Saunoaga autu a le Paemia, Afioga Tuilapea Sa'ilele Malielegaoi

90 Hits

Afioga Tuilapea Sa'ilele Malielegaoi

Afioga Tuilapea Sa'ilele Malielegaoi (Photo: Samoa Observer)

Sa tau ilo lenei taeao pe tua ma ni ā, auā e le taumasina o tatou  mana’o ma le finagalo o le Atua. Peita’i, o lea ua mae’a ona momoli laau i Foga’a e le Ta’ita’i o le Sauniga ona o le Alofa faasoa mai o lo tatou Matai Sili, ua taunuu ai le faamoemoe i le asō.

Ua sila sa’aga nei le lupe o le taeao, ua mamalu ai Faleolo o le malu o Ma’auga i le si’u o le Alofi o Aana.

Susu lau Susuga i le Ta’ita’i o le Sauniga, Afio le Amepasa o le Malo o Saina, Afifio Afioga i Minisita o le Kapeneta, tainane le Afifio o Minisita Lagolago ma Sui a Faipule faapea Faauluuluga o Matagaluega ma Faalapotopotoga Tumaoti a lo tatou Malo, Afifio le mamalu o le auvalaulia.

Ua tatou aofaga potopoto i lenei taeao mo le tatalaina aloaia o le Nofoaga mo A’oa’oga ma Faaogatotonu i ai o Faalavelave tau-vaalele i Faleolo, faapea ma le fale Inisinia fou o le Pulega o Malae Vaalele.

O nei fale fou, ua tausaga o fuafua e le Pulega, ae faafetai i le Poloketi mo le fausiaina o Fale Faae’e / Faatali Pasese fou o loo faatupeina e le Malo Saina, o lea ua mafai ai ona faaopoopo i ai ma le fausiaina o nei fale tauā toe mana’omia mo le Pulega.

E 12 masina sa fausia ai nei fale e le Shanghai Construction i le tau e tusa ma le tolu (3) milliona Tala Samoa. Talu mai ona faatu le Pulega o Malae Vaalele i le 1986, o le taimi muamua lenei ua mafai ai ona faaseseese ni potu faapitoa mo a’oa’oga faapea ma le faaogatotonu i ai le faagaioina o se faalavelave faafuase’i tau-i-vaalele i Faleolo.

E 50 le aofa’i o le aufaigaluega e mafai ona faaogaina le potu mo a’oa’oga, ae 30 i latou e mafai ona ofi i le potu mo faalavelave faafuase’i. Ua faaopoopo foi i ai ma le potu fono / a’oa’oga se lua, aua polokalame o fonotaga ma a’oa’oga ua mae’a ona faataatitia e le Pulega.

O le fale Inisinia fou, ua mafai ai nei ona faatino galuega faaleleia ma faifai pea i totonu o lenei fale mo loli tineimu lapopo’a a le Pulega, sa le ofi i totonu o le fale Inisinia tuai.

Ia agalelei mai le Atua i le faaogaina lelei o nei fale fou e lua a le Pulega o Malae Vaalele, auā le alu alu i luma o lana auaunaga ma le tautuaina o si tatou atunuu.

Soifua ma ia Manuia.

© Samoa Observer 2016

Developed by Samoa Observer in Apia