea fusuaga e mafua mai se sauaga talu ai nei i le va o kolisi i totonu o Apia. Ae o lea misa na pogai mai eseesega o manatu. Na ia toe ta’ua e faapea o le faitau aofai o tamaiti a’oga i le N.U.S. o loo aofia ai tamaiti a’oga mai le sili atu i le 25 kolisi i totonu o Samoa ma a latou o mai faatasi i Le Papaigalagala, e leai se taimi e mafaufau ai ia latou sootaga tau kolisi. 

“A latou o mai iinei, o i latou e mai le iunivesite e tasi,” o lana faaaliga lea. “Afai e i ai se feeseeseaiga i lo latou va ona o a’oga latou te o mai ai-o lona uiga la-e tatau ona latou sailia se isi iunivesite e faaauau ai a latou a’oga,” Sa toe faamanatu atu foi e Fiu i tamaiti a’oga ina ia mitamita i le mea moni e faapea o lea ua latou a’o’oga i se Iunivesite.

Na ia toe ta’ua e faapea o loo i ai tulafono i totonu o le lotoa ma o le inu o ‘ava oona i totonu o le lotoa e matua tapu lava. O se tagata aoga o le iunivesite lea e mana’o ia le faaalia lona igoa-sa talanoa mai i le Samoa Observer ananafi ma na faamaonia ai le faalavelave na tupu i le Aso Lua.

“Na tupu lea faalavelave pe tusa o le itula e 2 pe 3 i le aoauli o le Aso Lua ma e mafua ona o fusuaga a a’oga i totonu o le taulaga,” o le faaaliga lea a lea alii. Sa fesootai atu i le Fofoga o Leoleo o Maotaoalii Kaioneta Kitiona mo se manatu faaalia ananafi ae fai mai a ia- e le’i faalogo lava i sea faalavelave.

“Ua faatupu e Tagata tala e le moni,” o le faaaliga lea a Maotaoalii.

By Pai Mulitalo Ale 21 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>