Ia ou pei o Joseph Parker!
O le avea ai ma siamupini o le lalolagi o se miti lea a le ali’i talavou i a Malu Malisi mo le lumana’i i a Joseph.
I le fa’atalatalanoaga ai ma Malu o Faleula i le aso ananafi, na ia fa’ailoa ua tele se lesona ua ia mauaina mai e le gata i a Parker ae o Tua fo’i i lona olaga i lenei taimi.
“I a te a’u lava ia o se agaga fa’afetai lea mo le tele o nai o tatou tagata ae o se una’i taua mo nai o tatou tupulaga talavou i le taimi lenei.
“O a’u sa ou le fiafia lava ou te fusu ae ina ua ou va’ai atu ia Parker ma lona ola finafinau i le ta’aloga ma le fa’aeaian lea ua i ai.
“Ona ou fa’apea ane la’ia, aisea e mafaia ai e Parker ae ou te le mafaia?
“O le taimi lenei o lo’o o’u tatalo pea lava, ia ae lea ua uma tatalo , ou te iloa e le na’o le tatalo ae tatau ona ou tu i luga ma fa’atino.
“Aua e le fa’apea na’o le tatalo ma moe, ae o le tatalo ma galue.
“Aemaise ai lava le tulaga o Parker ia o le tamaititi Faleula, ia ou te mana’o la ou te soso’oa Parker.
Na ia fa’ailoa i le Fofoga o Samo le agaga fa’afetai ona o le fa’aea atunu’u o La’auli.
“I a te a’u lava ia , ia o lea ua ou sauni atu le tausaga fou mo le fa’amoemoe lenei.
“O le a ou taumafai ou te alu ou te koleni lelei ma fa’atino nisi o galuega aua lava lo’u fa’amoemoe lea ua i ai.
“Ou te ta’utino e le toe suia lo’u fa’amoemoe lea ua i ai le taimi lenei ma ou o le a ou taumafai i le mea e gata ai lo’u malosi.
O a nisi o gaioiga o le a e fa’aaogaina mai i a Parker.
“Ia o gaioiga masani lava e pei ona maitauina i a Parker i luga o le tv, o le vave o le alo, o le sikepu i tua ma luma, o le taumafai e va’ai sa’o i mata o la’u paga.
“Ae pei o le itu e pito sili ona taua o le taumafai lea e minoi i taimi umi ia ma to’aga e koleni ma fai mea uma o lo’o ua fa’atonuina mai ai e le faiaoga.
“O lea le tulaga manuia o lo’o ua taumafai ai nei e fai.