Fa’afetai mo la’u galuega

Tusia Fetalai Tuilulu’u ma Aruna Lolani ,

72 Hits

Tina fiafia ia Aiga Malama o Fasito’o Uta.

Tina fiafia ia Aiga Malama o Fasito’o Uta.

O le tinā lenei ia Aiga Malama sa mafai ona fa’alauloaina e le Fofoga o Samoa i le tolu vaiaso talu ai lona fia maua ai se galuega mo le aiga.  

Peitai sa mafai ona tali mai se tasi o Samaria Agalelei lona fanoaga ma maua ia le avanoa e faigaluega ai se tasi o falema’i i Moamoa e taua o le Goshen Trust Healthcare.

 Sa faigaluega muamu le tina peitai sa ma’i ma mafai ai ona nofo ae toe foi atu au leai sona avanoa. 

 “E le pei nisi o galuega e lelei totogi ae o le galuega foi e maua ai le seleni.

“Ia o Apia foi le nu’u o le galuega o nisi o taimi e le mafai ai ona ou sau le fale ona o le faigata o auala-femalagaina. 

“O le olaga nei o le tupe lava e mana’omia ma o le ala foi lea o le fa’amoemoe su’e galuega ona o nei tulaga. 

“Ia o le itu masani lava na’o le taimi lava e totogi ai e u’u ai le tupe o le upu i se isi  aso e aulia atu e le totogi ia e matua’i leai se tulaga fa’apena.

“Ia afai la ae tu’u mai ai ma le mau fa’alavelave, o mea fai totonu o nu’u ma isi tulaga fo’i ia ia na talanoa loa lea i le fa’atinoina o nonogatupe.

 “E le fa’apea la a fai nonogatupe nei ona fa’apea lea e totogi le vaiaso lea uma ai lava, e leai se mea fa’apena.

 “Aua o le tala moni lava e na’o le pau lea o le sulufaiga o lo’o i ai le taimi lenei i lo’u ia iloa i ai.

 “Ae o le mea moni e matua’i le lelei tele lea tulaga pe a va’ava’ai atu ai le lumana’i.

“O lea tonu lava le fa’amoemoe ina ia maua se galuega aua lava le fanau ia aemaise lava le tausiga o aiga. 

 “E pei lava e tele ina fai mai le Palemia o lo’o tele $ i le ele’ele, ia ae le fa’apea e faigofie e te le alu atu loa ua paepae mai $ o le mea e tatau ona e galue i le taimi lenei.

“Ae pei o le itu lea e va’ai atu ai e pei e titilo tele i le tulaga fo’i lele na’o e faipine ma aiga mauoa ae galo ai i matou.

“E silasila na’o e lelei le tulaga ta’u a’oa’oina ma ave ai avanoa faigaluega ae fa’atuatuana’i lava le tele o nai isi tagata. 

 O se lagona fiafia tele na o’o le tina ina ua vili atu le ona lenei falema’i ma manao e alu atu le aso e soso’o ai. 

“Ia sa vili mai lenei Samaria agalelei ma mana’o ou te usu atu le aso e soso’o ai. 

“Ian na ou usu ma le fiafia aua ua ou mautinoa o lo’u avanoa lea mai le Ali’i ou te faigaluega ai. 

“Na ou taunu’u atu ma mafai ona ave sa’o lava a’u e fai au suega fa’ataitai ma ou faigaluega ai lava. 

“E fa’afetai lava le Alii ona o lona agalelei e auala mai lenei Samaria agalelei. 

“Fa’afetai atu foi le Samoa Observer ma le vaega o lo’o gafa ma le lipotina o le Fofoga o Samoa le asiasi mai nu’u i tua ae le’o na’o le taulaga. 

“Fa’amanuia le Atua le Goshen Trust Healthcare fa’apea foi le Fofoga  o Samoa. 

“Fa’afetai lava le agalelei. 

© Samoa Observer 2016

Developed by Samoa Observer in Apia