TUPU’AGA O TAGATA SAMOA

21 March 2016, 12:00AM

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer.

O le mea moni, na toe mamulu ese foi mai le Tuamasaga le vaega i Matu o Atua- ona o ia taua; ma ua taoto ai pea le tuaoi o Laulii ma Luatuanuu e o’o mai i aso nei. Ae peitai, sa tumau pea isi sootaga e o’o mai lava i le taimi nei.

O le 1894 na ‘au faatasi ai le Alii o Tagaloa o Saoluafata ma Malietoa i le taua a Uso o Atua ma Atua e pei ona fai e Falealili. Ae mulimuli ane, ona o sootaga vavalalata ma Falealili, o lea na avea ai ma sulufaiga o le Aiga o Malietoa ma faaauau ai pea se’ia pa’ia le 1899- lea na tuua ai e isi aiga uma lea sootaga.

O lea sootaga a Aiga Tupu sa mafai ai ona maua ai  le fesoasoani mo taua; e le mafua mai i feusua’iga a tamalii ae ona o usuga a tamalii o ia itumalo i o latou alo tama’ita’i- aemaise ai lava pe afai o le tina o lea tama’ita’i- o se alo o se alii tele o lea itumalo. E faapea foi le tulaga o Manono, ona o le avea ma aiga o Malietoa, o lea sa faaigoaina ai -o Tulafale o Aiga i le Tai. O le pogai lea e taua ai tele usuga a tamalii i alo tamaitai o aiga tetele- ona o iina e fua i ai upufai ma upu o le va nonofo ai. 

O le pule a alii o le Aiga o Sa Malietoā sa le’i mautu lelei i lena taimi ma ua na o se malamalama sa latou maua e uiga i ia aiga ua fesootai o latou gafa. Sa matua faatauaina tele sootaga ma le Tuiaana mai le laina o le Tupu Tuiatua lea sa logologoā i lea taimi- ua pa’i i ai lo latou gafa.

O lea ua gau le amo o le pologa mai tagata Tonga, ma ua toe maua e le Tuiaana le pule atoa e ala ia Tuiaana Vaema ma Tuiaana Sagate -ma ua tulai mai ma Tuiaana Tamalelagi, le suli o Tuiaana Uotele, lea na pale ona o le fesoasoani a lona tausoga o So’oa’emalelagi ma na nofoia ai le nofoalii. O le alo tamaitai o Tamalelagi, o le tagata muamua lea na ia umia suafa e fa-lea o loo ta’ua pea i aso nei o le “Tafa’ifa”. E tofu ia suafa ta’itasi ma lagolago e lua- ia a o’o i taimi o sauniga tetele a le atunuu -ona taufai nonofo lea i ona tafatafa.

O ia la tagata lagolago sa faaigoaina o “Tafa’i poo Tu’itu’i.” E pei lava o isi tofiga aloa’ia i totonu o Samoa-o mamalu foi ia o nisi aiga -ma e faatino lava e i latou o tauaveina ia suafa o lea aiga.

Mo le suafa Tuiaana, o tofi ia e faasino ia Umaga ma Pasēsē; mo le Tuiatua-o tofi ia e faasino ia Tupa’i ma Ta’igau; mo le suafa “Gatoaitele” o tofi ia e faasino i Tulafale o Fata ma Maulolo; mo le suafa “Tamasoalii”-o mamalu ia e faasino ia Fuga ma Mauava o Safata. O le ‘Tafa’ifa’ -e fa nofoa o lona malo e tufatufa e i latou lava ma le Tupu-e pei o Leulumoega ma Lufilufi e nonofo i lona itu tauagavale; o Afega ma Safata e nonofo i lona itu taumatau.

O faailoga ia o le faiga-malo moni faa-Samoa- e pei ona faavaeina- mai le taimi o Nafanua, poo le tausaga 1500. Sa masani ona taiulu Aana i le faae’eina atu o le suafa Tuiaana; ona soso’o ai lea ma Atua; ona soso’o ai lea ma Afega ma Safata. Ae o Salamasina le Tupu Tamaitai muamua o Samoa, na pa’i i le suafa -ona o le tele o ona sootaga tu’usa’o i le tele o Tuiaana, o lea e tatau ai ona ta’ua faapitoa o ia; Fonoti, Muagututi’a, Tupua, Galumalemana ma I’amafana. Ae o le itu lava e ao ona ta’ua, o le aloa’ia o nei Tupu uma, na mafua mai taua ma le faamaligi toto.

O lea na tuuina atu ai e le Tupu o Fonoti le pule ia Faleapuna ma Fagaloa- e faaigoa ai lo latou itumalo o le “Vaa o Fonoti “talu ai lo latou totoa i  taua ia na mafua ai ona mautu lona malo. O lea foi e mafai ai e Tupu o Samoa ona fai “tofiga.” 

O Tupua, o ia o le atalii fai o Muagututi’a ona o lona tupuaga mai le Aiga o Safenunuivao- lea e aofia ai Falefa ma Salani i Atua, o le aiga lea o lona tina.Talu ai ona o le tele o sootaga a lea aiga i le Tupu Tama’ita’i o Salamasina, o lea e tatau ai ona faapea -o ia foi o le suli o le Aiga o le Tuiaana. E tatau foi ona ta’ua i lenei taimi le isi aiga i Atua na faavae e Salamasina o “Salevalasi” poo le suafa taupou lea a le Aiga o Tonumaipe’a i Satupa’itea -lea na tupuga mai ai So’oa’emalelagi. O le Aiga lenei o Salevalasi e faamautu i Lotofaga ma Lepa- ae i ai foi sootaga a lea Aiga ma Fagaloa, Apia ma Iva i Savaii.

O le pogai lea e mafai ai e Mataafa lea foi e tau i lea aiga- ona ‘ausia ia tulaga mamalu. O Tupua, le atalii fai o Tuiaana, ona o le lagolago a ia aiga e lua, na mafai ai ona ia faatoilaloina le tele o fili e ala i lona tamaoaiga tau ietoga, ae ao foi ona manatua- e le tutusa alo uma o tamalii o Samoa, ae o ana aia ma le tamaoaiga o aiga o lona tina -e faavae ai le tonu a e faae’eina atu ia suafa mamalu o le atunuu.  Ia manuia tele le Aso Sa ma le faagasologa o lenei vaiaso.

21 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>