Manatu o le Fa’atonu - Fete’ena’iga i Samoa nei

254 Hits

Tusia - Marj Moore

(Fa’aliliu e Maiava)

 

Si a tatou Samoa ua silafia ma iloa, tatou te fa’amemelo iai, peita’i o se atunu’u e anoanoa’i fa’aletonu ma le mau fete’ena’iga.

So’o se Samoa ao-uliuli e mitamita i lona fa’asinomaga na tu’u-a’ao mai e tua’a ua mavae, la ta aganu’u fa’aaloalo, o aiga-tu-tafa’itoa ma ana agaifanua masani, ua taili-so’o e le to’amalie ma le agamalu o tatou lagi.

O lo’o tatou soifua i se atu-motu ua fa’amanuiaina i ‘ele’ele lafulemu, lona tau malu ma si’omia e le Pasefika a’ao-foa’i ma alolofa ae tatou te fa’alagolago i taumafa-tu’u’-‘apa mo le soifua fa’aauau.

E anoano o tatou tupulaga malolosi ma talenia ae le o mafai lava ona tatou maua o ni avanoa faigaluega lelei.

O se atunu’u e matata’u ma talitonu o Samoa e fa’avae i Le Atua peita’i, o a tatou amioga mataga ma le mau solitulafono o fa’atinoina pea, e matua le ofo ai se tasi.

Tatou te ta-mau pea i le ta aganu’u fa’aaloalo, o tu ma agaifanua masani i le va-feagai ai ma tama’ita’i peita’i ua matafi le moni o ia mea.

O le mau lava lea a le au-matutua, e le tautatala ni tagata laiti ma le lagona fo’i ni o latou leo, ae mulimuli ane fa’asea ma tu’u-fesilisili pe mafua i se a ona fa’aletonu ma leai ni manatu e fa’aalia pe a fesiligia.  O lo’o fa’aauau pea ona tatou fa’alagolago i a tatou pa’aga ma uo i le lalolagi i fafo mo tupe ma isi fa’amoemoega e ‘auala mai ai mana’oga ogaoga mo a’oga ma le soifua maloloina lelei ae o lo’o pologa sauo’o e tau togitogi ‘aitalafu tetele mo nei fale-tetele le-aoga e fa’ata’ita’i ai fua tu ma aga a isi atunu’u malolosi.

Pei fo’i o le tele o isi atunu’u, e matua va-va-mamao lava atunu’u malolosi ma tamaoaiga, ma e matua matitiva. E fa’ateleina lava lea va i tausaga ta’itasi uma.  

I le tala i le itulau muamua o lau nusipepa lenei, o lo’o iai ata ma fa’amatalaga e foliga e matua fete’ena’i lava. 

O le isi tala o lo’o fa’ailo ai le fa’amanatuina e le Au Kerisiano o le Aso Sa o le Laupama, e fanau mai le afio’aga o Nofoali’i. Atonu o le ata lava lea i so’o se malumalu i Samoa nei i le Aso Sa ananafi.

A’o lalo ifo o le ata lea, o lo’o iai tala o tamaiti-a’oga sa a’afia i misa ma fusu’aga sa tutupu i le vaiaso talu ai. 

O ia tala uma, sa fa’asalalauina muamua fo’i i tala-fou: o le tala i le fa’amanatuga fiafia o le Aso Sa o le Laupama, a’o le isi o se fa’afitauli o lo’o fa’aauau pea i lo tatou nei atunu’u. 

Moni o le toe fa’asalalauina o nei tala e le-manaia, a’o fofo o le fa’afitauli ua ofoina mai e nisi, e ao lava ona toe silasila toto’a iai. Ae ‘aumai nei fautuaga, ae o lo’o ta’oto pea le mafuaga o nei vesiga, e le o iloa i le taimi nei, na mafua ai fusu’aga ma tau’aiga-ma’a i le vaiaso ua mavae.

O ia fofo e aofia ai le toe faia o fa’asalaga mamafa i totonu o a’oga: o le ‘ave o le ‘au-fa’atupu-vevesi i le fono a ali’i ma faipule o nu’u e fai iai ni fa’asalaga matuia mo o latou aiga ma nisi fo’i sa a’afia ai; o le fa’ataga o leoleo e matua sasa ma fue tamaiti-a’oga; o le tutuli o tamaiti mai a’oga po’o le va’ava’aia lelei lea o vaega fa’atali-pasi i le taulaga.  

A’o tatou talia la le fa’ailoa mai e tamaiti-a’oga o le mafuaga tonu na tupu ai le vevesi, e matua anoanoa’i le mau lagona fa’aalia o le ‘au-matutua, i le mafuaga o fusu’aga.

E aofia ai la le ta’ua, ona ua iloa e tupulaga laiti e iai a latou aia-tatau, ona aga loa lea e fa’atino i se isi ‘auala, ae maise fo’i la le taulu’ilu’i ma le tau-fa’afefe i luga o fetusia’iga i ‘auala ua iai nei. 

O le taimi nei la a’o tau fa’afilemu lea mata’upu ma fa’aauau su’esu’ega a leoleo, ua fa’ailoa mai le taofia ai o ta’aloga uma i le va o a’oga.   

Talu ai, o le tele lava o vevesi sa tutupu muamua fo’i, e mafua mai lava i ta’aloga, la lea ua faia ai e pule-a’oga lea fa’atatau, e taofiofia ai nei vevesi. 

Ua iai fo’i la latou fa’ai’uga, e fono i le Matagaluega o A’oga, Ta’aloga ma Aganu’u e sa’ili se fofok mo lenei fa’afitauli.

Ae matou te talitonu lava, e taua se sao mai Leoleo, o matai o nu’u, o matua ae maise ai lava, le ‘auai o fanau-a’o’oga a’o le’i faia o se fa’ai’uga ogaoga.

© Samoa Observer 2016

Developed by Samoa Observer in Apia