Ola i se olaga sa’oloto ma tuto’atasi

By Aruna Lolani 20 June 2017, 12:00AM

O le maua ai o le fa’atalatalanoaga le Fofoga o Samoa ma le tinậ ia Akenese Tuitea Talavou o Tuana’i sa maitauina ai le galue malosi ae le gata I lea o le mataina o lona nofo to’atasi. 

O le nei tinậ e 69 tausaga le matua le soifua ma o se tina galue malosi ma ola fiafia e leai lava se fa’alagolago i se tasi. 

“Ia mo le silafia e le tou polokalame na’o a’u lava o lo’o nofo I nei. O la’u fa’atoaga koko lenei ma o lou atoa o le nofo lava ma fa’amoemoe i mea ua ou maua mai lo’u laufanua ou te ola ai. 

“Ia e leai so’u to’alua po se fanau, pau lava o le olaga ua iai. Ou te le fa’anoanoa ai aua e sili atu foi ia te a’u lo’u nofo na’o a’u. 

“O lo’o tele lava meaai o le vai ma nisi o tulaga mai le alofa o le Ali’I e maua ai foi le malosi. 

“O le alofa foi lea o le Ali’i o lo’o o’u ola ai pea lava ma maua ai le malosi ma e le tu’ulafoaia lava e le Ali’I ona tagata. 

O le fanau o matua o Akenese e to’a 13 o lo’o nonofo lava le tagata ia I lona aiga. 

“E to’a 13 matou ia ua tau fai fai aiga uma, ia o le a lava foi le tulaga ou te mana’o ai e vili lava iai mo se fesoasoani. 

“Ia o lo’u tuagane o lo’o nofo atu I lalo atu lava I nei o le Matai o le matou aiga, ia e na’o ia foi lo’u aiga e latalata mai ia te a’u. 

“Pei na fai atu le taimi ua sola, e na’o a’u lava lo’u aiga, o lo’u toga koko ma lo’u fa’atoaga fa’I e fa’alagolago iai. 

“Se vagana ua iai se isi mea ou te mana’o iai ona vili lea o’u uso ma tuagane. Ou te le vili ia se tupe. E lei tai tai o’u fai ai se tupe. O lo’o iai lava a’u ia tupe. 

“O a’u o le faifa’atoaga ma e maua lava a’u tupe. 

“O lo’o iai foi le penisione e fa’alagolago iai ma e sefe lava le tupe e maua foi se ma’i po se fa’alavelave foi.

“O nisi foi o aso a leai a mana’omia se fesoasoani ona totogi le a le autalavou I se $50 ae omai fai la’u galuega. 

Sa taua e Akenese e leai lava se tulaga e popole iai o lo’o lelei mea uma. 

“Ou te le’o popole lava se mea e tasi o lo’o lelei le pai fa’apena foi ma le eletise.

“Pau lava le fa’afitauli o nisi foi o tagata fao mea e masani lava ona omai ma fa’aleaga la’u pa.  

“I le isi vaitaimi sa gaoia ai foi la’u televise, ma fa’aleagaina ia le pa. 

“Ia ae fa’afetai lea ua uma ona toe fai ma lea ua lelei ai mea uma.

By Aruna Lolani 20 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>