So’ia le ola pei o pa’a

Tusia Fa’aliliu e Maiava ,

229 Hits

Toe mafaufau tasi lava… E mālie nei meaola o pa’a. A tu’u-fa’atasi i se pakete, o le taimi lava e amata a’ea’e ai se pa’a ma taumafai e alu i fafo ma le pakete, e taumafai uma ai fo’i isi pa’a e toe toso ifo i lalo. Lona uiga, e le mafai lava e se pa’a se tasi ona sao i fafo ma le pakete.

E le mana’o isi pa’a e sili atu le a’e a le isi pa’a nai lo le to’atele. A o le mea malie, e pei lava tatou tagata-soifua, o pa’a ma a latou amio. E iloa loa e se to’atasi se mea lelei, taumafai uma fo’i isi ia o’o iai! “Tatou te taumafai fo’i, ia ‘aua lava ne’i sili atu isi tagata – po’o se uo po’o sou fili po’o ai lava, i lo tatou”. Ae tatau ona manatua lelei, o le “so’ona naunau e i’uvale ma o’’o ai i mau fa’afitauli.” 

Talitonu iai pe leai, a o le mea moni, o le to’atele o tatou, e le manana’o e sili atu isi tagata i lo tatou. E fiafia a tatou uo pe a tatou maua se manuia, ae ‘aua ne’i manuia tele atu i lo latou! A o le tasi misiterio o le soifua manuia, o le ‘aua lea le taumafai e fa’atusatusa lou soifua i le isi tagata.

O le tulaga mata’utia lea, ona e foliga ua tatou iloa ona ola pei o isi tagata, ae le pei o tatou lava. Ae le-iloa, o le taunu’uga o le ola fa’atusatusa i le isi tagata, e matua leai ma se aoga i o tatou lava tagata. “O le tele o faitioga ma le mau tala i le togala’au manaia o le isi ‘olomatua, e le te’i ua matagofie ai fua o tatou lumafale.”  

O tagata e fia ola manuia, e mamao le silasila i le ituaiga olaga ma le taunu’uga lelei e mafai ona ‘ausia, a’o latou e le-magafagafa, na o le faitio lava ma matau sese ma fa’aletonu o isi. O le ola mana’ona’o ma le tele o le loto-fuā i isi tagata, o se ‘auala mataga e vave ai ona fa’aletonu lou soifua, e vave uma ai fo’i lou fiafia.  

O lo’o ia te ‘Oe le malosi’aga fa’apitoa ma le iloa e le ‘au-maua e isi tagata. Fa’aaoga tatau loa i le ‘auala e sili ona lelei ma gafatia. Soia le tau-fa’atusatusa i isi. E le mafai e manu ona fe’ausi. E le mafai fo’i e i’a ona fea’ei i la’au.

E fa’apena fo’i ona le-mafai ona felelei povi ma mamoe. Ioe, fa’aaoga tatau ou malosi’aga ma taumafai malosi lou olaga i ou lava ala. Ae na o lou Ali’i lava o Iesu o lo’o iai le ki ma le tatala o lou malosi atoatoa. Tatalo nei ia mafai ona pulea e Ia ‘Oe ma lou olaga i aso ta’itasi ma amata fa’amalosi atu ‘Oe ina ia amata nei ona e fiafia i le manuia na Ia fuafua ia e maua. Toe mafaufau tasi lava…    

 

 

© Samoa Observer 2016

Developed by Samoa Observer in Apia