Manatu o le Fa’atonu - O le a le mea lea latou te fefefe ai?

221 Hits

Tusia - Mata’afa Keni Lesa

Faaliliu e Seagaitumua Tupuola


Ma o lea foi la ua toe teena e le Palemia o Tuilaepa Sa’ilele Malielegaoi, se manatu ina ia faatagaina tagata Samoa o loo nonofo i fafo e palota mai le mea o loo latou nonofo ai. 

I le tali atu i se fuafuaga a le Tautua Samoa Party ina ia faatagaina tagata Samoa o loo nonofo i fafo e palota i le faagasologa o le Faiga-Palota Lautele, e pei o se ta’ita’i finau vale ma le loto ma’a’ā e pei ona tatou iloa- e mafai ona amio faapena i nisi o taimi ma o lea ua sisi’i ai i luga e le Palemia ona lima i le ‘ea ma faailoa mai e faapea o taimi uma lava e avea ai o ia ma Palemia, e le mafai ona tupu lena mea.

E peiseai e le o se mea faatiga lea mo tagata Samoa o loo nonofo i atunuu mamao ma o i latou ia atonu o i latou ia ua i ai le manatu e matua faigata lava ona maua sea avanoa, sa maua foi le taimi o Tuilaepa e tuuina atu ai ia i latou ni poloaiga.

“A outou manana’o e palota, oso i luga o le vaalele ma o mai i iinei,” o le faaaliga lea a Tuilaepa.  “Matou te le o taofia o matou tagata o loo nonofo i atunuu mamao mai le palota ae tatau ona o i luga o le vaalele e faatino ai lea tulaga.” 

Sole –o lana faaupuga e tusa ai ma le faalogo o se mea lea e matua faigofie lava, e le o lona manatu moni lena? 

Ae peitai, o le a tonu lava le mea lea e fefe ai o ia? 

 “Afai tatou te faatagaina lea tulaga, o le a le maua e tagata o loo nonofo iinei le paoa e fai ai le tonu mo i latou lava,” o lana faaaliga lea. “O le a pulea le atunuu mai atunuu mamao talu ai- e sili atu ona toatele tagata Samoa o loo i fafo.”

O!, o lea la. O nei mea uma e faasino lava i le paoa-a ‘ea? E le afaina le amiotonu, tulaga tutusa ma aia tatau a tagata soifua, o ia mea uma e faasino lava i le pule ma le paoa. Ae peitai, aisea e tatau ai ona faate’ia i tatou ona o lea itu.

I le taimi nei o le a faaauau pea le faaupuga a Tuilaepa: “O le fai o lenei mea o se faatiga lea i tagata o loo nonofo i Samoa. E ta’u mai ai ia i tatou e faapea o tagata e pei o i tatou ia o loo nonofo iinei e valelea ma o le pulea o le atunuu e tatau ona tuuina atu ia i latou o loo nonofo i fafo.”

O se mea moni ma le faamaoni lea? O ai na fai mai o soo se mea lava e uiga i soo se tasi –o lona uiga e faavalevalea? E faapefea ona avea ma mea faavalevalea le faatinoina o se aia tatau faale-tagata e talafeagai lelei ma le tulafono?  “Sa le tatau lava ona i ai se avanoa e faataga ai lenei mea,” o le faaaliga lea a Tuilaepa.  “E mafai ona latou o ma auauna i le malo o le atunuu o loo latou nonofo ai ae a pa’ia loa le malo o Samoa, taatia lena mo tagata o loo nonofo iinei.  “Afai latou te manaomia le avea ma vaega o lea mataupu, e mafai ona latou o mai ma nonofo iinei mo le tolu tausaga ma palota....e tatau ona latou osi ni taulaga e pei o le faiga o le monotaga (sao i le nuu).”Tatou faatali teisi lava iinei mo sina minute. Tatou mafaufau i lea upu o le “taulaga osi” mo sina taimi. O le mea moni e le mafai ona faafitia e faapenei.

O Tupe Faamomoli ma Samoa e o faatasi. O le mea moni e faapea o tupe faamomoli o le ivitu lea o le ola o lenei atunuu. A aunoa ma tupe faamomoli, o le a matua pagatia lava i tatou. 

O le mea moni, a faafuase’i ona taofia lea faitau miliona ma miliona o tala e auina mai iinei e tagata o aiga ma uo o loo nonofo i fafo atu o Samoa e tausi ai o latou aiga iinei,  e toatele tagata o lenei atunuu o le a le mafai ona tali atu i manaoga o aso taitasi. E mafua lena tulaga ona o le tau o le soifuaga ua matua taugata lava ae o tupe maua a aiga e le o mafai ona faaleleia i se tulaga tele, pe ana faapea o i ai moni se tulaga faaleleia o lea itu i le faagasologa o le tele o tausaga ua mavae.

O le mea lea o tupe faamomoli mai- i nisi itu-ua avea ma mataupu o le ola ma le oti. Ma o lena itu e le faapito i sui o tagata lautele. Ua iloa lelei e le faigamalo a le Palemia o Tuilaepa lea tulaga e faapea a aunoa ma tupe faamomoli  ma le agalelei o tagata Samoa o i fafo, semanu ua le mafai e lenei faigamalo ona totogi le anoano o ona noataga tau tupe mo se taimi umi ua mavae.    

Mafaufau i lenei mea: e faapefea e le toatele o tagata o i Samoa ona ola e aunoa ma tupe faamomoli? 

Faamata e faape’ī le soifuaga mo le toatele o tagata Samoa e aunoa ma le agalelei mai o latou aiga ma uo o i Niu Sila, Ausetalia, Iunaite Setete, Europa ma isi lava atunuu o le lalolagi? 

Ia manatua lelei, e sili atu mea e fai e  nei tagata i lo le auina mai o tupe. Latou te auina mai foi taavale fou, pusa ‘aisa, TV, taumafa, pusa tetele o meaafale ma i nisi itu- o mea fau fale mo fale fou.

Tama’ita’i e ma alii, o le mea lena ou te faaigoaina o le taulaga osi, a ‘ea? 

Ua outou silasila la-e le faapea ua fau sasaga lo latou tamaoaiga tupe ma oloa.  

O i tatou, o tagata o loo nonofo i Samoa, e tatau ona tatou matua faafetai lava talu ai o le mea moni mo le toatele o tatou aiga o i atunuu mamao e matua eseese lava i lo le ata o le rosa o tagata o loo nonofo i le “nuu o le suasusu ma le meli” e pei ona ua uma ona faailoa mai ia i tatou i le tele o tausaga. Mo le toatele o i latou, o lo latou tauivi ina ia mafai ona ola. O luga a’e o lena, e i ai foi o latou noataga i atunuu o loo latou nonofo ai.  E aofia i lena lafoga e tatau ona totogi, tamaiti e fafaga, o lavalava ma le faaaogaina, pili e totogi ma faalepo e ao ona faataunuu.

Ae ui o lea-ua tatou iloa e anoano mea o loo latou osi taulaga ai ina ia mautinoa-ia leai se mea e faapea e le o maua e o latou aiga o i Samoa –ma i se tasi itu-o loo tumau pea ona opeopea le faigamalo a Tuilaepa. O se taulaga osi lea e le tatau ona le manatu faatalale i ai. E tatau ona matua faailoa lelei, faafetaia ma toe taui atu. 

I aso ua mavae, o taimi uma lava e laga ai lenei mataupu, e i ai lava tagata e fai mai talu ai ona o ia tuagane ma uso o loo nonofo i fafo atu o Samoa, e le tatau ona aia i soo se mea-e aofia ai le aia tatau e palota mai le atunuu o loo latou nonofo ai i le faaagasologa o a tatou faiga-palota. E moni e faapea o le laltou lava lea filifiliga e nonofo i atunuu mamao ma atonu o loo latou faia o lea tulaga, ua latou le maua ai faamanuiaga o le avea ma tagata e nofo i totonu o Samoa-e aofia ai ma le palota.

Ae peitai-o le upu moni o le latou lea filifiliga? Faamata latou te se’e atu i ia atunuu pe ana ofo atu e Samoa ni vaomu’a o manuia e sili atu? Ailoga e i ai se tulaga faapena.O le mea moni e faapea mo tatou lava tagata o nonofo i atunuu mamao, e le afaina pe fia ni afe-poo miliona-o tala latou te auina mai i Samoa. Afai latou te mananao e palota i le faiga-palota, e tatau ona latou totogi pasese i vaalele e o mai ai iinei e faatino lea tulaga. O lea la tulaga e ese ai mai le mea moni e faapea e ala i le tekonolosi ua maua iinei, o lea galuega e faigofie lava ona faatino.

Tama’ita’i e ma alii, o lea matou te talanoa atu e uiga i tagata Samoa na fananau i Samoa nei . I le tele lava o itu, o i latou o matai o loo tausia o latou aiga-ma faaaoga i taimi uma fesootaiga i le va o soo se atunuu o latou nonofo ai ma Samoa i taimi uma lava e tula’i mai ai se faalavelave.  O loo latou faatinoina pea a latou monotaga(sao) i totonu o nuu. O loo tumau pea ona avea i latou ma vaega o le ekalesia i totonu o le nuu e ala ia latou matāfale ia e fai i ai o latou sao i lea vaiaso ma lea vaiaso.Ia-aisea la ua finau vale ai lava le malo e faapea na te le faia lava se gaoioiga e faataga ai se mea e foliga mai o se mea aupito i amiotonu lea ma o se mea talafeagai e tatau ona fai pe a pa’ia le faiga-palota?

. O le a i ai lava lau tali. 

Afai e fesiligia so matou manatu, matou te faapea o le mea moni e matua faigofie lava ona vaaia. Ua fefefe le Palemia o Tuilaepa ma lana faigamalo ina ne’i faia’ina i palota a tagata Samoa mai fafo. Ae peitai, e le tatau ona i ai se mea latou te fefefe ai pe ua latou matua mautinoa-ua uma ona faatino le latou galuega.

O loo i ai se mea e uiga i le la’a ese mai se mea poo se isi nofoaga e tuuina atu ai ia te oe se vaaiga e sili ona lelei. A tilotilo i totonu mai fafo, o le a latou maua le faamanuiaga o le vaaia lea o le mea moni e uiga i nisi o mea o loo faaaoga sese ai o tatou tagata e ala i se faiga ina ia talitonu ai.  O le a sou taofi? 

Ia outou maua Samoa se Aso Sa to’afimalie, ma ia faamanuia atu le Atua!.

 

 


© Samoa Observer 2016

Developed by Samoa Observer in Apia