TALA FA’ASOLOPITO O SAMOA MAI LE AMATAGA

235 Hits

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer.

 

EKALESIA KATOLIKO ROMA- O le Ekalesia Katoliko Roma lea sa avea ai ma Epikopo Rev Dr. Broyer ma pule, sa matua to’atele ona tagata lotu.

O le toesea o le Epikopo i Europa na suitulaga ai Rev. J. Remy e avea ma pule o le ekalesia. E sefulutasi faife’au sa galulue i Upolu nei, ma o motu ta’itasi o Savaii ma Tutulila sa tofu ma patele e to’alima sa galulue ai, ma e toatele faia’oga o le atunuu sa fesoasoani i ai.

E to’alua tama’iti Monike sa galulue i le nofoaga o Tama’ita’i Sa i Upolu ma le isi to’alua sa galulue i le nofoaga o Tama’ita’i Sa i Tutuila.Sa i ai faatasi foi ma ni Tama’ita’i Sa Samoa. 

Sa matua tele le tulaga faamanuiaina o galuega a Felela Malisi i Samoa.

O le latou a’oga i Apia sa a’oa’oina ai se aofa’i o tamaiti e valusefulu tamaiti., ma o se a’oga e fai i le ao, ma e leai ni tamaiti nofo tumau. E lua tausaga sa pule ai e Brother Loetus i lea a’oga, ma sa fesoasoani ia te ia isi Felela e toatolu.

O le faamoemoe o lea a’oga ia tuuina atu se a’oa’oga lelei i le gagana Siamani ma le gagana Peretania, ma sa matua faatauaina i mafaufau o tagata Papalagi e ou fanau sa a’oa’oina ai. Sa i ai le isi a’oga a Felela i Moamoa- e tusa lea ma le tolu maila mai Apia.

O lea a’oga sa i lalo o le vaaiga a Brother Philip, lea sa fesoasoani i ai Brother Athanasius ma Brother Flavieu. O lea a’oga na faatu i le valu tausaga i luma atu- i ni tamaiti a’oga se luasefulu poo le tolusefulu, ae sa vave ona siitia le aofai o tamaiti a’oga i le valusefulu.

O le 1902 tonu ai o le a faatu se a’oga mo faatoaga tau le teropika, ma o iina na amata mai ai le matagofie o lea faatoaga ma ona laau totō eseese. O lea faatoaga i na aso e fa eka lona tele ma sa faato’aina i ni ituaiga o laau eseese e 250.

Sa mulimuli ane ona toe faaopoopo le tele o lea faatoaga i le isi lua eka, ma sa faaauau pea lona faateleina i taimi uma mulimuli ane ai. O tamaiti o le a’oga i Moamoa e fai lava e latou a latou mea’ai, e fai o latou ma’umaga ma sa galulue foi ona sa mana’omia  le latou fesoasoni  mo togā-koko ma togā-kofe ia e tusa ma le 13 eka le telē. O le fausia o le falesa i le nofoaga o le Epikopo o se tasi lea galuega sa fuafuaina, ma o sauniga-lotu sa fai i totonu o fale Samoa tetele.

Ua faateleina galuega a Felela Malisi, ae ui o lea, sa matua faafiafiaina i latou i le solosolo manuia o le latou galuega. (E toe faaauau atu i le Aso To’anai o le vaiaso nei, ae ia manuia tele lenei vaiaso Samoa)

© Samoa Observer 2016

Developed by Samoa Observer in Apia