Alofa’aga mo oe le uso – To’aiva
Ua talia aloa’ia nei le tama’itai i a To’aiva Hitila i le li’o o loia i Niu Sila.
O ia o se loia ma o se tasi fo’i ua i’u ma le manuia ana a’oa’oga mai le Iunivesite i Aukilani. O le a’e manuia ai o ana taumafaiga na ia avea ai ma le avanoa e aualofa atu ai mo se tasi o ona uso i a Lina leana tu’ua le mafutaga i le 2003.
O ona tua’a o le Fa’afeagaiga i a Talosaga ma le faletua i a Neta Hitila mai afioga o Faleula, Siutu ma Sala’ilua Savai’i.
“Avea lenei itula e momoli atu ai le agaga fa’afetai tele i aiga aemaise o matua, uo ma e masani na mafai ona lagolagoina taumafaiga uma,” o lana saunoaga lea.
“E fa’apito augafa le fa’afetai i le uso ua tu’ua le mafutaga i le oti i a Lina Hitila, o ia o se uso, o se uo ma se malamalama e susulu pea i taumafaiga uma.
“O alofa’aga e le uma mo oe le uso, ma o le fa’ailoga lenei e mo oe e to’atasi.
“E le gata i lea o le E.F.K.S. Siutu , Salailu ma le Te Atatu fa’afetai tatalo.
O To’aiva na aoga i le Kolisi, o Samoa, Kelston Girls ma le Marist Sisters i Aukilani, Niu Sila.
Na saunoa le tamā i a Rev. Talosaga e leai lava se isi itu e mafai ona maua ai le malosi ma le ola o le taumafai lava ina fa’amoemoe i le Atua i mea uma.