O la’u tala fo’i

161 Hits

1. Matauina i Tala Fou se ulutala fai mai”O le taimi o le mea mon”-ma o lea tala e faasino i taumafaiga a Latafale Auvaa mo le Tausala o le Lalolagi lea o loo faatino i le taimi nei i totonu o Saina. Fai mai lea Tala Fou e sili atu i le selau tamaitai mai le lalolagi atoa o loo tauva ai.

E ui foi ina maoa’e ni upu faalele ma ni faitioga matuia mai Samoa i le taumafaiga a lea alo o le atunuu-ae o loo sologa manuia lava taumafaiga uma a Latafale e tusa ai ma soo se vaega o le Tauvaga o le Tausala o le Lalolagi! Afai la sa tele ni faitioga mai Samoa e uiga i le auai o Latafale i lea tauvaga, o le fesili-O ai la o le atunuu e ese mai le Palemia o Samoa sa sili ona faitio i le taumafaiga a Latafale?

O le a la le tulaga ua i ai nei taumafaiga a Latafale? O mea faapenei e tusa ai ma le aganuu a Samoa –a si’i loa se faiva-fai mai e tapua’ia e tagata uma-ae o lea ua sii le faiva o Latafale -ae na o le faitio lava ae le tapua’i!

Ae o le mea e sili ona leaga-e leai se tasi o le atunuu atoa na faitioina le taumafaiga a Latafale vagana ai lava le Palemia o Samoa!

O le a la le ata o tatou vaaia i lea tulaga? O la’u tali- e tatau ona toe alu le Palemia e toe a’oga lelei i le aganuu ma le faa-Samoa! E ui lava ina tele ona Faailoga mai Iunivesite-ae leai se aoga pe afai na te le iloa le va tapuia  o le tama tane ma le tama fafine e pei ona aoaoina e le aganuu a Samoa.

E leai se tagata e sili ona taua i soo se aiga o Samoa i lo le tama fafine-talu ai –o ia o le Feagaiga a le Aiga-e faaaloalo uma i ai le aiga-ma e aloa’ia foi e le atunuu atoa pe a avea ma Taupou a lona aiga. Poo le a lava le mea e finagalo i ai le Sa’o o soo se Aiga o Samoa -e na o le Feagaiga lava e mafai ona ia suia?

A sasi foi le Sa’o o le Aiga i le Feagaiga-e faapologa ma faatigaina e ma’i ae le vave ona faaotia-vagana ai lava ua faamagalo e le Feagaiga. Afai la o Latafale o le Sa’otamaitai e aloa’ia i Faleata- o le a le fe’au a le Palemia e aia ai fua ona aia i mea e gata i tamaitai? Afai la e fono manuia le taumafaiga a Latafale- o lea la se isi upu e fai a o lea ua masa’a le ipu vai? O le pogai lea ua tele ai le sauaina o tamaitai-o le aia fua o alii i mea e gata i tamaitai! O le a sou taofi? 

2. Matauina foi nisi pi’o ma ni’o i le mataupu a se alii Papalagi ma se tamaitai Samoa ia na faatauina atu ni taavale totogi.

O le itu mata’utia la o lenei mataupu, o taimi uma lava e valaau ai i luma o le Faamasinoga- o le upu lava a lea alii Papalagi e i ai lana loia mai fafo-ae o lea ua ‘emo mai le ata-o le loia lava mai Samoa nei.

Ia o lea sa fuafua e lau le faaiuga o lea mataupu ae o lea foi ua toe tolopo talu ai lava le mataupu lenei i le loia a lea alii Papalagi! O le fesili la- e faapefea pe a o’o atu i le taimi ua faataatia e lau ai lo la faaiuga-ae toe faaletonu foi le loia a lea alii?

O le isi tulaga mata’utia o lenei alii Papalagi-e peiseai e le faaaloalo i le Faamasinoga! O le uiga o le faamatalaga- e alu atu lava ia ma lona ofuvae pupuu i totonu o le Faamasinoga e peiseai o loo tafao- ae a silasila i le atunuu- e leai se tasi e faaletonu ona la’ei i luma o le Faamasinoga! E faapefea la ona faataga lea Papalagi ma ona lavalava faapea i totonu o le Faamasioga ae o lea e la’ei mamā tagata o le atunuu? O le a sou taofi?

3. Matauina foi i Tala fou fai mai ua teena e le Pule o le Matagaluega o Tupe tuuaiga a le Itu Agai e uiga i le tulaga pa’ū o lafoga na ao-ma fai mai a ia e sese! O le fesili la-o se faiga masani lea o le tali mai o Faauluuluga o Matagaluega ma Faalapotopotoga i mataupu e lagā i totonu o le Palemene?

O le uiga o le fesili- ua faataga lea tulaga o le tali mai o Ofisa Sili o matagaluega i fesili a Faipule o le Palemene? O ai na faia lea tulaga-=ae o anafea na fai ai? 

E le o se tulaga sa’o le ave e le Ofisa Sili o tali i mataupu na laga i totonu o le Palemene i lana Minisita-ona tali ai lea o le Minisita i fesili a Sui o le Palemene? E le atuga ni Ofisa Sili o Pulega ma Sui Filifilia o Itumalo o loo fai ma o latou sui i totonu o le Palemene! E faapefea la ona toe tali Afualo i lea Ofisa Sili o Pulega ae le o se sui usufono o le Palemene. O le a le mea e ‘alo ai i le ata o niu le Minisita o Tupe ae le tali sa’o ia Afualo?

O le a le faigata o le fai mai o le Minisita o Tupe e sa’o pe sese Afualo! O le mea lea e toe faamanatu atu ai- tuu le galuega a polokiki ia e fai- ae ‘aua le polokiki atu ai fua ma le aufaigaluega! O le a sou taofi? 

4. Matauina foi ma le faanoanoa le maliu o se alii lea na maua i tua ane o le Faletupe o le Samoa Commercial Bank i Taufusi. E pei ona faamaonia e Leoleo- o lea faalavelave na tulai mai se eseesega ma lona to’alua-ma o lea alii e mai Vaitele-fou ma Toamua-uta.

O le pogai o le maliu e faapea na pule i lona lava ola. O loo faagasolo pea la suesuega a Leoleo! O mea faapenei- tatou te tofu lagona uma ai le faanoanoa-aua e mafai ona tupu i lou aiga poo lo’u aiga. Tatou te le iloa lava pe o fea o lafilafi mai ai mala! Ae ona o nei lava aso- o aso o le fiafia- e tatau ona mafuta faatasi uma ai aiga-o le upu lava a le atunuu-“tatou te momoe ma manū e le fati –ae sau mala e atia’i!

O le mea lea- o le mea e sili ona faatauaina i nei aso fiafia- o le mafuta fiafia faatasi- ma ia ‘alo’alo-sa lava ma mea e faatiga ai! O lo tatou tiute faitele- o le malu puipuia o tatou aiga uma! Ia tatou ‘alo’aloese mai mea e afaina ai e pei o inuga-ava oona ma pati-ia faaeteete foi i le feoa’i i taavale-talu ai –o isi o loo feoa’i onanā i taavale!

O le mea lea-o le nofoaga e sili ona saogalemu -o le aiga-fai le lotu ma faafetaia le Atua ua tatou aulia manuia lenei Kirisimasi, ua manuia le taumafai o le fanau i a’oga-galuega ma faiva sa feagai ai ma isi lava mea uma! O le a sou taofi?

© Samoa Observer 2016

Developed by Samoa Observer in Apia