Talisapaia e nisi aiga i Sogi le fa’ai’uga a le Malo

Tusia Ilia L. Likou ma Fa’aliliu e Maiava ,

195 Hits

MATUA FIAFIA LE TINA O MELE I FALELAUNIU: Le tina o Meleane Perenise, o se tasi sa nonofo ma lona aiga i Sogi, a ua fa’ase’e atu nei i Falelauniu.

MATUA FIAFIA LE TINA O MELE I FALELAUNIU: Le tina o Meleane Perenise, o se tasi sa nonofo ma lona aiga i Sogi, a ua fa’ase’e atu nei i Falelauniu.

Ua matua talisapai fiafia e latou sa nofoia fanua i Sogi - latou ua talia fiafia le ofo a le malo e fa’ase’e atu i fanua ua saunia i Falelauniu. 

O le fa’ai’uga lea a le Malo na faia i le 2011, ua to’atele ai nisi o aiga sa nofoia nofoaga fa’aTaufusi i le taulaga e fa’ase’e atu i se nofoaga e maualuga atu. E le gata i lena, a’o fanua fo’i nei, o le avea ma a latou mea-totino, pe a mae’a lea ona totogi o le tau o fanua. 

Na fa’ailoa mai e le tina o Meleane Perenise i le Samoa Observer, o se fa’ai’uga lelei tele lea ua faia mo ia ma lona aiga ma le fanau e to’avalu. 

 “O le ono lenei o tausaga talu ona matou si’i mai i uta nei ma o se suiga tele lea mo le matou nei aiga,” o lana fa’aaliga lea.

“Lea ua mae’a ona fai le matou lava fale i’inei, ua sa’oloto e toto taro ma fa’i ma ua leai fo’i se popole i ni fa’alavelave fa’aNatura ma isi mea e a’afia ai.”

I tai i Sogi, e matua faigata lava le nonofo ai ona o le nofoaga e vailaloa ma fa’ataufusi.

“Sa matua faigata lava ona e le tele se ‘ele’ele e galulue ai,” o lana fa’aaliga lea. 

 “A’o i’ine i Falelauniu, ua lava tele lenei fanua mo matou, e lelei fo’i o matou tua’oi ae maise le vai e fa’asoloatoa i le 24 itula i le aso… ua iai uma mea mo matou.

“I tai i Sogi pe a o’o i taimi timuga, se pei a o le mea lea tou te ta’ua so’o, o le nofoaga o lapisi. E manogi fa’asoloatoa ma palapalā ae sa onosa’i lava i nei tausaga e tele. 

“Lea la ua maua le fesoasoani mai le malo… e fa’afetai ai lava mo lea ofo manaia ua maua ai se amataga lelei tele mo matou.”   

Na ta’ua fo’i e Perenise, o le si’itia atu i Falelauniu, ua faigofie ai ona maua galuega a nisi o lona aiga, i kamupani e taulalata ane.

“I le amataga lava ina ua sau le vala’au e si’i mai i uta nei, na ‘ou mafaufau lava, atonu o le a matua faigata ona maua ni galuega a si a’u fanau, ae o le va’ava’ai atu i le fa’ateleina pea o kamupani ua iai i le nofoaga nei, ua matua faigofie ai mea uma. 

“E talotalo fo’i ia iai o se aso e vave fa’atu ai e le malo se a’oga i lenei ‘ele’ele.” 

O le tausaga e 2011 na ulua’i fa’alauiloa ai e le malo le fa’ai’uga lea, ia si’itia uma atu tagata o lo’o papaa’ao i Sogi i ‘ele’ele ua saunia i Falelauniu. 

Ona ofoina atu lea e le malo o fanua ta’i-kuata ‘eka i Falelauniu mo aiga uma i se tulaga fa’alisi ma avea ai ma a latou meatotino pe a mae’a ona totogi le tau o le kuata-‘eka e tasi, e $30,000.00 fa’atasi ma le $3,000 e tapena ai i uta.  

E tele aiga i Sogi ua talia le ofo a le malo, ae to’atele fo’i latou te le-talia.

O le Aso Sa talu ai, na tu’uina atu ai le talosaga a le tina ua 68 tausaga, o Tala Lei’ataua i le Ali’i Palemia, Tuila’epa Sa’ilele Malielegaoi. 

“Fa’amolemole, matou te fia nonofo pea i le ‘ele’ele lenei. O lo matou fa’asinomaga lava lenei sa galulue punoua’i ai tua’a ma matua e tanu le taufusi i le taimi o pulega a Siamani. Matou te manana’o e nonofo ai lava i’inei.

Afai e ‘ave-‘ese fa’amalosia e le malo, fai mai Tala: “’Ou te fai atu lava i le malo, e ‘eli se lua e tanu uma ai matou i’inei. ‘Ou te oti lava ma tanu ifo i le ‘ele’ele sa tu’uina mai e o matou matua ia matou.” 

O le aiga o le ‘olomatua o Tala, se tasi o aiga e tolusefulu i Sogi, sa folafola iai e le malo, le ‘ave’esea fa’amaloisi, ona ua tele tausaga o fa’atonuina e si’i atu i Falelauniu. 

O aiga ia sa lapata’ia mo le taimi mulimuli talu ai nei, a le-usita’ia loa, o le a ‘ave’esea fa’amalosi loa. Ua tu’u iai aso e 30 e tu’ua ai nofoaga o iai nei i Sogi. 

“E leai ma se uiga o nei mea uma ua ofo mai e le malo. E le taitai tutusa ma fetaitaina’i ma le afu a’o loimata o o matou matua sa fesoasoani malosi e tanu ma fa’aea i luga le taufusi e pei ona va’aia nei. 

 “Ua matou sauni fo’i e feoti i o matou ‘ele’ele nei. Ae a manana’o le malo e ‘ave’ese fa’amalosi matou, pule latou i le mea e fai. Ae matou te le’i tu’ua lenei nofoaga, ‘ou te fai atu i le malo, ‘eli se lua e tatanu uma ai matou ma a matou fanau i’inei.” 

I le fono a le Palemene i tausaga ua alu, na saunoa ai Tuila’epa, o le a fa’aleleia le nofoaga lea i Sogi pe a mae’a ona si’itia ‘ese i latou o lo’o nofoia. 

“E le taitai lava ia ‘ele’ele e toto ai ni fa’ato’aga mo aiga e fa’alagolago iai le soifua,” o le saunoaga lea a Tuila’epa. “Pau le aoga o nofoaga nei i totonu o le taulaga (pei o Sogi), o le fa’afaigofie o feoa’iga.” 

E silia i le 10 ‘eka ua fa’aagaga mo aiga e 33 o lo’o i Sogi e si’itia iai, e tofu le aiga ma le kuata-‘eka e fa’atau, o le fa’aaliga lea a le Ali’i Palemia i lena taimi. 

“O le a manuia ai latou,” o lana saunoaga lea. “Ma o le a tele ‘ele’ele e toto ai fa’atoaga e tausi ai aiga.”

© Samoa Observer 2016

Developed by Samoa Observer in Apia