Na o si Sipuni-ti lava

Tusia Fa’aliliu e Maiava ,

221 Hits

Toe mafaufau tasi lava… I le tausaga e 1919 fa’atoa mae’a le Taua Muamua a le Lalolagi, na pepesi ai le fa’ama’i o le kolera ma maliliu ai le afe ma afe o tagata i atunu’u o Europa.

Sa ‘auina atu e le malo o Peretania, foma’i i itu ‘ese’ese o le lalolagi e tau-sa’ili ai se fofo a’o ni togafitiga o le kolera. Mulimuli ane ina ua toe taliu foma’i sa ‘auina atu i Saina, sa latou ta’ua, e le’i maua le kolera i Saina talu ai, e muamua fa’apuna a latou vai, fa’atoa fa’aaoga ai.

E le’i ‘umi ae fa’asalalau e leitio ma nusipepa i Egelani ma fa’ailoa atu i tagata, ia fa’apupuna muamua vai-inu ae le’i inuina. Sa latou fa’ao’o atu fo’i lea ava fe’au i Motu o le Pasefika talu ai, sa iai pea fitafita Peretania i ia nofoaga i lea taimi.

Ae ui lava i lea, e le’i umi ae fa’alogo mai, ua pepesi le kolera i atu-motu ma maliliu ai le afe ma afe o tagata o nonofo ai. Na fesiligia ai e ta’ita’i o Peretania, tagata-nu’u o motu nei, pe sa fa’apupuna muamua a latou suavai-taumafa. Na tali tagata, IOE sa fa’apupuna muamua lava le suavai fa’atoa fa’aaoga ai.

A’o le faiga lenei sa fai ai. Sa fa’apuna muamua sina tama’i-vai ona tu’u lea i totonu o se fagu. Pe na o le fa’atasi pe fa’alua fo’i i le aso, ona ‘aumai le fagu lea ma inu ai na o sina sipuni-ti o le vai-fa’apuna, pei o le inuina o se vai mai le falema’i.

A mae’a, ona toe teu lea o le fagu ae mo le aso atoa, e feinu lava mai le vai e le’i fa’apunaina. O le mea tonu lena na maua ai pea le kolera ma maliliu ai tagata!

O le to’atele o tatou, o le mea lena o lo’o tatou faia ia Iesu Keriso. Tatou te le-manana’o e ola i ala o Iesu I aso ta’itasi, na ona tatou o i le i le falesa i aso ta’itasi o le vaiaso e fa’amalie ai o tatou tagata.

Ona tatou toe fo’i lava lea i o tatou lava ala, i isi aso e ono o le vaiaso. A fa’apea fo’i e le o tatou o ni tagata lolotu, e iai lava le manatu fa’apea, a tatou tama-lelei ma alolofa atu, o le a talia lelei tatou e Le Atua i le lagi pe a tatou tu’ua o le mea nei.

Ae le avea le sipuni-ti e tasi o le suavai-mama i le aso e tasi, e te maloloina lelei ai, pe na aso e tasi o le vaiaso e ola ai mo Keriso Iesu pe o le taumafai fo’i e avea ma tagata lelei, e matua le-taitai latalata i le tulaga maualuga o le Lelei a lo tatou Matai.

Pau le lelei o mafai ona soifua fa’atasi ma Le Atua Soifua, o le lelei-atoatoa, na o le lelei lava o mafaufauga ma manatunatuga, o  lagona, o ‘upu ma fa’atinoga, i le 24 itula o le aso, 7 aso o le vaiaso. Toe mafaufau tasi lava… 

© Samoa Observer 2016

Developed by Samoa Observer in Apia