E lē faigōfie le olāga faima’umaga
E moni e fāigōfie i le va’ai ae le fāigōfie le fa’atinoina.
O le olāga lava iā i Sāmoa nei, e lē fāigōfie fo’i i le tele o aiga.
I le āfea ai e le Fofoga o Samoa le maōta o le tamā ia Ah Lam i le aso ananafi, na maua ai o le tamā iā Ah Lam o se tama e gālue tele.
“E lēai lava se āiga e lē o’o iai i le māfatiaga lea.”
“E mōni lava e iāi meātoto e fesoāsoāni ae le fa’apea e toto atu loa fua mai, e umi se taimi e fa’atali ai.”
“Pei o le fa’i e ono māsina e fa’atali ai, o isi fo’i fuāfuāga e pei o le talo e fitu masina.
E to’atasi le tagata faigāluega o le āiga, ae na saunoa le tamā iā Ah Lam o ia lea e fesoāsoāni i le totogiina o le pili o le vai, pili o le eletise fa’apea le fa’atupeina o le a’oga a le fanau. “E itiiti lava le seleni e fesoāsoā mo mea nei, ae a o ātu loa i le faleōloa e fai fo’i le mauāluga o le tau o le soifuāga o lo’o iai nei. Na sāunoa le tama ia Ah Lam, e ui lava o lo’o fa’aaoga fautuāga mai le malō e galueaina le lau’ele’ele ae lē fa’apea e toto atu loa fua mai taeao. E fa’atali masina le taimi fa’aaogaina ai, e o’o foi i fuāla’auainā, o le ‘ele’ele o Falelauniu e tele ina mana’omia le fa’alelei ‘ele’ele.
Ona e le ola lelei fuāla’auainā i le palapala.
Na tāua foi e le tamā iā Ah Lam, e tatau lava i le malō ona ‘ave le fa’amuamua i āiga lima vaivai.
O lo’o to’atele āiga o lo’o mo’omia le fesoāsoāni aemaise lava i le tulaga tau seleni ma le tulaga tau galeuga.
O le tama ia Ah Lam, ua tolu tausaga talu ona si’itia mai Vaivase-Uta e fa’ato’a lona fanua i Falelauniu.
O le sini lava o le tama ia Ah Lam ina ia matua le fa’ato’aga auā o sē tasi lea o fesoāsoāni sili mo lona aiga.
Ae i le taimi nei o lo’o lava le fa’asoa i lona afafine e to’atasi lea o lo’o maua ai se alagatupe mo le tausiaina o le latou aiga.