Manatu o le Fa’atonu - Matou te toe fai atu foi, e mana’omia e lenei atunuu se Vaega e Tete’e atu i Faiga Pi’opi’o

144 Hits

Tusia - Mata’afa Keni Lesa

Faaliliu e Seagaitumua Tupuola

 

Ua uma ona matou faailoa atu muamua lenei mataupu ma o le a matou toe faailoa atu foi. E tusa ai ma le vala’au a Afualo Dr. Wood ina ia “taofi faiga pi’opi’o” i le itulau i luma o le Samoa Oserver ananafi, matou te talitonu o lo matua manaomia lava e lenei atunuu se Vaega e Tali atu i Faiga Pi’opi’o

E leai se taimi e tatau ona faamaumauina. Ioe-matou te ioe o lea mataupu ua leva ona lāgā mai lea taimi i lea taimi ae matou te talitonu –o taimi uma lava e lāgā ai, e matua manino ma malamalama atili ai lenei mana’oga.  

Ma-a’o tapenapena le atunuu mo le Faiga-Palota Lautele, ua le mafai ona toe manatu i mataupu ‘anoa ia o loo taofiofi ai i tua lenei atunuu mai le tulaga sa tatau ona i ai i lo le mana’o ina ia fo’ia le pogai autu o nei faafitauli uma-o faiga pi’opi’o ia.  

O loo i ai faiga pi’opi’o i totonu o galuega a le malo, faiga pi’opi’o i totonu o ekalesia ma faiga pi’opi’o i le tele o nofoaga ia e aafia ai tupe, paoa ma folafolaga o manuia e tele 

O le Aso Lua, na toe faaolaola ai e le Minisita Faaolioli o Tupe a le Tautua Samoa Party o Afualo Dr. Wood Salele-le valaau mo le malo ina ia faatu se Vaega e Tete’e atu i Faiga Pi’opi’o. Fai mai Afualo o le faatinoina o faiga pi’opi’o na tuua’ia ai -na faamaonia e le Pule ma Su’etusi Sili ma lagolagoina e le Komiti a Alii Ofisa o le Palemene-ua tuuina atu ai ni mafuaga e sili ona tele mo le faavaeina o se vaega a le atunuu e fo’ia faiga pi’opi’o. “E leai se tasi, ma ou te toe fai atu foi, e i luga a’e o le tulafono e aofia ai le Palemia ma i tatou uma lava,” o le faaaliga lea a Afualo. “Afai tatou te soli le tulafono-e tatau ona tatou faia ia mautinoa-ua faatinoina le amiotonu ma le faamasinoga. 

 “Ae peitai-e le mafai ona taunuu lena faamoemoe se’ia vagana ai ua i ai se tatou Vaega e Tete’e atu i Faiga Pi’opi’o. 

“I know Tuilaepa has been saying that we “Ou te iloa ua leva ona fai mai Tuilaepa o loo i ai le tatou Komesina o Sulufaiga ma o ua matou iloa lena tulaga ae anoano mataupu ua matou vaaia e le o faamalieina ai tagata e tusa ai ma le pule a le ofisa-o le mea lea ua matou mana’omia ai lava le mautinoa lelei o le mea latou te faia o le a taunuu lava.

Fai mai Afualo ua loa ona pagatia le atunuu ona o le le mafai e le malo ona fo’ia mataupu tau faiga pi’opi’o ma le faaaoga sese o le paoa i le tele o tausaga.

 “Ua tatou iloa uma lava ua matua faula’i faiga pi’opi’o,” o lana faaaliga lea. 

Na viia e Afualo le faaiuga ina ia faatu se Ofisa o Moliaga a le Atunuu (N.P.O). Ae fai mai a ia o sea vaega e leai se aoga pe a aunoa ma se Vaega e Tete’e atu i Faiga Pi’opi’o

 “O lea vaega  (N.P.O.) e le mafai ona faagaoioi pe afai e le tuuina atu ia i latou soo se moliaga, o lana faaaliga lea. “O le mea lea o le a tatou faia ia mautinoa o le a galulue faatasi nei faalapotopotoga a le atunuu. O le a faatino foi e Leoleo la latou pitolaau ae tatau ona tatou lenei faamatalaga mai lona amataga ona tuuina atu lea i le Ofisa o Moliaga a le Atunuu e fai i ai le latou galuega.  E le o le taimi muamua lenei ua faailoa atu e Afualo lenei mataupu. O se tasi o taimi na ia ta’ua ai lenei mataupu o le taimi lea na popole ai o ia ina ne’i faaleaogaina e le malo le lipoti a le Komiti a Alii Ofisa o le Palemene (O.P.C.report).

 “E leai se mea ua faia (e uiga i le lipoti a Alii Ofisa o le Palemene, e pei ona faailoa e Afualo i lea taimi“O lo matou talitonuga e faapea ua silia le 50 tausaga talu ona tutoatasi Samoa ma ua o’o i le taimi e tatau ai ona fai se tatou vaega e tete’e atu i faiga pi’opi’o-e tali atu i le atunuu -ma pe o faapefea ona faaaoga a latou tupe. E leai se tasi e i luga atu o le tulafono.”

E leai se mea matou te faasala-ese ai mai lea finagalo. Ae peitai-ua tatou iloa foi e faapea i aso ua alu-sa faaauau pea ona teena e le Palemia o Tuilaepa Sailele Malielegaoi lea fuafuaga.

“O le pogai lena na fai ai le tatou Faamasinoga ma le Ofisa o le Komesina o Sulufaiga,” o lana faaaliga lea. Manaia. Ae na aisea na le tuuina atu ai le lipoti a Alii Ofisa o le Palemene mo le 2010 ma le 2011 i le Ofisa o le Komesina o Sulufaiga poo le Faamasinoga? 

E ui lava ina o le Palemene, i le avea ma faalapotopotoga e aofia ai sui e toatele na pasia  ma faamaonia le lipoti a Alii Ofisa o le Palemene o loo ta’ua, ma mulimuli ane ona ia talia fautuaga uma e aofia ai se faiga faale-tulafono e faasaga i alii ofisa o loo tuua’ia, ae o lenei lava lipoti e le’i faatagaina ona talanoaina i totonu o le Palemene. O lona uiga ua teena le amiotonu ma o loo faaauau pea ona teena e lenei faiga-malo. 

Ia, o le mea lenei tama’ita’i e ma alii, o le tali mai a le malo i le Lipoti a Alii Ofisa o le Palemene –o loo finau mai pea e leai se molimau sa aafia ai ni faiga pi’pi’o. I totonu o lana tali mai, na faaalia e le  “malo o mataupu na lagā e le O.P.C i totonu o lana lipoti ma o loo galulue i le mea sili na te mafaia ina ia mautinoa ai ua faata’oto ni fuafuaga lelei ma o lona faatinoina o loo mata’ituina i se faiga vavalalata i le aga’i i luma.” 

O se mea moni lea? Ia toe silasila la i lenei mataupu mo se faata’ita’iga. O se pepa na maua mai e le Samoa Observer e faitauina faapenei: O se tasi o mea uiga ese na maua e le O.P.C. o le mea moni e faapea na faamaonia e le S.L.C. le tau o le toe faaleleia o le (Lifi) lea o lona tau muamua sa $180,000 ma toe faaleleia i le isi $310,000 ona maua ai le tau aofai o se “lifi malepe” lea e le o mafai ona faaaoga e o’o mai i le asō i le $490,000.

O le a faamuta sa’u upu e faapea o se faaiuga “faatautala” lenei ma le faaaoga sese a le pulega o le S.L.C. e faaalu ana itiiti e faaleleia ai se lifi ua malepe. 

O le fesili la ua tulai mai pe faamata ua faaulu e le S.L.C.se tagi e faasaga i le kamupani mo le lifi malepe talu ai-o le 10% o Tupu Taofi sa faamatu’u atu i se faiga solitulafono a’o le’i mae’a le galuega ma le isi itu – i luma mai o le faamutaina o le vaitaimi e 12 masina e tusa ai ma le Maliega.” 

Ua na o se tasi lena o ia mataupu. O le isi vaega o le pepa e faitauina faapea: 

 “Ua faamaonia e le Kapeneta  le $2,800,000 mo le fausia o le Ofisa o le SLC. Ae ui o lea, o le tau aofai atoa ina ua mae’a  sa $5,219,977.12, o le fesuiaiga o le tau e  $2,419,977.12.

 “E tusa ai ma le FK (12) 29 e uiga i le Taualumaga o Faiga Faa-Tauofoga a le Malo ma ta’iala  o loo i lalo o le Faamatalaga B4, o galuega uma e tauaveina e Faalapotopotoga a le Malo (S.O.Es)  e i luga ma sili atu i le  $200,000 e ao ona tuuina atu i le Komiti o Tauofoga mo lana iloiloga ma ni fautuaga mulimuli ane ai i le Kapeneta mo se faamaoniga.” 

“Ae ui o lea, o le tau e $2.4 miliona o le fesuiaiga o le tau mo le Ofisa o le S.L.C. na faamaonia e le O.P.C. e faapea e lei iloiloina e le Komiti o Tauofoga poo se faamaoniga a le Kapeneta. O lenei mataupu na la ai le fesili i lona tulaga aloa’ia faale-tulafono o le taualumaga na faatinoina e le S.L.C. ae soli ai faiga faavae a le Malo ma taualumaga ona o nisi o tupe totogi na aofia i totonu o le otootoga o fesuiaia o tau ia na fai i kamupani e pulea faatasi e tagata o le aiga o se ofisa sinia.”  “O se tasi o ia itu faapitoa na faaalia e le Pule ma Su’etusi Sili lea na aafia ai se tupe totogi e $202,000 mo le teuina o le Fanua ma auaunaga tau Togalaau na totogi atu i se kamupani lea na ia maua e aunoa ma ni tau mai isi tagata e maua ai oloa lea na maua e le Pule ma Su’etusi Sili na matua soli ai faiga faavae a le Malo tau le faatauina mai o oloa.”

E mafai ona matou faaauau pea lava pea. Ae ua outou silafia la matou fe’au

Tama’ita’i e ma alii, o le pogai autu lea e manaomia ai e lenei atunuu se Vaega e Tali atu i Faiga Pi’opi’o. Matou te talitonu o lenei ituaiga o mataupu-e le tatau ona salu i lalo o le kapeta ma faagalo. I le avea ma atunuu, e le tatau ona tatou faatagaina lenei mea, pe afai tatou te fia faagasolo i luma. 

O le a sou finagalo?

© Samoa Observer 2016

Developed by Samoa Observer in Apia