Tatalaga o le Nofoaiga lona 16 a le Palemene o Samoa

21 March 2016, 12:00AM

“E sosoo le loulouā ma le maninoa”

 

Ao o le Malo Samoa, 

Tui Atua Tupua Tamasese Ta’isi Efi

18 Mati 2016

 

Ua tatou feiloa’i i lenei taeao i le magafetau ola ona o le alofa tunoa o le Atua.

E molimoli atu le faamalo ma le faafetai iā te outou uma ua pale mai i lenei faigapalota auā e lē faigofie;  e moomia le pulunaunau, le tinoū ma le ma’elegā.  Faamalo atu fo’i i o tou itumalo, aiga, nuu, uō, ekalesia ma tou paaga totino – i Samoa nei faapea ai ma fafo atu.

O le tulaga ta’ita’i e lē gata o se tulaga taualoa, a o se matafaioi.  Fai mai e lē iloa le ta’ita’i lelei i le taimi o maninoa ae iloa le tofa ma le agavaa i le vaitau o fītā ma tofotofoga.  O le tatalo faanaunau, ina ia ‘alofia ni to’atūgā matuiā; a o lea tatou te iloa lelei e lē mafai ona ‘alofia lu’itau ma tofotofoga.

I le aso 26 Me i le tausaga ua tuana’i, na saunoa ai le alii Palemia i le Tala o le Tupe, ia fuafua le faasoa i le tatou tupe maua.  Sa ia fautua mai, o le tausaga nei, o le a lauama tootoo, ona ua ‘uti’uti le faasoa ona tolaulau mai ai lea o le tele o galuega ua faia e le Malo i le lima tausaga o le nofoaiga.

Ona ia faataatia mai lea o lana fuafuaga o le tupe faasoa faapea ai ma galuega o le a ave i ai le faamuamua.  O le fe’au ma le galuega a le Palemene 16, o le aiaia ma faatino mo le manuia o le Malo ma le atunuu, le polokalame lea ua faataatia.

O le matafaioi a le Palemene, o le galulue felagolagoma’i ma vaega uma o le Malo,  ina ia saogalemu le polokalame ua faataatia.

E fia afea i se faa’upuga le galuega a le Ofisa o Faigapalota, i le faamalamalama  i le ‘au palota, pe aiseā, o afea, a o fea tonu e faatino ai le faigapalota.  O le faatuatuaina o le galuega a le Ofisa o Faigapalota, o se tasi lea o poutū o le faigamalo ma o le malu fo’i lea o le Tulafono.

O le galuega a le Ofisa o Faigapalota, faapea ai ma leoleo, ma ē sa lagolagosua,  ua maualafia ai  se faigapalota e pulea ma to’afilemu.

E tulaga’ese le nofoaiga Palemene 16 lenei mai isi nofoaiga Palemene.  E lē gata ua sili atu le fuainumera o Faipule tama’ita’i, a ua sili atu le fuainumera o Faipule fou i lo le fuainumera o Faipule tuai ua toe fo’i mai.  Ma e matilatila le ‘ese’esega o Faipule fou ma Faipule tuai ua toe fo’i mai.  Atonu o le a maualafia ai i lea mea ona toe fuata’i se fuafuaga, e lē gata i mataupu sa gafa ma le Palemene i taimi ua tuana’i, ae faapea ai fo’i i nisi mataupu fou ua tula’i mai.

E talitonu e lē motusia le tuualalo a Ta’ita’i o Ekalesia iā te outou, faapea ai ma le ‘au faipisinisi, le ‘au fai nusipepa, malo mai fafo ma faalapotopotoga faavaomalo.  E talitonu e tausoa le tou ‘avega auā e ui ona o outou e faatula’i mai ma pasia tulafono, ae avanoa ona soalaupule ma outou uso Faipule i le maota faapea ai ma Komiti ma Komisi.

E tausoa le ‘avega pe a soalaupule e avanoa ai ona talanoa faalaua’itele ia fuafuaga a le Malo e faapea ai ma fuainumera ma mau e lagoagoina ai.  Ma o le soalaupule lenei, e malupuipuia ai malo faatemokarasi atoa ai ma le Tulafono.

E opogi e le Tulafono Faavae ia faigamalo faatemokarasi faapea ai ma le mau tuufaasolo a o tatou matua atoa ai ma le mau faakerisiano.   O se tasi o galuega a le Palemene, o le puipuimalu lea e lē gata i le mau tuufaasolo a o tatou mātua ae faapea ai ma le Tulafono Faavae.

E ono sui auā o suiga o se vaega ‘autū lea o le natura o mea ae ao fo’i ona tatou lauama tootoo auā e ono mafai ona faaaogā sesē ia le suiga o mea.  E ao ona tatou malamalama  ma manino  e mafai ona faaaogā ia suiga e soli ai le tulafono ma pule sauāina ai tagata.

O suiga  o le tau o se tasi lea o faafitauli ogaoga o loo feagai ma le lalolagi. Ma ua maitauina ma le fiafia i le Tala Faatatau o le Tupe ia se tupe o  loo fuafuaina mo le faafitauli o le tau.

Ou te fia sii mai upu o le Tusi Paia, Faata’oto mataupu e 8, Fuaiupu e 12, O a’u o le poto, ma te mau ma le faautauta; ou te maua fo’i le poto i mafaufau.  Ou te faauigaina, afai e alala Keriso i o tatou loto, na te ta’ita’i tatou i le faautaga lelei.

Afai e taunuu fītā ia e valo’ia e le Tala o le Tupe i le tausaga ua tuana’i, e ao i le Palemene ona sa’ili le faautautaga lelei.  Le faautautaga lea e momoli mai e le muagagana, e sosoo le loulouā ma le maninoa.

O lona uiga, ‘aua le sona gaseā, o loo aga’i mai le laolao o le Alii.

Ia manuia la tou faigamalama i le 5 tausaga o i luma.  Ia malamalama ou mata e pu’epu’emaua le faautaga a le Atua; e te lē malaga na o oe; e te malaga ma le tapua’iga ma le faitalosaga a le atunuu, o ē na mua i malae, faapea ai ma ē o loo i lalovaoa. Ia muaau, muli’au le Atua i la tou faigamalaga!

Ma le agaga faaaloalo, ou te faasilasila atu ai, ua tatala aloa’ia le Nofoaiga lona 16 a le Palemene o le Malo o Samoa.

 

Soifua

 


21 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>