Faaauau pea ona faateleina mataupu e lipoti atu i Leoleo

By Pai Mulitalo Ale 21 April 2016, 12:00AM

O le aofa’i o faalavelave tau solitulafono na lipoti atu i Leoleo o loo faateleina pea. Mo se faata’ita’iga, na faamaonia e le fofoga o le Matagaluega o Leoleo o Maotaoalii Kaioneta Kitiona, a itiiti mai o le 312 mataupu tau solitulafono na lipoti atu i le vaiaso ua mavae.

Mai nei mataupu, e 107 o mataupu ia o loo suesueina e Leoleo ae o le 204 o isi mataupu ua uma ona fo’ia-talua ai sa mana’omia e aiga na o se fesoasoani a Leoleo i le faagasologa o le taimi o ia faalavelave. Fai mai Maotaoalii o se vaiaso uiga ese lenei i totonu o le vaega o Leoleo i le taimi nei.

O se tasi o ia mataupu matuiā na lipotia i le vaiaso talu ai e aafia ai se toso teine.E tusa ai ma Maotaoalii, o lea faalavelave na tupu i le motu tele o Savaii.

O se alii e 33 tausaga le matua ua molia i le tosoteine ma o loo taofia o ia se’ia o’o i le taimi e tula’i ai i luma o le faamasinoga mo le fofogaina o lana mataupu i le aso 4 o Me 2016.

Fai mai Maotaoalii o lea soligatulafono na tupu pe tusa o le itula e 4:30 i le afiafi ma o lē na aafia ai ua uma ona ia faaulu se tagi i le ofisa o Leoleo i Tuasivi. O le isi solitulafono mata’utia na lipotia o le umia lea o laau faasaina poo nakoti.

Fai mai Maotaoalii o lea mataupu ua uma ona tuuina atu i Leoleo i le aso 9 o Aperila 2016 i le itula e 4:30 i le afiafi. Fai mai a ia o le alii ua tuua’ia e umi sina taimi sa tuli-mata’i ai e leoleo.

Na maua e Leoleo le 17 ma le ‘afa utufaga marijuana i lē ua molia. O lea alii e 42 tausaga le matua na saisai ma molia i lona umia o nakoti. Ua faatulaga o le a tula’i o ia i totonu o le Faamasinoga i le aso 2 o Me 2016.

By Pai Mulitalo Ale 21 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>