Lauga - “O lou olataga”

Tusia Rev. Petaia Setu ,

260 Hits

Rev. Petaia Setu

Rev. Petaia Setu

(Ieremia.9:23-24)

Se a se malosi o i ou autafa e laveaiina oe i lau malaga? E mafai e le poto ua ia te oe ona faafoe lou olaga? E faaolaina ea oe i au oloa? Ou te toe faamanatu le pese a le EFKS; “Ne’i mau le mitamita i mea faaleaoga, tau o Iesu Keriso na afio mai lugā.” Ne’i sesē le mitamita, ae le o iai le faaolaina. A o le Atua; fai mai le perofeta nei, ia iloa le Atua…. O la lea e te mitamita ai auā ua na o lea lou olataga (Rom.8:31).

Le nuu faigata! Ua ma’a’a loto. Ua le toe ila i se mea. Ua milomilo i le Atua na osi feagaiga ma ona tua’ā. Na tau papalu mai le papala ma le tino leaga i le amataga. Tasi le seevae ma le ‘ofu i le fa sefulu tausaga. Lele ua tulai mai nei augatupulaga, ua le sao atu iai se upu ma se tala. Ua iī taliga i le upu a le Atua. Ua laga mai i le perofeta. Ua mita’i mai le poto; ua faalālā le malosi; ua taulagi le maua o mea! Ua mitamita i mea e i’uvale. E le i gūgū ai Ieremia. E le i punitia ai le alofa moni faa mătua. O le alofa laveai o le Atua.

O le ’alaga a le perofeta, ‘Aua…e le o le poto; e le o le malosi; e le o le ‘oa; a o le Atua. Ia iloa le Atua i lou loto. Ia iloa i lou olaga; i lou aiga, ma lou siomaga. Samoa, o mea ia sa femitai mai ai le nuu o le Atua, o mea vaivai; e i’uvale. Manatu tatou, o kama ia e tu ai aiga; e iloa ai pulega ma faigamalo; e ola ai ma tauleleia le ekalesia. Leai; ’aua. E le i tu se malosi o nei mea i le matautia o Papelonia. E le i seetia le finagalo o Nepukanesa i se faulalai o ni oloa a le nuu lē fautuaina. Na matuā olo pala e le fili; susunu Ierusalema ma faatafunaina. O fea le malosi o Aikupito sa faalagolago iai? O fea le lumanai sa taoto iai le faatofala’iga a le nuu?

E le taumatea lou nenee i faamanuiaga ua a’e ma oe i lenei tausaga fou. Ua faaeaina tatou fanau. Ua manuia galuega ma feau. Ua lelei lou fofoga masau le mafaufau. Ona e tala tama lea ma faaviivii fanau; faamaualuga lea i le suafa, lou pou, ma lou tootoo āu! 

Samoa e, e umi le malaga o lenei foi tausaga. E le tali le poto ma le malosi ma le ‘oa i atua o le ala. O ai sē a tu i matagi ‘olo? E ui ina maua e le tupu o Tavita mea uma, ae faalagolago lava le auauna  i lona Atua. Fai mai Tavita, “O Ieova o lo’u papa ia ma lo’u olo, ma lo’u faaola. O lo’u Atua, o lo’u papa, ou te faatuatua ia te ia; o lo’u talitā, ma le nifo o lo’u olataga; o lo’u ‘olo maualuga.” (Sal.18:2). O le faatuatuaga lea o Tavita e malu ai. E faamoemoe i le Atua lona saogalemu ma lona manumalo i fili uma.

O lona olataga Ieova i lana auaunaga ma lona olaga. O le faamoemoe mautinoa. Ua iloa lelei e Tavita le faamaoni o le Atua. Malamalama lelei o ia i le uiga paia o le Atua. O le Atua na te faia le alofa, ma le faamasinoga, ma le amiotonu. Afai o lea lou faamoemoe ma lou mitamitaga i lenei tausaga, o ai la na te palua oe? (Rom.8:31). 

O le Atua mai le vavau e oo i le faavavau. A o mea ia e taulagi mai e le nuu o le Atua e fua pau. Ne’i pei ta’ua o le tupu o Nepukanesa. Fea le poto na mita’i? Fea le malosi sa faalele? Paka lava e le Silisili Ese tu i le sameme. E le i feagai se poto o lana taupulega ma le Tofa poto a le Atua. E le i mafaia e se malosi faa fitafita o Papelonia ona taofi le Atua  matautia.

E le i mafaia foi e le oloa uma o Papelonia ona faatumauina lona mamalu i le nofoalii. Na faaū i luga e le Atua vae ae ū lalō le ulu! Se’i ese mai le nofoalii momi ae saofa’i i taepovi! Ua leai le sipuni ma le tui sa ma’ona ai le fiafia; ua samusamu ua pei o se manu ma ‘ai i le mutia. Aisea? Sesē le mimita! Faamaualuga i mea i’uvale! O le fautuaga a Ieremia, “AUA”.

Samoa, o le upu lea na o le tolu ona mata’itusi, o loo saofa’i ai i totonu faiva alofilima o le Atua  -  alofa, faamasinoga, ma le amiotonu. A ‘e le iloa mea na, e te mafo’efo’e atu lava ma mafatia i le amataga o le malaga i le maa tui ma le maa gao, ma le maa faalavea aao.

Ne i ‘ai ‘ulu tuana’i ta’isi, pe galo Afi’a isi ona vao. E le mavae le alofa o le Atua (Sal.100:5). O lou olataga ia. Ua sa’o Tavita, O lou ’olo ia ma lou papa. Na te taitai ma leoleo ia te oe i aso uma lava (Sal.121:3-8). Na te taofi pea oe i lona aao faaola (Sal.37:23,24). 

Samoa, o le tagata manuia, o le tagata na te iloa lelei le Atua. O le iloa o loo tautala ai le feau o lenei Aso Sa, o lou mata’u i le Atua. A o le mata’u i le Atua, fai mai Tavita, o le amataga lea o le poto. E pupula ai ou mata. E manino ai lau vaai. E te malamalama ai i lou faasinomaga mai le Atua, ma e talitonuina ai le uiga mata’utia ma le ofoofogia o le Atua, o loo finagalo e fau ai  lou olaga ma faafoe ai lau malaga i lenei tausaga. O lona alofa, o lana faamasinoga,  ma lana amiotonu.

Samoa pele e, faia ia o lea ma ou mitamitaga. E tineia ai ma’i ma fili uma o i le ala. E sao ma uli, uli ma sao ai la ta malaga mai malosi eseese faalenatura o lo ta siomaga. A o lē mitamita, inā mitamita ia o ia i lenei mea, ina ua mafaufau o ia, ma ua iloa a’u, o a’u lava o Ieova, o lē faia le alofa ma le faamasinoga, ma le amiotonu i le lalolagi. Auā o mea ia e fiafia iai lo tatou Atua, o lou olataga ia.

 

Amene

 

7737063/7783782

© Samoa Observer 2016

Developed by Samoa Observer in Apia