Maliega mo le aga’i i luma

20 December 2015, 12:00AM

Fa’aliliu e Maiava

 O Samoa le tasi atunu’u sa ‘auai i le fono – C.O.P. 21 na faia i Pale i Farani, lea na ‘ausia ai se maliega mata’ina ua fa’amauina nei, aua le fo’ia o fesuia’iga o le tau.

Ua fa’ailoa mai nei e le malo, taunu’uga o lea fonotaga ae maise o maliega sa ‘ausia, e ala i se Fa’asalalauga Aloa’ia na tu’uina mai i Nusipepa ma Vaega Fa’asalalau.

 O le Fa’asalalauga lenei:  

Ua mae’a nei le Fono Lona 21 a Malo ‘Auai i le Li’o o Malo ‘Aufa’atasi, e uiga i Suiga o le Tau (UNFCCC), ma ua ‘ausia ai le Maliega i Pale, lea ua fa’ata’oto mai ai le isi la’asaga o fa’atinoga a malo o le lalolagi mo le fa’afetauia o suiga o le tau.

Sa i-ā fa’atasi sui o malo ‘auai i feutaga’iga ma talanoaga fa’a’umi’umi ma taunu’u ai i se maliega ao-ao-tetele fetu’utu’una’i, mo le fa’atinoina e malo uma o le lalolagi o ‘auala e fa’aitiitia ai fesuia’iga o le tau. 

O le Maliega ua ‘ausia nei – lea fa’atoa amata fa’amamaluina i le tausaga e 2020 – sa fa’amaonia e atunu’u e 196, ua fa’ata’oto ai se alafua fa’ava-o-malo e usita’ia e malo uma o le lalolagi mo le fa’atonutonuina o le fa’aitiitia o le gaosia o kasa-o’ona, e fa’afetauia ai lu’itau mo le soifua saogalemu ae maise le saunia o ‘auala e mautinoa ai le maua ai pea e atunu’u uma le lagolago talafeagai mo le tuli’aupuina o atina’e gafa-taulimaina.   

Ua malilie fa’atasi nei atunu’u uma ia taofiofia le vevela o le lalolagi i lalo ifo o le 2 tikeri Celcius ma sa’ilia ai ni ‘auala e taofia ai le fa’aopoopoina o le vevela i le na o le 1.5 tikeri Celcius. 

O le ‘ese’esega o le 1.5 ma le 2 tikeri, o ono tula’i mai ai se suiga ogaoga i le lalolagi atoa, ae maise lava i Malo o Motu Laiti Tau Atia’e (SIDS), lea e ono mafatia ma ogaoga a’afiaga e o’o iai, pe afai e si’itia le maualuga o le suasami. O le iai o le 1.5 tikeri, o se avanoa taua lea mo atunu’u e aupito maualuga le gaosia o ia kasa-o’ona, e toe fa’atulaga ai a latou fuafuaga  mo le fa’aitiitia o le gaosia o kasa o’ona nei, a’o le’i o’o i le 2020. 

O le a palasi i tagata-nu’u o atunu’u tetele nei, le una’ia malosi pea o ta’ita’i ma malo o le lalolagi, ina ia galulue fa’atasi uma aua le ‘ausia o le 1.5 tikeri lea ua fa’ai’uga-fonoina. 

O le ‘ai mo Malo o Motu Laiti Tau Atia’e, o le aofia ai lea o se vaega e ‘ese (mai le Maliega), e ta’ua o se “taui mo le fa’aleagaina ma tafi-‘esea”, e aloa’ia ai nisi o a’afiaga ua tumau ma le-mafai ona toe fa’aleleia, e ui i taumafaiga lelei a sea atunu’u ina ia  fa’atumauina pea.

Ui fo’i e iai nisi vaega taua sa ‘ausia – pei o le vaega fa’apitoa mo tagata ua leai ni nofoaga ona o suiga o le tau – a o le tulaga lelei mo Samoa ma le Pasefika, o le a galulue so’o-so’o-tau’au ai ma isi pa’aga ma atunu’u e fa’amautu atili ai se faiga e fuafua mo nofoaga e avea ma fa’aleagaina, ae maise ia mautinoa le maua o fesoasoani ma lagolago tau-seleni mai le lalolagi mo nisi o motu-maualalo i totonu o le tatou itulagi.  

Sa toe fa’amautuina fo’i e atunu’u tetele o le lalolagi, lo latou naunau e tu’uina mai se seleni e le i lalo-ifo o le selau-piliona tala Amerika (USD$100 piliona tala) o tupe mo suiga o le tau i tausaga ta’itasi, e amata i le 2020, o se fa’aopoopoga tele mo taumafaiga o lo’o fa’atinoina i le taimi nei. 

O le tele o lenei seleni aupito-mo’omia, o le a ‘auala mai fa’alapotopotoga ma teuga-tupe fa’ava-o-malo (le GEF, GCF ma le AF). Ua fautuaina fo’i Malo o Motu Laiti Tau Atia’e, ina ia fa’aaogaina tatau tupe nei mo le faia o a’oa’oga ma fa’aleleia feso’ota’iga fa’aTekonolosi, ina ia mautu ni suiga lelei mo le fa’amalieina o mana’oga tauAtina’e fa’apitoa, e aofia ai le saunia o vaega ‘ese’ese e aupito mo’omia mo le soifuaga i taimi faigata.  

E taua fo’i le mana’o o atunu’u nei, e toe fia silasila i taualumaga uma ma atina’e sa fa’aaoga iai a latou fesoasoani nei, i totonu o le ta’i-lima tausaga. 

O lea mana’oga, o le a malamalama lelei ai atunu’u tetele ma le lalolagi aoao, i se ata-manino o atina’e i atunu’u laiti ae maise le toe va’ai i nisi vaega, e mo’omia ai nisi fesoasoani i le lumana’i. 

O le a tu’uina mai i atunu’u tau-atia’e se fesoasoani e fa’atino atu ai ni ripoti o nei fuafuaga uma. 

O le a amata i le tausaga e 2023 ona fono atunu’u nei e ta’i-lima tausaga, e iloiloina ma silasila toto’a i ripoti a atunu’u nei pe moni ma fa’amaoni a latou galuega ua fa’atino mo le fa’amalieina lava o fuafuaga tu’u-mamao ma le fa’amoemoe o le lalolagi aoao. 

Ui ua ‘ausia e le Maliega i Pale nisi o vaega taua fou mo le tuli’aupuina o le aga’i i luma ma le fa’amalieina o le fa’amoemoe ‘autu, peita’i o lo’o iai lava le fa’anaunauga o atunu’u tetele o le lalolagi, ina ia ‘alofia ni a’afiaga aupito ogaoga e feagai ma malo o motu laiti tau atia’e, lea e matua a’afia gofie ona o suiga o le tau. 

E ao i a tatou pa’aga fa’aleAtina’e ona tausisia pea a latou ta’utinoga, mo le fa’ateleina pea o lagolago tau-seleni, e amata i le 2020 ma fa’asolo atu ai, mo le fa’amalieina ma le fa’ataunu’uina o fuafuaga ua fa’ata’oto nei.   

O le a saga’i atu le Malo o Samoa e fa’atino lana pito-la’au pei ona fa’ata’oto i ana Fuafuaga ma Fa’amoemoega Tau Atina’e o le Meleniuma (INDC) ma o le a fa’aauau pea ona fa’atino ana galuega ma poloketi mo le atina’eina o le atunu’u aoao. 

I le tulaga fa’ava-o-malo, o le a fa’aauau pea ona finauina malosi i so’o se avanoa e maua ma fonotaga e faia, ia mautinoa ai le fa’agata ai pea i le 1.5 tikeri o le vevela o le lalolagi. 

O lo’o tumau pea le talitonuga o Samoa, i le tausisia lea e atunu’u fa’ava-o-malo o a latou ta’utinoga mo fa’afetauia o suiga o le tau – ma avea ai le Maliega i Pale, lea ua aofia ai nisi o a tatou mana’oga taua, mai se atunu’u tau-atia’e i totonu o le Pasefika, o se la’asaga taua muamua aua se tali mai a atunu’u o le lalolagi. 

O le ‘aumalaga a Samoa mo le Fono i Pale, sa ta’ita’ia e le Afioga a le Ali’i Palemia,  Tuilaepa Sailele Malielegaoi ma sa aofia ai le Ofisa Sili o le Matagaluega mo le Va-i-fafo ma Fefa’ataua’iga, o ‘Ai’ono Mose Sua; le Amepasa a Samoa i Malo ‘Aufa’atasi, o Ali’ioaiga Feturi Elisaia; le Ofisa Sili o le Matagaluega o Puna’oa ma le Si’osi’omaga, o Suluimalo Amataga Penaia, le Ofisa Sili o le Matagaluega o Tupe, o Lavea Iulai Lavea; o Ofisa Sili Lagolago e to’alua o le Matagaluega o Puna’oa ma le Si’osi’omaga, o Anne Rasmussen ma Moafanua Tolusina Pouli.

20 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>