Fia maua se galuega

Tusia Ulimasao Fata ,

47 Hits

Le tama ia Atonio Pati.

Le tama ia Atonio Pati.

O le maua ai o le fa’atalatalanoaga a le Fofoga o Samoa ma Atonio Pati i le aso ananafi na ia fa’ailoa ai le tulaga maualuga o le taugata o le tau o le soifuaga o lo’o ua i ai nei.

O Atonio e to’atasi lo la alo ma le tinā o le aiga ma o lea lava le tulaga o lo’o i ai le taimi lenei.

“Ia e pei o lea fa’atoa omai na o atu e va’ai tamaiti mai le aoga, ia ae pei o la’u ia lea va’ai i le tau o le soifuaga ua i ai nei lenei pito.

“Ua matua’i taugata lava, ma ua to’atele lava ua tau le gafatia le tau o le soifuaga ma o se itu le lelei lea i a te a’u lava ia i la’u va’ai i ai.

“Aemaise pe a va’ava’ai atu i le maualuga o le tau o oloa ua i ai nei, aemaise o le tau o le tele o auaunaga ia o lea lava le tulaga ua o’o i ai.

Na ia fa’ailoa o le taimi lenei o lo’o tausailia se galuega.

“E mo le silafia ai o a’u e i ai lo’u tomai tau kamuta, ma o se tulaga tele lea o lo’o va’ava’ai atu ai o le taumafai lea e su’e se galuega aua se tupe maua a le aiga ma le tausiga o le atali’i.

“O lenei olaga, ia ua o tatou iloa uma lava a aunoa ma le tupe e le mafai ona gaioi vaega uma o le olaga, o lea e ao ai lava i a tatou ona fuafua lelei mea uma.

“E pei o lea lava fo’i le tulaga ua taumafai ai lava ina ia sailia se tupe mai se galuega aua, o le  taimi lenei ia ua fa’amoemoe lava mea uma i tupe.

“A leai se galuega o lona uiga ia ua leai fo’i se tupe maua , e pei o lea lava le tulaga o lo’o ua i ai nei, Samoa.

“ E pei o lea lava le tulaga o lo’o mana’omia ai lava se galuega mo le taimi lenei, ia e mo le tausiga lava o le aiga.

© Samoa Observer 2016

Developed by Samoa Observer in Apia