O la’u tala fo’i

140 Hits

1. Matauina i Tala Fou se faalavelave tau taavale na tupu i Tuana’imato-lea e faapea na manu’a tigaina ai se alii ma auina atu i le falema’i. O lea loli e faapea na alu saoasaoa ae mamafa lana uta oneone. O le isi foi faamatalaga e faapea e leai ni taofi o lea loli! Ia-afai o Tuana’imato i le nofoaga o loo i ai fale taalo- na tupu ai lea faalavelave-o la’u lava la molimau-o lea vaega o ala tetele-o le matua nofoaga lava o tuuga-taavale-ma o le vaaiga lava lea i aso uma. E le o vaaia ai foi ni Leoleo  o le Matagaluega o Leoleo poo ni Leoleo o le Pulega o Fela’uaiga i le Laueleele! O le uiga la o le faamatalaga-o le mea lava lea o loo fai i taimi uma ma aso uma i le ao ma le po i luga o ala tetele-o tuuga taavale. A silasila i le ala agai i sisifo mai Lepea, Vailoa, Vaiusu ma Vaitele-faasolo atu ai lava-o le mea lava lena o loo fai- o le tutu’u poo le taavale a ai e saoasaoa! E moni lava o loo i ai faailoilo ma lapata’iga a Leoleo i luga o ia auala-ae le o kea i ai avetaavale! O le a la le tulaga e tatau ona fai? A tu’u ai pea e fai loto o avetaavale-ae faapefea pe a tupu mai ai se faalavelave ma feoti ai nisi?  Ua uma ona matou faailoa atu muamua-ae o lea foi o le a matou toe faailoa atu-e leai ma se avetaavale o kea i masini ia a Leoleo o loo faatutu i luga o ala tetele-ae faatoa mafai lava ona usitai tagata o lo tatou atunuu-pe a vaaia tino o Leoleo o le Malo! Afai la e maua ae faamaonia ua fai so’o e lea avetaavale lea solitulafono-aveese loa ma le laisene-ona faatoa mafai lea ona saogalemu tagata lautele o le atunuu. O le pogai-e faatautala ma mitavale le avetaavale e to’atasi-ae feoti atu ai ma isi tagata! O le a la sou taofi? 

2. O lea foi ua matauina i Tala Fou se ulutala e faapea-“Ua lapata’ina le atunuu e uiga i le tulaga tau tupe o le malo-ma o lea lapata’iga-e mai le Minisita Faaolioli o Tupe a le Itu Agai o Afualo Dr. Wood Salele. O lea la lapataiga e peiseai e faatūtū i le Ofisa Sili o Pulega o le Matagaluega o Tupe o Tupa’imatuna Iulai Lavea.Fai mai Afualo o le le manuia o le ta’ita’iga a Tupa’imatuna- ua ala ai ona lele i lugā e pei o le paluni- le aitalafu i fafo a Samoa-lea ua sili atu i le Piliona. O le tali atu la lea a Afualo i le mau a Tupa’imatuna-fai mai e leai se tupe pa’ū poo ni tupe ua le maua e tusa ai ma le Tala Faatatau Faaopoopo (Nu.1) 2015. O le faaiuga la o le saunoaga a Afualo-ua tatau ona faamavae le Failautusi o Tupe-ae fai mai Tupa’imatuna ua liliu e Afualo le mataupu e avea ma mataupu faa-polokiki. Ia-o finagalo faaalia na o nisi o Sui Usufono o le Palemene ma nisi o taiulu o Matagaluega ma Faalapotopotoga a le Malo. Ae poo le a lava- e na o le atunuu lava e maua ai le tali moni o nei finauga uma! O lona uiga-afai o le atunuu lea e sili ona aafia i nei tulaga uma-e na o i latou lava e maua ai le tali sa’o o nei finauga uma! O le a sou taofi?

3. Matauina foi i Tala Fou le finagalo o le Faipule o Vaimauga Sisifo o Lefau Harry Schuster-ina ia lelei ma tutumau le atiina a’e o a’oga i totonu o Samoa. Fai mai Lefau e tatau ona mautinoa lelei e le Malo le tulaga lelei tau aoaoga i le salafa o le atunuu. O lona uiga-o lea tulaga lelei o a’oga-e aofia ai ma Savaii. Fai mai la Lefau-afai ae manumalo le Tautua Samoa Party i le Palota- o le latou ‘faamuamua-o le tulaga lelei lea o a’oga mo tagata uma faatasi ai ma avanoa mo tagata uma. Fai mai ua ave uma e a’oga tua faia’oga lelei-talu ai o loo latou ofoina atu totogi lelei mo faia’oga. Ia o le a taatia la lea tala-ae afai e moni le Faipule ua ave uma e aoga tua faia’oga lelei ona o le lelei o totogi o loo latou ofoina atu-o le fesili la- e faapefea ona mafai e a’oga tua ona ofo atu totogi lelei mo faia’oga ae le mafai e le Malo o Samoa? Ua fia tausaga o faainaelo le malo i nai faia’oga ma nai fomai ma teine tausi ma’i? Mai lava i le amataga- e peiseai o nai tagata faigaluega  lava nei -e manatu māmā i ai le Malo-o nai faia’oga ma nai teine tausima’i! E muamua lava ona tasi’i totogi o isi matagaluega ae mulimuli lava i latou nei. Afai la e taua le aoaoina lelei o le atunuu ma maua le soifua maloloina mo tagata uma-o le fesili-o ai latou te faia? E mafai ona o atu nisi tagata e a’oa’o le fanau? E mafai ona o atu nisi e togafiti gasegase? O le tali –LEAI! Aisea la e faainaelo ai i faia’oga? O ai na te manaomia se Samoa faavalevalea? E a la pe  a ave le faamuamua i a’oga? Ia manatua foi-e le mafai ona lelei le aoaoina o fanau-pe a leai ni faia’oga lelei! E maua lava faia’oga lelei-pe a lelei ona taui lo latou afu maligi! O le a sou taofi?

4. O le vaai atu  i le Flea Maketi i Savalalo ma lona tu mai ina ua tuana’i le afi na faatama’ia ai-e peiseai o se tagata o loo lu’i mai le atunuu. A ta ui atu i sasa’e-o loo tu mai-a ta ui atu i sisifo-o loo tu mai foi e peiseai e i ai se mea o loo tau ta’u mai. O lo’u la manatu- e peiseai o loo fai mai-“Talofa e i tagata o si o’u atunuu sa matou mafuta faatasi ma tauivi i aso uma- e ala I faleoloa, fale’aiga ma isi - mo le manuia o latou aiga! Talofa e- e fa’i o le agaleaga o lenei alii o Afi-ae ua sili ai le agaleaga o isi tagata! A faapefea ona latou ave fua mea a isi tagata sa afu-lelea ai i le ao ma le po? O se mea amiotonu lea mea o le pagatia o le uso ma le tuafafine-ae toe o ane latou talepe ma ave mea uma ae le o ni a latou mea na afu ai? E! -maumau e pe ana e malie alii Afi-ae toe fo’i mai e susunu ia liu efuefu ia tagata le alolofa ma le faatautala- ia na latou talepe fua ma fao meatotino a isi tagata na afu ai! Talofa e ia Samoa-fai mai foi o le atunuu e faavae i le Atua-ae na fai le pati a Satani ma agaga leaga uma –ina ua latou vaaia o latou uso –e alu atu le Afi i le isi itu-ae taamilo ane latou i le isi itu-talepe faleoloa ma pisinisi a isi tagata-ave uma oloa ma tupe o le afu sa teu faapelepele mo le manuia o nai tagata faioloa! Ia-o le a toe faa-vaai lava outou i le leaga o le mea na outou faia! O le a sou taofi?

© Samoa Observer 2016

Developed by Samoa Observer in Apia