Saunoaga fa’ala’ei-‘Au ua talafeagai lelei

Tusia Mata'afa Keni Lesa ma Fa’aliliu e Maiava ,

130 Hits

 ‘Ese le mata’ina o nisi o saunoaga a o tatou ta’ita’i i nai vaiaso ua mavae atu nei.

Mai lava i le amataga o le nofoa’iga fou a le Palemene ua iai nei, e ‘ese le fa’amalie-loto.

Silasila fo’i mo se fa’ata’ita’iga, le lu’i lea na fa’ata’oto atu e le Minisita fou o Galuega, Fela’ua’iga ma Galuega Tetele, le Susuga a Papali’i Niko Lee Hang, mo le Malosi’aga Tau ‘Eletise (EPC) ina ia fa’apau le tau o le ‘eletise. 

 “O le lu’i lea ‘ou te fa’atu atu mo le isi lima tausaga, o le taumafai ia fa’apau le tau o le ‘eletise ae maise lava mo aiga ma latou e maulalo tupe-maua,” o lana saunoaga lea.

 Mo le ‘aufai-Pisinisi tetele, latou te gafatia lava ona fai nisi ‘auala e toe fa’aola ai a latou tupe-fa’aalu, a o le tulaga lena ua taula’i nei iai le va’ai, ina ia fesoasoani mo le mamalu o le atunu’u e vaivai le tamaoaiga.”

O ai la e le fia fa’afofoga i saunoaga fa’apea?

A’o ai fo’i e le mana’o e fa’ataugofie le ‘eletise? 

O le mea moni, ua afaina tatou uma i le tau o le ‘eletise ma e tatalo malosi ai, ia taunu’u ma ‘ausia le lu’i a Papali’i. O le vave lava o le lelei fo’i lena. Leai se isi e toe fia fa’atali mo se isi lima tausaga, o nei lava – ae maise ai fo’i, lea ua matua taugofie le suau’u talu mai le fia tausaga.

O le isi Minisita ua mae’a ona folasia lona finagalo mo le atina’eina o Samoa, o le Minisita fou o Tupe, le Susuga a Sili ‘Epa Tuioti. 

Ae manaia le toe laga’i mai se’i toe silasila ma fa’afofoga iai, e talitonu lelei ai. 

“E iai lava lo’u manatu e ao ona silasila mamao, i luma atu, e le mo le taimi nei ma e tatau ona fa’ata’oto o se alafua mo le isi lima tausaga, mo le atina’eina o le tamaoaiga lautele o le atunu’u,” o le saunoaga lea a Sili.

“E tatau ona tatou una’ia ma fa’atosina o tatou tagata i ni ‘auala e mafai ona aga’i ai e atina’e o latou ‘ele’ele, aua e matua tele tele ‘ele’ele e le o fa’ato’aina ma fa’aaoga.”

Sa’o lelei lana afioga. 

O o tatou fanua ma ‘ele’ele, o la tatou fa’amanuiaga aupito tele lea ma e ao lava ona fa’aaoga tatau. Ina ia fa’atinoina lena mea, e tatau ona ‘alo’alo-‘ese mai le ituaiga mafaufauga fo’i lea, e na o le fa’atalitali i fa’amomoli tau-tupe mai aiga i fafo.

Ua tatau ona to’a’aga e galulue, matua galulue punoua’i.

Ae mo le malo, e iai fo’i la latou tiute ma le sao taua, e tapena ai ni faiga lelei e una’ia ai o tatou tagata ia galulue ma fesoasoani ai lava le tagata ia ia lava. E tatau i le malo ona sa’ili ni maketi mo fua-o-fa’ato’aga ma oloa e gaosia i Samoa nei. Ua tatau ona sa’ilia ‘auala o fesoasoani tau-seleni ia mafai ai ona fa’atu o ni pisinisi laiti e fa’aleleia ai le soifua lautele o le atunu’u.  

 “Ua tatau ona amata fuafuaga i le taimi nei ma galulue punoua’i ia tatou maua se Samoa tamaoaiga mo a tatou fanau, o fanau a fanau ma isi e mulimuli mai,” o le fa’aaliga lea a Sili. ‘

Na fa’aopopo mai fo’i, e taua tele le feso’ota’i, talanoa ma le lautele e iloa ai mea o lo’o latou mo’omia.

“O taua tele le vaega lea, e iloa ai atina’e e tatau ona fa’atino, e fua i mana’oga o lo tatou atunu’u; aua o mea uma lava e mo le manuia o o tatou tagata.” 

Mo le ‘aufaigaluega a le malo ma tupe faitele a le atunu’u, e fa’amalosi-‘au tele le silafia o Sili.

“E tatau ona toe iloilo ma silasila toto’a i faiga-fa’avae o tupe a le atunu’u,” o lana saunoaga lea.

“Ua tatou fa’alogo so’o i nisi o talanoa i ‘aitalafu i fafo, le mea lea e talanoa so’o ai le Vaega a le Tautua Samoa, ma lapata’i mai ai i le ono gau-a’ano, po’o le matitiva ma leai ni tupe ma vaega uma na. 

“’Ou te manatu e tatau ona matua fa’amautuina, ia tutusa a tatou tupe ma ripoti e faia. Tatou te le-manana’o e fa’atigaina tatou lava, ae tatau ona silasila lelei i le pulea o tupe ma fa’amalamalama lelei atu i le atunu’u.”

A talanoa loa i pulega-lelei,  fai mai Sili, o ta’ita’i lava e tatau ona ta’imua.

Ioe, Vi’ia Le Ali’i. 

Manaia tele ma fa’amalosi’Au.

Ae alo i outou faiva-manaia, o māmā na.

Manuia lenei Aso Tofi Samoa ma Fa’amanuia Le Atua!

© Samoa Observer 2016

Developed by Samoa Observer in Apia