SE’I O TA TALANOA - E LE PU SE TINO I UPU - WORDS DO NOT BREAK BONES.

281 Hits

Tatou te faafetaia pea le alofa ma le agalelei o le Atua Samoa-ua aumai ai lo outou soifua i lenei taeao i le lagi e mamā ma le soifua manuia.

Ua mavae atu lena vaiaso o fe’au ma galuega sa feagai ai ma le atunuu- o le uta ma le tai ma le fatu-aiga tausi a tina-aua le tapenaina o le fanau mo aoaoga! O le talitonuga la-sa lamatia o tatou ala uma e mala ma faalavelave-ma o nisi foi o aiga-sa feagai ma loimata maligi ma faanoanoaga-ona o matua pele-uso ma tuafafine aemaise ai o le fanau pele-ua aveeseina e le maliu ma le oti ! E moni ma faamaoni-o se vaega moni lea o le soifuaga nei-ma o se mea foi lea e sili ona tiga-aemaise ai lava pe a asia i tatou e mala ma puapuga-aemaise ai o le maliu ma le oti. 

Ae o le itu e faafetai ai-e ui lava i ia tiga ma faanoanoaga- e le ‘i tau mamao lo tatou Alii ma le Faaola o Iesu Keriso mai o tatou tiga uma lava! Ia alo maia Samoa-o le tatou talanoaga masani foi lenei ma le mamalu o le aufaitau o lenei nusipepa- aemaise ai foi o le mamalu o le atunuu lautele –o loo fiafia pea e faitau i lenei tusitusiga! 

Ae pei lava ona masani ai-o lenei tusitusiga-e le o se tuua’iga fai fua-e le o se tau faaleaga i se tasi poo se faaoloataua-ae o le fia faailoa atu o mea o loo tutupu i lo tatou atunuu-o ai ua pogai ai-ae o le itu taua lava-“o le a sa tatou mea e tatau ona fai e fo’ia ai ! Ia-o lena ua tuuina atu i luga le ulutala o lenei Talanoaga-ma e i ai le taofi-ua manino ma malamalama i le atunuu lona uiga-“E le pu se tino i upu” O lona uiga-poo le a lava le tele o upu a tagata ia te oe-ae leai se mea e tasi e afaina ai oe-Ia manatua foi la-o ai lava le tagata e tele ana upu ma tala e fai ia te oe-o le atoatoa foi lea ma le maopoopo lelei o le faamasinoga a le atunuu e uiga i lea tagata. 

A tatou mafaufau la i le tele o tala ma faaupuga felafoa’i i lene taimi nei talu ai le faiga-Palota-o ai lava na te lafoina ia upu-o le lava foi lena ma totoe o le iloa o le atunuu o uiga o lea lava tagata!  

O le talitonuga la o nisi e uiga i nei mea o polokiki-e peiseai e mafuli lona faamamafa i le tele o tala ma upu e fai! Ae o le fesili taua mo i tatou-o aoga ia upu ma tala mo le atunuu? A toe faaupu-e mafai ona aumai ia upu e fai ai se suavai a le atunuu? O le tali- e leai! Aisea? Leaga e na o le ‘ea lava ae leai se mea moni e tasi o loo i ai! 

O le pine la o lenei mau- a tatou tilotilo i faiga pi’opi’o a le Malo ma taupulepulega leaga a tagata faigaluega o le Malo lea ua maumau ai le faitau miliona ma miliona o tupe a le atunuu e pei ona lipotia e le Pule ma Su’etusi Sili ma toe faamaonia e le Komiti a Alii Ofisa o le Palemene-o le fesili-o le a le aoga o nei mau upu pepelo e fai nei? O a manuia o le atunuu ia e folafola mai? A faapefea ona manuia faafuase’i i lenei taimi ae o lea o le a 40 tausaga o pulea e le HRPP le atunuu-ae matua leai lava se mea e ono faamaonia ai le manuia o le atunuu pe a toe tulai mai le HRPP? O nei la upu uma e fai mai nei-upu soona lafo ma upu le faautauta lelei ma le faatautala-e tasi lava lona ‘auga-o le fiapule to’atasi! Aisea? Leaga e na o latou lava o loo manuia ai i nei faiga uma e fai! O lea ua tatou alo atu i le faiga-palota lautele i le masina fou-o a tala ia tatou te faalogoina i taimi uma? 

O le tali-e le o uma lava lo latou naunau e fiapule i le Malo ma le atunuu! Aisea? Leaga o lea e manuia ai na o i latou! Silasila i taavale taugata o loo feoa’i solo ai nei! O isi taavale o loo la’u ai uta tiapule ma uta popo-ae o lea e silasila le atunuu e ana ia meatotino uma! Afai la e fai le fesili pe aisea e saga felafoa’i solo ai nei upu ma faamatalaga, o le tali-masalo o lo latou manatu o Samoa e valelea! Ae o le itu e ofo ai-o le atunuu e ou le Malo-o le atunuu e ou mea uma ia e saili ai o latou manuia! O le fautuaga la i le atunuu-o taimi uma lava tatou te faalogoina ai a latou upu ma faamatalaga-ia manatua e le Malo- e le o pūpū ai o matou tino-ae ua na ona faateleina ai o lo matou iloa moni ma le talitonuga-e leai se manuia o lenei atunuu e ono mafai ona maua i taimi uma lava e faafoe ai e nei tagata le malo o le atunuu! Aisea? A lea ua tatou vaai tino i foliga o faiga pi’opi’o matautia! O lea ua tatou vaai tino i le falepuipui o tagata o le atunuu pe a gaoi le $20-ae le mafai ona falepuipui se tasi o le faiga-malo-pe afai latou te faamaumau le faitau miliona ma miliona o tupe a le atunuu! Ae o le suiga uiga ese ua i ai nei le tulafono-e falepuipui le tagata i le gaoi o le $20-ae a faitau miliona ma miliona e te faaaogaina i faiga pi’opi’o- e le mafai ona e falepuipui ai! Ia atonu Samoa e foliga mai lea tulaga o le atunuu-tulou lo’u gutu ma le afi-e valelea-ae o le mea moni ma le faamaoni- o le pogai lea ua malaia ai lo tatou atunuu-ona ua le mafai ona tatou faia se faiga –e saili ai  le amiotonu ma le faamasinoga-e uiga i lenei mataupu. 

O upu soona lafo la ia e talau mai nei faatasi ai  ma uiga le fufu’e i le atunuu-e le pu ai se tino-ae talofa e i le Atua Silisili Ese o loo faavae ai lenei atunuu-ua soli pala e tagata faatautala! 

O le fautuaga-tuu ai pea i latou e fai a latou upu-ae ia manatua-ua o’o mai le taimi e tatau ai ona fai se suiga-o lona uiga- o se suiga lelei ma le maopoopo-e mafai ai ona saili le amiotonu ma le faamasinoga i nei mataupu o loo pagatia ai le atunuu! Ia manuia tele le Aso Sa Samoa ma ia faamanuia atu le Atua!

© Samoa Observer 2016

Developed by Samoa Observer in Apia