LAUGA - “O le Faamoemoe ola”

21 February 2016, 12:00AM

Tusia - Petaia Setu


E! ta le lavā! Dad, ta fia mālōlō! O le oi taumusumusu lea a si o’u toalua ina ua sefulu ma le lua tausaga o feagai pea ma le ma’i. O le leo o le mafatia. O faalogona o tiga. O le oi ma le oono sa tauave toatasi. Tainane o lona faamoemoe i se lavea’I, o i le lagi.

Talofa e! Fai mai Luka, e sefulu ma le lua tausaga sa mafatia ma pologa ai si fafine lea I le puna toto. E ui ua mativa o ia ona o lona ma’i (f.43) e le maua se lavea’i, ae sa le i vaivai ai le finau ma le saili a lenei tina. Sa ia te ia pea le faamoemoe. O lona faamoemoe mautinoa, o le faamoemoe ola.

E le o se ma’i faigofie.

A o le loto e talitonu ai sa faigofie. E ofo i nei foma’i ma nei taulasea e iloa lava e le o aoga iai a latou togafitiga, ma e le o sona ma’i, ae fai lava le faalē alofa! E ā le ma’i e faataugā ma faavaivai le tinā, ae a nei foma’i ma taulasea e saga faamativa pea le mativa. O le tala lea a Luka, ua uma atu ana mea i foma’i – ae leai lava se suiga! Faafetai i le toa o lenei tinā. Uma tupe, uma ana mea uma faapeapea atu ai ma le malosi o le tino, ae le oge i le faatuatua.

O le ma’i e faaeteete gata, ae lē i nofo; e lē i mā. O le faatuatua na alu ai i le tumutumu o tagata. E le i poi i le motu o tagata ma tulaga faigata o lona ma’i, ae ua faaofiofi ma faavāvā atu, a o lē maua sona avanoa ile Alii ae tau ia ina pa’i atu i se pito ofu o Iesu. Oka! Telē tele le  fatu o lenei fafine. 

Na iloa e le fafine, o Iesu o le Faaola. Ua logologoā tala i vavega e tele ma le manomano o ma’i ua faamaloloina e Iesu. O lea foi tumutumu, o le vevesi ma le tapisa ile ofo ona o le mana o Iesu ua tulia solo ai temoni. I le ua mautinoa e le tinā nei, o le to’aiga lea o ona tigā.

O le taualuga lea o lona faamoemoe. E taualuga i le manumalo. Ua na maua le pito ofu o le Alii. O le tagata finau. E le i faavaivaia ele ma’i, ae ua ia iloa lona lavea’i. Ua mautinoa lona faamoemoe, e ola. Le faamoemoe lea na silafia lelei e Iesu le sa’o ma le faamaoni. Ae ua fia faailoa I luma o le lalolagi, le faamoemoe ola, le faatuatua ua moni. E ui ina tumutumu ma fetaomi mai le motu o tagata, ae na lagona e Iesu le oi e faamaoni. Le tagi a le mativa. Le oono a le tagata mafatia. Le naunau mai o le tagata ua lē amana’ia. Na lagona lelei e Iesu le tigā o le tagata ma’i. Ma’i i le tino, ma’i i le mafaufau, ma’i i le agaga.

Samoa, ua fia tausaga o feagai oe ma le ma’i? A o e iloa lou gasegase? O le toatele o tatou e malo solo ane i ‘o ma ‘o ae la e ma’i. E femasaua’i lava ma le lē iloa e ma’i! E leoleoā solo i le aiga ae la e ma’i! E toaga e tautua ma alu i le lotu ae la e ma’i!

E leotele i potopotoga a le nu’u ma malomaloā i fono a le palemene a o la e ma’i. E faamamapo mai ma le pelaue ma lauga mai i tagata a o la e ma’i! O le mea sili ona faigatā, o lou leiloa o oe e te ma’i. E lelei si tinā lea e tasi lona ma’i; na te iloa lelei foi lona ma’i.

A o le itu sili, o lona mautinoa lelei o lona faamoemoe ma lona taunuuga. E le i faia ma le masalosalo. Ua taumafai atu soo se mea lava o Iesu e pa’i atu iai, ua lava lea mo le sefulu ma le lua tausaga sa mafatia ma pologa ai. O le tala, ua saili e Iesu le tagata ua na vavae ese mai le ola nai le mamalu o le Atua. O le Keriso manumalo ma mea uma o ia te ia ua iai le ola. A o le ola e matala i le faatuatua, faapei ona oo le mana faaola i lenei tinā. 

Samoa, e ui ina tulaga faigata lou gasegase, ae o iai lava lo tatou faanaunauga i le ola. Auā o le upu moni, ua tafea i le au a tatou measina ma mea totino, o le aganuu ma lo tatou tofi, a ua le maua ai lava so tatou saolotoga moni.

Fai mai Luka, ua uma atu ana mea i foma’i. Fa ‘ita lava e malolo ia Ausetalia poo Niu Sila, ae ua atili ai lo tatou tigaina! Fai mai fo’i e foma’i Saina ma Iapani, a o lenei ua masoa ai tagata i oono, ma alu atu ai a ma le toto! Fai mai le fomai nei o Luka, ua le mafai ona malolo ai le ma’i i se tasi o nei foma’i. O le fesili la, O ai e utu iai lou ma’i Samoa?

Afai la ua le mafaia e atunuu ia ma faalapotopotoga mai fafo, a o ai la e to’a iai le atunuu? A leai loa se toto o lona uiga ua ui le ma’i! E le o le oti lea na vaai iai le fafine lea Samoa. E le i faitaulia e lona mativa se tulaga ui o lona ma’i. Sa vaai i le ola. Tautala i le ola. Talitonu i le ola. Ua na ave le ola nai ia Iesu! Aisea? O lona faamoemoe o le ola. O lona faatuatuaga o le Alii o le ola. O le tala, ua utu lona puna toto. Sa’o le sailiga; sa’o le foma’i; sa’o le faamoemoe.

Samoa pele e, Talofa e, ua feta’omi mai le mau faalapotopotoga mai fafo; o le mau poto ma le mau filosofia eseese, ua e omia ai, ma e ioe ai i le lalolagi, ae le fo’ia ai lou ma’i. Ua e lē galue; augatā e savali, a ua e oi faatalitali i se lavea’i. Na uma tupe ma mea uma a le fafine lea; ae le i uma lona ola finau ma lona tau saili. La lea ua aumai le tali o le faamoemoe ua tini, ua ola i lona faatuatua saili i le mana o le Alii.

Uso e, ua le o le ma’i ma lona taimi umi e tāua, a o le loto sa i le fafine. E le o le punatoto e faamamafa, a o le faatuatua ia Iesu Keriso ma lona mana. O lou faavae Samoa o le Atua. Ua e sii ma’i i malo ma atunuu I fafo, o faalapotopotoga ma fesoasoani eseese mai le lalolagi, a o loo tatou nonofo ma lo tatou Faavae, o Lē na faia le lagi ma le lalolagi ma mea ua tumu ai! Ua na o le gata e fasia ae pupula ona mata.

Taitai e, o le malo ma ekalesia, e tasi lava lo tatou foma’i. Ua na o ia lava e tali i o tatou mana’o ma na lavea’i (Galuega 4:12) o Iesu lea. Na mapu iai tiga o le fafine nei. Na maua ai lona sa’olotoga. E te silafia Samoa o le manu’a ogaoga lea sa matuā tiga ai le finagalo o le Atua. O le nonofo ma Isaraelu ae asamo Isaraelu I isi malo tuaoi! E tausi e le Atua ae tago’au i pulega a isi malo! O le ma’i leaga lena o tatou ua leva ona eloeloā ai le fogaeleele.

Saili sou avanoa e te pa’i atu ai i le mamalu o le Atua, ona faamamaluina ai lea o oe e le Atua. Faaavanoa se tuupao o lou olaga mo Iesu ona e saoloto lea i mea uma o lenei olaga. E te fiu e la’u mai Saina ma Iapani ma metotia eseese mai fafo, e le maua ai se fofō o lou ma’i. E oso atili ai le faama’i valea ma le maasiasi. Uso, fai mai Iesu, o a’u e malōlō ai outou (Mata.11:28). E te le maua sou to’a i se isi lava poto poo ni au pulega faapolokiki, toeafe! Tau lava o le tuupao o le ofu o Iesu, uma. Uma ma’I; uma faafitauli; uma faigata; uma le oi ma le oono; uma le mativa, le faanoanoa, le masalosalo, le popole ma luitau eseese o loo faasasaga mai I lau malaga i lenei tausaga.

Samoa, e saili e Iesu le tagata e telē lona loto. O lona uiga o le tagata e faamaoni lona talitonuga. E le lilo foi ona segia o le mana i lē ua tonu lana sailiga ma lona faamoemoe. O lagona ia o Iesu e ui i le tumutumu ma le fetaomi mai o tagata. Ua alu atu le mana. Ae ia silafia foi Samoa, e le faapea o tagata uma e pa’i ia Iesu e malolo. Leai. Na o le tagata e telē le loto.

Le tagata ua iai lona faamoemoe ola. Oe le tagata ua alu ma le loto atoa ma le mautinoa ia Iesu. E le toe ma, leai se palaai, ae faailoa i tagata uma le silisili ese o le mana faaola o le Atua. Ua na ta’u le mafuaaga na ala ai ona finau e fia pa’i ia Iesu, ma le taunuuga o lona mauaina o le pito ofu o le Alii.

Ua fiu e saili ola i le lalolagi, e leai. Uma ana mea i le poto o tagata, e leai lava. A o le aso lenei, o le aso o le faaolataga (Luka.19:9). Fai mai Iesu, “ Lo’u afafine e, ….. ua e ola i lou faatuatua;’ palasi mai loa ma le isi mea manaia lea, “alu ia oe ma le manuia.” Ua le gata la ina malolo le ma’i, a ua toe aumai manuia e sili atu nai lo lona olaga sa iai muamua. O lona uiga, e le faamativaina e le Atua le tagata e talitonu ma faatuatua i lona suafa. E le oge mea le tagata e faamaoni lona loto i le Alii.

Samoa e, o le sefulu ma le lua tausaga o tauave le ma’i, ua o se taimi puupuu ma le faatauvaa, i le tagata ua na iloa le faamaoni o le Atua ma faatuatua iai. Ae ua le o se taimi puupuu lea e oi ai ma oono, i le sese ese pea ma le Atua. O le faamalosi mo oe, saili i le moni; vaai i le mautinoa; tautala i le ola; tu i le faatuatua , ma ia e iloa ma talitonuina le Alii lou Faaola, o Iesu Keriso. Ia e mautinoa le lumanai ma le taunuuga o lou faamoemoe. Samoa e, o lou faamoemoe ola, o le Alii ia o Iesu Keriso. 

 Amene.

 

Rev. Petaia 7737063  

E-mail: [email protected]

 

21 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>