Pulega Soofaatasi o Samoa

Tusia Fuimaono Na’oia Faasavalu Touli F. Tupua ,

522 Hits

O le faatupu-teleina  o le fausia o faleoloa i le 1889-na toe tupu foi i le 1895-o le taimi lea na toe faatama’ia ai se vaega tele o Matafele e se afi. E sefulu faleoloa i Matafele na mu ai ma faaleagaina, e aofia ai le faleoloa o Mr. Parker, Volkmann, Davis, Netzler, Trood, Conrad ma Rosenberg. E le’i mu le Falesa fou o tagata Samoa i Matafele ma le International Hotel, Ofisa o le Konesula o Siamani ma le Ofisa o le Tiute i le itu i le uafu o le alatele. 

O lea na toe faatulaga ai fale i luga o le Ala i Luga o le Sami mai le A’oga mo Teine i Savalalo i Matafele-a’o faagasolo le toe fausia o fale. O le fale aupito i mata’ina o le fale fou lea o Mr. Rosenberg lea na fau i le 1895-i le itu i sisifo o le Falesa o Tagata Samoa i Matafele-lea na faatau mulimuli ane e le Kamupani a Pīpī poo Burns Philp i le 1933 -ma toe ati a’e e ui ina sa tumau pea le potu i le eleele sa i ai le fale muamua. O le itu aupito i taua i le tulaga tuputupu a’e o lenei Taulaga e latalata i le ava-a’o faagasolo le 1890, o ona fale talimalo tu-matafaga, e sefulu tasi sa i ai i le 1889-ma sa faaauau pea ona faafou, toe faaopoopo ma fesuisuia’i i latou sa pulea. 

O fale e aupito i ta’uta’ua o le “Occidental Hotel lea na faaleagaina e le afi o le 1895-ma le afi o le 1914, o le International Hotel lea sa faafesaga’i ma le ava, ma sa toe faaopoopo i ai isi fale i le 1880, ae mulimuli ane toe siitia i lona tulaga sa i ai i le itu i sisifo o le Vai o Vaisigano, le Hotel zur Stadt Hamburg, lea na fau i le 1878 mo le ulua’i taimi-ma toe fau ina ua mavae le afi o le 1895, o le Cosmopolitau Hotel lea na fau i le 1889, le Apia Hotel lea na liua mai le avea ma Ofisa Konesula o Peretania i le 1878, le Club Hotel, lea na faavae i taimi faai’u o le 1880 ma sa faafeagai ma le Apia Hotel, le Malifa Hotel lea na fau i le 1894-e latalata i le Hamilton’s pool, le Scandinavian Hotel ma le fale tele ma le lauiloa o le Tivoli Hotel-lea na mua’i fausia i le 1889-ae na toe fau e Mr. Walker mo MIsimoa poo Harry Moors i le 1892. 

O le tulaga lelei ma fausaga o nei fale talimalo e matua eseese lava, o le Tivoli a Mr. Moors-o le fale aupito i manaia lea faatasi ai ma ona poletito fogafale-lua; e ta’i 16 futu le lautele, o ona tulimanu e tutū matilatila ma lona falealuga fe’ilafi. 

O le toatele o tagata faipisinisi iloga o Apia e foliga mai sa aafia i le pulea ma le faafoeina o fale talimalo. O i latou ia o Charles Netzler ma Mr, Conradt (sa pulea le Occidental); Mr. J.W.Aull sa pulea le (Pacific Hotel), o Mr.J.Acosta le (Hotel zur Stadt Hamburg), Mr. C.O.Hammrel (Scandinavian Hotel), Thomas Schmidt (Matafele Saloon), Peter Fabricius (Apia ma le Club Hotel), Mr. H.Voight ma Mr.E.Huch ma Mr. R. Rarthke (Cosmopolitan), Captain Wendt, Mr. Pollack (International), Mr.G.W. Partsch (Motootua Gardens & International Hotel), Mr. J.Davis ma Mr. & Mrs Stephlin, Harry Dines (Malifa Hotel), Mr.F.Niedringhaus (Eagle Hotel/Deuttache Bier Hall), Bob Easthope (Club, Tivoli, International, Malifa), ao Harry Moors ma Mr.G.W. Partach (Tivoli Hotel) Ina ua uma ona vaevae eleele o le esetete a Weber i Motootua i le 1890, sa faateleina fanua maualuluga i uta ua i ai vaega-eleele tetele ma ua faatauaina e avea ma fanua e nonofo ai. 

O Vailima le nofoaga sa mau ai Tusitala poo Robert Louis Stevenson, e tuaoi i matū ma Mr.R.C. Carruthers, o le fale o Mr. Heidlins i le Ala i Motootua, ma fale o Schleuter ma Netzler i le Ala o Vaea (Falealili Street) sa fausia i taimi amata o le 1890. 

Sa faapea foi ona fau e David Parker ma Peter Fabricius ni fale i lea vaega o le Taulaga. E o’o mai i le 1900-ua tele fale mautu ua uma ona fausia e faafesaga’i ma le alatele aga’i i le uafu, e aofia ai ni falesa se fa, fale talimalo faa-ona-po nei faatasi ai ma le tele o faleoloa ma fale e mau ai e pei o fausaga ta’i fogafale-tasi pe fogafale-lua.

E ese ai mai falesa-sa fau foi fale laupapa e ato ‘apa ae matua malosi, lavelave, ma mautu le tulaga o latou fausaga. O le tele o ata o fale e aumai i Ausetalia, Niu Sila poo Kalefonia, e na ona aumai faapipi’i, ae o le sao o tusiata o le atunuu i lena taimi, aemaise ai lava Walker & Willis, sa matua taua tele.

© Samoa Observer 2016

Developed by Samoa Observer in Apia