O se faafitauli maoa’e e tusa ai ma auaunaga tau va’a a Samoa-na faamanatu ananafi, faatai ai ma le taunuu mai o se vaa o le Matson South Pacific (S.P.X.) 

O le M.V. Islander Voy 001 na taunuu mai i le itula e 6 i le taeao mai Honolulu ma se sauniga e faapa’iaina ai lea vaa ma le ‘auvaa-na ta’ita’ia e Father Falaniko Matulino i luga o le uafu. 

Ae o le a se mea lelei o aumai e lenei vaa mo Samoa?  “O le masina talu ai na tu’u ai i le sami le Matson South Pacific ma le auaunaga SPX ma o le taimi muamua lenei ua i ai se fela’uaiga tuusa’o i vaa poo se auaunaga mai le West coast o le Iunaite Setete i Honolulu ona soso’o ai lea ma Apia,”o le faaaliga lea a Masuisui JR Pereira o le Molida Group Director i le Weekend Observer.  “A uma Apia-o le a aga’i atu le vaa i Pago Amerika Samoa, Nukualofa Tonga, Fiti ona toe taliu mai ai lea i Honolulu.”  O le a tatala e lea vaa ni avanoa ma ni fesootaiga tau fefaatauaiga e tatau ai i le va o Honolulu ma le Pasefika. 

 “Ou te manatu o le taua o lenei vaa e faapenei-o se taimi muamua lea ua i ai se auaunaga tuu-sa’o mai Honolulu i Apia,” o le faaaliga lea a Mr. Pereira.

 “I le taimi nei e tusa ai ma le tauvaga, ua ia i latou ni vaa e o mai le Iunaite Setete i isi vaega o le itulagi mo se faata’ita’iga o Tahiti ma Tonga.  “Ou te manatu o le taulaga mulimuli e o mai i ai o Apia a’o le’i toe taliu atu i le Iunaite Setete, ae tusa ai ma le auaunaga a le Matson South Pacific-o le taimi muamua lenei ua i ai se latou auaunaga tuusa’o mai Honolulu i Apia. E tusa ai ma Mr. Pereira, o le taua o lenei auaunaga fou e faapea ua talai ai ni avanoa fou mo Samoa e tusa ai ma mea tau va’a.

“E na o le valu aso e sau ai mai Honolulu i Apia,” o lana faaaliga lea. “E tusa ai ma mea tau vaa poo fefaatauaiga i le taimi nei, o le toatele o tatou tagata latou te le o iloa le taugata o lea tulaga, O le mea o loo matou faia iinei e taua tele talu ai le matua noatia o le Matson ia Samoa ma Amerika Samoa. “O le isi mea moni taua e faapea o loo una’ia e le malo le auina atu i fafo o taro e le gata i Niu Sila ma Ausetalia-ae faapito lava i le Iunaite Setete o Amerika ma Honolulu talu ai-nai eseesega laiti e tusa ai ma tau ia e sili ona lelei i lo tau o loo tatou maua i le taimi nei mai Niu Sila ma Ausetalia.

“O le mea lea-o le faatinoina o lenei auaunaga o le a tatala ai avanoa mo oloa e auina atu i fafo e Samoa e ala i le avanoa atu i ni fesootaiga tau fefaatauaiga e sili atu-e fesoasoani ai ia Samoa mo maketi i le Iunaite Setete ae faapea foi isi lava Atumotu o le Pasefika.  “A mae’a le malaga faa-taupou a le vaa i le asŏ o le a iinei le vaa i le ta’i 28 aso; e ese ai mai le isi itu e faapea o le a tumau pea ona i ai ni vaa se lua mai Niu Sila ma Fiti ia o le a o mai i Samoa ma le itulagi i le ta’i 14 aso  uma. 

“Matou te faafetaia le atunuu ma le Malo mo le latou lagolago aemaise ai lava pisinisi tau fefaatauaiga i totonu o Samoa faapea foi ma i latou e aumai ai oloa ia o le a aumai i Samoa.”Ae mo le Matson, ma lona ulufale mai i totonu o le tauvaga tau fefaatauaiga-o se lu’itau lea ma o se ituaiga lea o unaiga i lea lava taimi.  “O lu’itau autu moni lava o le tauvaga,” o le faaaliga lea a Mr. Pereira. Ae peitai, o se mea lelei foi lea mo tagata-talu ai-o tau o uta ua pa’ῡ i lalo ma a e tilotilo i uta, o lo latou taua e maulalo i lo le tauvaga. 

 “O se mea lelei lenei mo lo tatou atunuu atoa talu ai-a pa’ῡ tau o uta-o lona uiga o tau o oloa i totonu o le maketi e tatau foi ona paῡ. “O le uiga o la’u faamatalaga e faapea o le tulaga moni lena ae tusa ai ma le fuafuaga a le Matson-o le tauvaga o loo tumau pea ona tutusa e pei lava o soo se isi kamupani vaa, ae matou te faafetaia le tauvaga ma ua faaleleia ai auaunaga faapea foi ma totogi o uta, o se mea lelei lea mo tatou tagata. 

 “O le faatuina o lenei auaunaga ua talai ai faitoto’a mo le toatele o tatou tagata, aemaise ai lava o tatou tagata o loo i Honolulu-talu ai-e to’atele tagata Samoa o loo i ai, e tautua ai foi tagata Samoa o loo i totonu o Toga ma Fiti.”

Na ta’utino mai e Mr. Pereira e faapea o le auaunaga ua tuuina mai e le Matson-e mo tagata ma o lana faafetai e mo tagata uma lava sa fesoasoani atu ina ia mafai ona tino mai lea malaga faa-taupou.  “Ua leva ona iinei le Matson toetoe lava lima tausaga i le taimi nei ma talu ai le faatuina o le matou pisinisi i le fa tausaga talu ai-o lea ua matou faaopoopo atu i ai ma lenei auaunaga,” o lana faaaliga lea. “O lenei tulaga ua tuuina atu ai le molimau i le noatia o le Matson ia Samoa e ala i le fausia o le fefaatauaiga; e le gata i fesootaiga tau fefaatauaiga –aemaise ai lava oloa e auina atu mo Samoa. 

 “Ou te fia faafetai atu i o tatou tagata talu ai-i le faaiuga o lenei aso –o i latou ia o loo matou taumafai e auauna atu i ai ae o i latou foi ia e faatinoina le faagaoioia pe o pisinisi. O se mea e lelei mo pisinisi ae faapea foi le malo e tusa ai ma lafoga.”