LAUGA - “E le mafai ona ’e iloa oe, se’ia ’e iloa muamua le Atua”

By Rev. Petaia Setu 20 August 2017, 12:00AM

(Iopu.42:2-3)

O le tagata ma lona faasinomaga. O le mea foi ma lona tupuaga. A ’e iloa lou gafa, ua e malamalama foi i lou tagata ma lou tala’aga. Ua faapea lava foi i soo se tagata Kerisiano. E ao ina malamalama ma iloa lelei ma le loto talitonu le Keriso ua ta’u Kerisianoina ai lona tagata. Ona iloa foi lea ona faatonu agai iai lona olaga o aso uma. Ua manino le vaai a Iopu. I le, ua ia iloa tino ai, e silisili ese lava le Atua Soifua. Ua sili lona malosi, o lona poto, ma lana pule, e aoao i mea uma lava o i le lagi ma le lalolagi. Ua lagona e Iopu, e le taumasina lona lefulefu ma Lē na faia mea uma lava. Ua ia fai ane, “Ua ou iloa, e te mafaia mea uma, e le mafai foi ona vaoia se mea e te finagalo iai. O ai ea lenei ua na faapouliuligia lau pule ma le le iloa?...o mea ua sili ona faigata ia te a’u na ou le iloa.”

O le fesili tele lava o loo taoto i le tusi nei o Iopu: Aisea ua sauāina ai ma puapuagatia ai tagata lelei? Tagata faamaoni? Tagata amiotonu? Aisea? Tatou te le mau manatu i itu aso e osofia ai i tatou e faigata o lenei olaga. E au ina o tatou faauiga sesē ai  mafatiaga ua feagai ma tatou. E pei ona sesē ai foi le au soo o Iesu ina ua latou manatu o le taui lea o le agasala i le olaga nei (Ioane.:2). Peitai e ese lava faiga a le Atua. E manatu tatou i le isi pito, ae sau le Atua i le isi itu (Isa.55:8).

E tulaga ese le fesaga’iga a le Atua ma Iopu. Po ua e faalogo i lenei pese: Le Agaga o le Atua Soifua Afio maia nei Liua a’u, fausia a’u Faatumu a’u faaaoga a’u

(“Spirit of the Living God, fall afresh on me; melt me; mold me; fill me; use me”)E te iloa o le a sona uiga mo oe? O le mea tonu lea sa tupu ia Iopu. E le mafai ona iloa lelei e Iopu lona ia lava tagata se’ia mua’i vaai ma iloa muamua e ia le Atua. E sa’o; auā e tupu i le olaga o tagata uma. Vaai foi ia Isaia: Pe ana le vaai i le Alii o afio i le nofoalii silisili, po ua na le iloa o ia o le tagata leaga (Isa.6:1-9). Ua liua; ua fausia; ua faatumulia; ua faaaogaina e le Atua. Ua tatou iloa sa faapea foi le olaga galue o John Wesley a o galue o se faifeau o le Lotu Enelagi (Anglican). Ua leva ona galue ae na te le i lagonaina lana galuega o fai. Peitai ina ua maua e le Agaga o le Atua ma ua ia iloa tino ai le mana o Iesu Keriso, ma lona faaolaina i la le faatuatua, na ia faato’a iloa ai o ia o le auauna sa gaogao’i’ī. Peitai, ua liua; ua fausia; ua faatumu e le Agaga o le Atua ma ua ia faaolaina agaga e tele lava mo le Alii.

A o oe, poo e iloaina oe? Poo e malamalama ia te oe ma lou tagata? O lou vaai ma lou iloa lelei o le Atua, o lou poto foi lena e te ola ai. O lou mafaia foi lena ona inu i tiga ma manumalo ai.

E le o se faasalaga o Iopu na pagātia ai. A o ala na saunia e le Atua, ina ia fai Iopu ma manulauti a le Atua lava i le finauga ma Satani. A o ni tofotofoga ua vaai toto’a ai lenei tamā i le pule aoao ma le silisili ese lava o le Atua.

E le o se Atua Iopu. Sa matua tauga fita ma faigata sa fetaiai ma lenei tamā. Ua faaumatia ana mea uma. Ua ‘alo ese ma tau mamao ma ia ana uo ma ana aumea mamae. O e sa latou fealofani ma faifai mea faatasi ma tu mamao mai. O le uiga lea o loo tupu pea lava. E lata lava i le tagata e maua mea. E tulai mai loa lea i le tofi; pipii loa iai. E uma loa foi le sosia ma pa’ū ese mai le tofi, fiu e autilo le uo. Ua segisegi. Ua le toe masani. Ua faifai upu ma faatausuai. O faafitauli uma nei, sa faufaulala’i i luga o ma’i ma tiga o si nei tamā. Sa oi, oono, alaga ma finau atu i le Atua i ona mafatiaga. Sa silafia lelei mai e le Atua le loto o lana auauna. E le i fefe; e le i siilima. Ua iloa i le loto faatuatua o lenei tamā, e faamaoni le Atua. Fai mai Iopu, “Aua ua ou iloa o loo soifua le na te togiolaina a’u.” (19:25).

Samoa e, o manuia o Iopu, e afua mai i le loto talitonu ma lona faatuatua i le Atua. Ua iloa Iopu i lona onosa’i. Peitai, o le onosai na afua mai i lona iloa lelei o le Atua. Ua malamalama Iopu i le uiga ma le natura o le Atua. Ua mafai ona ia faamatalaina le faamaoni o le Atua ma lona alofa. Ua ia tautala i le mamalu faaalia o le Atua i lana pule ma lona mana silisili ese. E leai se mea e faigata i le Atua, e leai foi se na te faaliliuina lana pule i mea uma ua finagalo ia iai. O le iloa lea , ua tali mălie ai tiga ma finau malo ai i ona puapuaga. Ua suamălie ai foi ’ava i le alofa o le Atua e pei ona pese ai le tufa ‘ava. Ua telē ai le loto ma fai lona fatu. Ua le toe ila ai i ni auupega o lenei lalolagi auā ua talitonu i le alofa o le Atua. Ua mautinoa i le loto e faamaoni le Atua. Fai mai le tamā nei, “E ui lava ina fasioti o ia ia te a’u, ou te faamoemoe pea ia te ia; ou te faatonu atu o’u ala i ona luma.”(13:15)

Ua tele tamā ua toilalo ma ta’uleagaina a latou pulega ma o latou taimi auā ua soona faafiapule le mafaufau. Ua le vaai a’e i le Atua; ma ua latou le fia iloa lava foi le Atua! O fea nei la ua i’u iai?

Na manatu lava foi Saulo (Paulo), ai o loo tonu ma lelei lona maelega i luma o le Atua i pulega faa tusiupu ma faresaio. Peitai, ina ua pupula ona mata faaleagaga ma vaai moni i le Alii o Iesu Keriso, na ia iloa ai, e matuā le faaolaina lava ia i lona tulaga faafaifeau o loo masau solo ai. E fuamoa ma se mea faaleagaga o iai i mamalu faafaresaio  ma tusiupu ma a latou pulega sa soona faamaoni ai nei ma soona sauā ai i tagata o le Alii. Ua liua; ua fausia; ua tumu o ia i le Agaga o le Atua. I le, ua taamilo faa tolu i le atu Asia ma lana tautinoga, “Ua le toe ola Paulo, a o Keriso ua i totonu ia te ia” (Kala.2:20).

Afai o lagona ia e mafai ona toe fuataiina ai le soifua galulue ma le talitonuga o tamā uma o Samoa. Oka! E le toe iai ni ulugalii tete’a! E le toe iai ni tamā ola le popoi ma amio faapaupau i fanau. E le toe femisaa’i fanau aoga i le taulaga ma soo se nofoaga. E le toe tumutumu o tatou fale faamasino. Po ua tapu foi i laueleele ma fanua o Samoa faiga faapaupau e pei o ulugalii alii ma ulugalii tamaitai. O casino ma le faatalitane! Atoa ma isi faiga ma talitonuga faa Satani ua le tusa ma le finagalo o le Atua Silisili ese ua faavae ai le mālo o Samoa.

Afai e tupu nei leaga i lou olaga, i lou aiga, nuu, ekalesia, i le mālo, i lou siomaga, ua e faamatalaina e oe lou lava tagata. O le tagata gaogaoi’ī. O le atigi tagata; ua leai se faamoemoe ola o iai. Ua le iloa le Atua.

Samoa e, aemaise tatou tamā, se i o tatou tutū faatasi e faailoa atu i o tatou aiga ma a tatou fanau lo tatou iloa o le Atua. O le iloa e saoloto ai; e olioli ai; e manuia ai; e faaolaina ai. O le tala, ua sili ona faamanuia e Ieova o le gataaga o Iopu i lona amataga (f.12). Auā o le tamā lea fai mai le Atua, ‘e leai sē tusa ma Iopu” (2:3). You’ll never really see yourself until you see God.

 

Amene

7737063/7783782

By Rev. Petaia Setu 20 August 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>