LAUGA FAAMANUIA MAI LANA AFIOGA I LE AO MAMALU O LE MALO O SAMOA I LE 90 TAUSAGA O LE TINA: LOTE CHAN MOW

21 March 2016, 12:00AM

E fua le ‘anava a se aiga i le toe ‘ulutaia auā e talatuu mai le matai o le aiga ona ua avea lava le toe ‘ulutaia ma faailoilo.

O Lote o le toe ‘ulutaia o le matou aiga.  O a’u nei, o se matai o le aiga o Lote.

E faapefea ona iloa le toe ‘ulutaia?  Atonu e lelei ona amata mai la’u tala i le upu “toe ‘ulutaia”.   E māfua ona o le laau o le ‘ulu ua leva, ua mapo, e ta mai e fai ai fau o fale.  A lolo’u e lē fati pe gau.  

O Lote o se tagata e amio malū ae lē malūvale.  O lona uiga, e mālū  lana tautala ma lana amio.  Ae a iloa e Lote se mea e sesē, e lē fo’i lana ‘ote, lana fautua ma lana faatonu.

O le loomatua fo’i, pei se faailoilo o lenei aiga.  E te iloa gofie ā o matou aiga, i le auai o Lote i faalavelave.  O se molimau lea o lona fai aiga lelei.

Sa i ai Lote i le taupulega ma le faatinoga o lo’u matai.  E oo mai i lenei aso, ou te molimau atu, e lē faatafa le loomata i lana lagolago iā te a’u ma le aiga.  O se tagata e lotomau ma lototele.  E māfua ona ou fai atu, ona o nei aso, e ao lava i pisinisi ona fuafua lelei ia le vafeagai ai ma ē o loo faia le Malo. 

Ae tainane ou te lē maumalo, ae lē faatafa pe fo’i Lote i lana lagolago iā te a’u ma le aiga.  O se mea lea ou te manatua pea ai le alofa ma le faamaoni o Lote.

O ā ni molimau o upu “toe ‘ulutaia”?   O le molimau e sili ona malosi, o le fanau.  O se tasi mea manaia o lenei po, o le to’atele o le fanau-fai a Lote e nonofo solo i le lalolagi, e tilitili alualu mai e auai faatasi i le faamanatuina o lona 90 tausaga.  E māfua ona e manatua pea le alofa.

O isi molimau, o lana ia fanau totino ma fanau a ana fanau.  E ma’eu le manuia o ā latou a’oga faapea ai ma ā latou pisinisi.  A o le mea sili ona manaia, o le latou alolofa, le ‘ai’aiuli ma le tausiga i le tinā.  O le agavaa aupito tāua lea, auā fai mai upu o le Tusi, Ia e ava i lou tamā ma lou tinā, e faalevalevaina ai ou aso.  Pei o se puna o le fiafia ma le ‘oli’oli le mafutaga a le tinā o Lote ma lona aiga.  O le a’oga sili lea mo i matou, o matai o loo tausia le aiga.

Ua aga’i fo’i ina ou matua ma e pei o le aga a tagata matutua, e te tuufesili:  Po o le ā le lumana’i o lenei aiga?  Pe faapefea le ‘anava ma le ‘iliai’a?  O se mea e faagaeetia loto le mea lea ou te vaai atu i ai. 

E mafai e Lote ma le fanau ona totogi tagata e omai e gasese i le po lenei, ae lē o faia lea mea.  Auā o lea tatou te vaaia, o ē ia e gasese, o lana fanau, ma fanau a lana fanau, ma fanau a fanau a lana fanau.  Auā fo’i o le mau a o tatou mātua ma le mau a le Tusi Paia, e te maua le faamanuiaga i le gasese. 

Afai e tumau pea le agaga lea i totonu o lenei aiga, e lē fāoa le ‘anava ma le ‘iliai’a. Ua uma fo’i a’u upu.  Ou te valaau atu i le ‘au valaaulia:  Tutula’i mai tatou te faamanuia le aso o le tinā o lenei aiga.   

“Ia Lote, ia manuia lou aso fanau! Ia toe faaopoopo e le Atua ia nisi tausaga se tele.  E lē māfua ona fai atu ona o se upu avane ai.  E māfua ona o le tatalo faanaunau i le Atua, ia alofa ‘aua ne’i vave aveina lo matou tinā, ona o ia o le toe ‘ulutaia, o le faailoilo o le ‘anava ma le ‘iliai’a, ma o le faasinoala i mea lelei.”

 

Ia manuia lou aso!

Soifua

21 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>