LAUGA - “Ua latalata ia, ua silafia e ia le aai, ona tagi ai lea o ia”

21 March 2016, 12:00AM

(Luka.19:41)


O le aso lenei e faamanatu mai ai leo o le mimita, o le faagaeetia, o le fiafia; ae iai foi ma leo e filogia. O leo e lualuagia, o le amusia, o le lamatia, ma le oti ua valoia. O leo eseese ia ua nanamu ai i le oti Ierusalema. Le aai e pēlē ma mamāē i soo se Eperu e oo lava ia Iesu fai mai Luka, “ua latalata ia, ua silafia e ia le aai, ona tagi ai lea o ia” 

Tatou te le o maua i faamaumauga a le Tusi Paia se taimi na ’ata ai pe soisoi le Alii. A o molimau o lana tagi, oono, mafatia, ona o le tiga alofa. Ua le o se taimi muamua lea o Iesu e sōlia ai eleele o Ierusalema. Peitai, o le uluai taimi lea o sana malaga faatupu e asia ai le aai nei. O le malaga faitaulia; e aloa’ia, e faaaloalogia, e viia, auā o le Tupu na valoia. Ae talofa e, e leai lava se mea o nei mea na taulia.

Ua le i amana’ia. Ua le faatalia, a ua faasinosinomia. Auā na valoia e Ioane, ua pupula mai foi le malamalama i le pouliuli, ae le i talia e le pouliuli. Ua maliu mai o ia i lona lava nuu, ae le i talia o ia e ona lava tagata (Ioane.1:5-11). O le latalata o loo tā’ua e le tusitala, o faalogona faale tagata. O le mafanafana o le mafuta faatasi, femalamalamaa’i, ma fefaasoaa’i. O sootaga faa- tagata i le tagata. O tāūa ia, e le o maua.

E le i lagona e le pouliuli le ola fou mai le mafanafana o le malamalama. E tu segi le tagata o le pouliuli. E ’alo vao le fefe i le malamalama. Ua le eseese ma lama moliuila a le au fagogota a le atunuu i lona gataifale i po uma. E taia loa mata o le i’a i le malamalama o le moli pei o le oso a le loketi. O le latalata atu o le Alii i le aai, o le atili mamao ai lea o le  vaai a nei tagata i le faaolataga. O la le tusitala, ona tagi ai lea o ia.

Ua fia tausaga o ’e faamanatu lenei Aso Sa tāūa? Ua le o se malaga faa-tupu e asia ai aai ma faoā aai. A o oe, le taufale mau i le aai. E le i tagi Iesu ona o le taumamao o le aai; a o lou tu segi i lona saili atu ia te oe. Ua e le sauni ma tapena i lona afio atu i lou olaga, a ua e faasaga ese ma ’e le fia faalogo ina ua e maua sina mea. Uso, e le i utu loimata o le Alii. Aisea? E mătua fai tama. O loo fia maua oe. O lana asiasiga mo lou faaolaina.

O lana malaga faa-Tupu, ina ia fai oe ma atalii ma afafine o le Tupu. Alo mai se i tali ou toga. Se i e molimauina le silisili ese o lona alofa. Le Tupu o tupu na ia saunia lou saolotoga. Le saolotoga na maioio ona saili e ona loifofoga. O loifofoga o le alofa. Ioe, ina ua e le moe manatunatu i taeao o lou ola. 

Lua, ua silafia e ia le aai. O le fanua ma ona tapuā fanua. O le nuu, o ona tapunuu, o ona tagata nuu. O le tagata ma ona siomaga. E leai se mea na lilo. O manatunatuga ma loto uma lava, o upu foi ma galuega uma lava, ua silafia e ia. Fai mai Luka, ona tagi ai lea o ia. Aisea? Ua mele manū! Ua faatalalē i meaalofa o le  alofa tunoa! Ua fainaelo i faamanuiaga a le Atua! Ua faasausili i si poto ma si malosi ua maua!

O le aai e faamemelo iai (Sala.137:5,6). E sisi lava le faamalama i tulimanu e fia o le lalolagi ae faasaga iai. O le aai na tofi. O le faa’autagata o le faaolataga. Na osi ai e le Atua le taulaga. O tagata o le feagaiga. E faalupe o le nuu o le Atua! Fai mai Luka, ua silasila atu o ia i le aai; i tagata; i le feagaiga, ona tagi ai lea o ia. Talofa e, o moomooga le taunuu, e faanoanoa ai le loto. Faamoemoega le taulau, manu’a ai le mafaufau.

Samoa e, ua leva ona tutulu le Alii ona o oe. Poo e iloa o loo taugā lou ma’ema’eā ma lou sauā i le Alii? Poo e iloa ua faitaulia e le lalolagi lou ola faafoliga i au tapuaiga ma lou le alofa i le uso a tagata? O le asō, oka, se leo mălie o lau ‘Osana’, a o lou olaga o aso  uma e matautia le leaga. Ua atu fia ona e faatuputupu vevesi i mafutaga? Ua e amio a’i i le pepelo ma le taufaaleaga. O lou faama’ite ae lafi i upu ma tala.

O le tusitusi lima ma le manatu faatauvaa. O le vaai maulalo ma le faailoga tagata. O le alofa i upu ae gagau i le faasala. O le fai amio, ae faalata. E televave i le falesa, ae siamupigi i le fai upu masoā! E folafola le alofa o le Atua, a o mea e faufau ma fuafua e alualua. E le o Ierusalema na mafatia ai le Alii. O oe! O oe o loo ainā ai le aai. Oe o loo e fai upu ma fai tonu ai. Oe o loo tuualalo ma faufautua ai. Oe o loo iai le pulega. Oe le malosi; tupulaga ma fanau, o oe na tagi ai le tupu o le lagi ma le lalolagi i le aso lenei. A o ai oe? O ai oe lou le ‘ano’ano ua tutulu ai le Alo o le Atua?

Samoa ua pale mai i faiga filifiliga o lenei paeaiga, pupula ou mata. Vaai i mea o loo tutulu ai pea le Alii. O lou avanoa lenei. Tautala i le amiotonu ma galue i le alofa o le Atua i tagata uma. Ua na o le feto’ai solo ma le anoano o fanau le a’o’oga o faatau savali solo oloa i le taulaga.

Ua faasoloatoa nei fanau i le ao ma le po! O le mau alualutoto faamomoi loto e ‘aisi ma augani e faatau le niu, le salu, le pulutaele, le tauaga, le afitusi! Talofa e, poo e iloa o mea ia na tutulu ai Iesu?

Pe le o le leotetele ea lea o le mativa ua faafofogaina e le Atua i totonu o Samoa? Pe le o se faailoga ea lea o le oi ma le oono ua gagana mai ai nei alualutoto? A o a ea tou mea o fai? O  nisi o outou ua faufaulalai mai pei ni kalone 44, a o lele e ‘ai samu solo fanau a le atunuu ua oo lava i le pogisa! Se a e le mafai ai ona susū mai i lalo e samu faatasi ma nei tagata ola? E le mafai ona tatou lalafi i ni a tatou upu ona o lea e vaai iai i aso uma ma taimi uma.

Le au uso e, e mafai e sau auaunaga ona taofi loimata o le Alii? E te mafaia? E faamata o lou tulai mai i lenei paeaiga e foia ai le oono o le tagata mativa, ma taofia ai taua ma misa a fanau aoga ma aiga? E te mafaia i lenei paeaiga ona faamaopopo ma faaleleia le tele o matagaluega a le mālō, o loo masofasofa pea ma felamata’i ona o le faaufiufi o le agasala? Afai e mafai, fai nei loa, mea manū o le i faasavali maia le faatauina o fofo’e, ma ‘asi, ma valusaga, ma mele’i a le fanau i lou taimi. 

Uso e, nei e mele manū! A o manū e fanau mai ai le manuia o le olaga nei ma le ola atalī. ‘Aua ne’i faaluaina e Iesu ana upu ia ia te oe, “Ana e iloa, o oe lava i lenei lou lava aso, o mea e te manuia ai!

A o lenei ua lilo ia te oe. Auā e oo mai ia te oe ona aso e tanu ai le mea mautietie e si’o ai te oe…latou te faagatasi foi ia te oe ma le eleele, atoa ma lau fanau i totonu ia te oe…auā ua leiloa e oe ona po ua asia mai ai oe.” (f.42-44).

Uso e, ia vaoia loifofoga o le Alii.

Amene

7737063

E-mail: [email protected]

21 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>